ديماش قۇدايبەرگەن قىتايدىڭ ءان بايقاۋىندا ونەر كورسەتەدى

استانا. KAZINFORM - قازاقستاندىق ءانشى ديماش قۇدايبەرگەن قىتايلىق حۋنان تەلەارناسىنىڭ «Singer 2024» ءان بايقاۋىنىڭ اقتىق باسەكەسىندە ونەر كورسەتەدى.

قىتايلىق Weibo الەۋمەتتىك جەلىسىندە تاراعان اقپاراتقا سەنسەك، «Singer 2024» جوباسىنىڭ اقتىق باسەكەسى 26-شىلدە كۇنى تىكەلەي ەفيردە كورسەتىلەدى.

بايقاۋ شارتىنا سايكەس، فيناليستەر ءبىرىنشى كەزەڭدە ارنايى شاقىرىلعان انشىلەرمەن جۇپتاسىپ ءان شىرقايدى.

ال ەكىنشى كەزەڭگە جولداما العان ءتورت ءانشى جەكەلەي سىندا ءوزارا مىقتىنى انىقتايدى.

ايتا كەتەرلىگى، ديماش اقتىق باسەكەنىڭ العاشقى كەزەڭىندە قۇرمەتتى قوناق رەتىندە ساحناعا شىعىپ، «Singer 2024» بايقاۋىنىڭ قاتىسۋشىسى شانتە توررەين مۋرمەن بىرگە ونەر كورسەتەدى.

بۇعان دەيىن حابارلاعانىمىزداي، قازاقستاندىق ءانشى رۋحيا بايدۇكەن قىتايداعى «Singer 2024» بايقاۋىنىڭ 8-كەزەڭىندە ونەر كورسەتىپ، كەلەسى كەزەڭگە وتە الماعان بولاتىن.

ەسكە سالايىق، ديماش قۇبدايبەرگەن «Singer 2017» بايقاۋىندا ەكىنشى ورىن يەلەنگەن ەدى.

اۆتور
مۇحتار قاليموللا ۇلى