ديماش قۇدايبەرگەن قازاق تىلىنە قاتىستى ماڭىزدى جاڭالىقتى جەتكىزدى

استانا. قازاقپارات – حالىقارالىق «قازاق ءتىلى» قوعامى تۇڭعىش رەت Oxford Qazaq Dictionary سوزدىگىن شىعاردى، وندا 60 مىڭنان اسا ءسوز قامتىلعان، دەپ حابارلايدى El.kz اقپارات اگەنتتىگى.

بۇل تۋرالى ونەر جۇلدىزى ديماش قۇدايبەرگەن مالىمدەدى.

بۇل - 60 مىڭنان اسا ءسوز قامتىلعان، جالپى 1300 بەتتەن تۇراتىن ۇلكەن ەڭبەك. سوزدىكتى جاساۋدا دۇنيە جۇزىنە تانىمال Oxford سوزدىگىن قۇراستىرۋ ادىستەمەسى مەن تەحنولوگياسى نەگىزگە الىنعان. الەمدەگى اسا بەدەلدى Oxford University Press باسپاسىنىڭ قولداۋى جانە رەسمي قاتىسۋىمەن باسىلعان، - دەپ قۋانىشتى جاڭالىقتى جەتكىزدى ول.

ءانشىنىڭ ايتۋىنشا، سوزدىك قۇراستىرۋ 4 جىل ءجۇرىپ، وعان قازاقستانداعى كاسىبي لينگۆيستەر مەن عالىمدار، بىلىكتى اۋدارماشىلار مەن رەداكتورلار، جالپى 50 دەن اسا مامان قاتىستى.

اعىلشىن ءتىلىنىڭ بەلسەندى قولدانۋشىسى رەتىندە سوزدىكپەن تانىسۋعا، ونى كۇندەلىكتى پايدالانۋعا شاقىرامىن! حالىقارالىق «قازاق ءتىلى» قوعامىنىڭ باستاماسىنا ساتتىلىك تىلەيمىن! ءتىلىمىزدىڭ مارتەبەسى مەن قولدانۋ اياسىن كەڭەيتەتىن وسىنداي اسا ماڭىزدى، ناقتى جوبالارعا قولداۋ بىلدىرەيىك! - دەپ جازدى ديماش.