ديماش قۇدايبەرگەن جاعىمدى جاڭالىق ايتىپ، جانكۇيەرلەرىن قۋانتتى

استانا. KAZINFORM - ديماش قۇدايبەرگەن 10-ساۋىردە جانكۇيەرلەرىن جاعىمدى جاڭالىقپەن قۋانتتى. بۇل تۋرالى ءانشى ءوزىنىڭ الەۋمەتتىك جەلىدەگى پاراقشاسىندا جازدى.

- مەنىڭ تۋعان كۇنىمە وراي، 26-مامىردا Almaty Arena ستاديونىندا «Stranger» كونسەرتىنىڭ كينوتەاترلارعا شىعۋىنا وراي ۇيىمداستىرىلاتىن «D and Dears» اتتى فان-كەزدەسۋ وتەدى. مەنىڭ شىعارماشىلىعىما ارنالعان شوۋدى، قازاقستاندىق ارتىستەردىڭ قاتىسۋىمەن، ءارتۇرلى سۇراقتارعا جاۋاپتارىڭىزدى الىپ، جاڭا اندەردىڭ پرەمەرالارى مەن بەينەباياندارىن دا قاتار تاماشالاي الاسىزدار، - دەپ جازدى ديماش.

ال 27-مامىردان باستاپ استانادا وتكەن «Stranger» شوۋى 5.1 كولەمدى دىبىسپەن جانە قاتىسۋ ەففەكتىسىمەن ۇلكەن ەكرانداردا ەلىمىزدە العاش رەت كينوتەاترلاردا كورسەتىلەدى.

كەلەسى اپتادان باستاپ فان-كەزدەسۋ بيلەتتەرى Ticketon سايتىنا شىعادى. كەزدەسكەنشە! سىزدەردى ەرەكشە جاقسى كورەمىن، - دەپ جازدى ءانشى.

ديماش قۇدايبەرگەن بۇگىن الەۋمەتتىك جەلىدەگى پاراقشاسىندا ماڭىزدى جاڭالىق ايتاتىنى تۋرالى الدىن الا حابارلاپ، ەلدى ەلەڭ ەتكىزگەن ەدى.

ايتا كەتەلىك ديماش قۇدايبەرگەننىڭ ورىنداۋىنداعى ءان ەڭ كوپ تىڭدالعان 100 كومپوزيتسيانىڭ قاتارىنا ەندى.