دوس جوعالتۋ - رۋحاني ءوسۋدىڭ بەلگىسى

استانا. قازاقپارات - ەرتە مە، كەش پە كىممەن شىن دوس ەكەنىڭ، كىممەن دوستىق تەك كوزبوياۋشىلىق بولعانىن ايىرا باستايسىڭ. سەنىڭ ۋاقىتىڭا كىمنىڭ لايىق، كىمنىڭ لايىقسىز ەكەنىن بايقايسىڭ. دوسىمدى جوعالتىپ الام دەپ بار كۇشىڭمەن ونىڭ ەتەگىنە جارماسۋدىڭ اسا ءبىر قاجەتتىلىگى جوق ەكەنىن پايىمدايسىڭ.

كەلەشەككە كۇمانمەن قاراپ، كوڭىلىڭدى جاسىتا بەرمە. ءبىر جاقسى، ءبىر جامان جاڭالىق بار. جاقسى جاڭالىق - جىل وتكەن سايىن ادام بۇتىندەي وزگەرىپ، بولمىسى بولەك بولا باستايدى. بۇرىنعىدان دا مىنەزىڭ اۋىر، بۇرىنعىدان دا تالعامىڭ زور، قىزىعۋشىلىعىڭ مول بولا بەرەدى. كوپ ساياحاتتايسىڭ. كوپ اداممەن ارالاساسىڭ. سەن سول عاجاپ ساتتەرگە، كەرەمەت جەرلەرگە ورالعىڭ كەلەدى. ال، جامان جاڭالىق - وسىلاي وزگەرۋ ءۇشىن كەي دوستارمەن قارىم-قاتىناستى ۇزۋگە تۋرا كەلەدى. وزگەرىس - مىندەتتى تۇردە جامان بولۋ دەگەن ءسوز ەمەس. وزگەرىس جاڭا ءبىر عاجاپتى تانۋعا باعىتتالعان تاجىريبە بولسىن.

دوس جوعالتۋ نەگە قالىپتى ۇدەرىس؟ ونىڭ بەس سەبەبى بار.

1. مۇددەنىڭ وزگەرۋى

جاس وسكەن سايىن ادامنىڭ ماقساتى، مۇددەسى ۇلعايا بەرەدى. جاس كۇنىڭدەگىدەي ءار نارسەگە قىزىقپايسىڭ. شىن باعالى دۇنيەنى تاباسىڭ. ونى ماڭداي تەرىڭمەن، بار ىنتا-ىقىلاسىڭمەن قورعايسىڭ. مۇنىڭ ءبارى اينالاڭداعى ادامدارمەن قارىم-قاتىناسىڭا اسەر ەتپەي قويماسى انىق. ءار ادامنىڭ بەلگىلى ءبىر ستاندارتى، دوستان كۇتەرى، دوسقا بەرەرى تياناقتالادى. ەستى ادام ومىرىنە كىمدى بولسا، سونى ەنگىزە بەرمەيدى. ەسەيگەن سايىن ومىرىڭدە ءار ءسوزىڭدى، ءىسىڭدى باعالايتىن جاندار كوبەيەدى. مۇنداي جاندار كوزقاراسىڭ سايكەسپەگەن ەسكى دوستاردىڭ ورنىن باسادى. مۇندايعا تاڭ قالۋعا بولا ما؟

2. تاجىريبە جينايسىڭ

جاس وسكەن سايىن ادام تاجىريبەلى بولا باستايدى. سەنىڭ تاجىريبەڭ قانداي اداممەن دوس بولۋدى، كىممەن قارىم-قاتىناستى ساقتاپ قالۋدى، كىمنەن ىرگەڭدى بولەك سالعىڭ كەلەتىنىن سارالاۋعا سەپتەسەدى. كىمگە سەنۋگە بولاتىنىن، كىمنىڭ اۋزىنا ءسوز تۇرمايتىنىن ايىراسىڭ. كەي دوستىڭ دوستىعىنان دۇشپاننىڭ قاستىعى ارتىق ەكەنىن تۇسىنەسىڭ. ءبىر دوسىڭمەن ارادا ەشبىر ورتاق ءىس بولماسا، ونىمەن تەك ادەت بويىنشا عانا ارالاسساڭ، بالكىم ونى ەركىنە جىبەرگەن دۇرىس بولار؟ ءوز ءومىرىڭدى، ءوز ماقساتىڭدى تۇزەگەن ءجون ەمەس پە؟

3. اينالاڭمەن تياناقتى قارىم-قاتىناس قۇرۋ

ەسەيگەن سوڭ كەيبىر ەسكى دوستاردان ايىرىلاسىڭ. وعان بولا سالىڭ سۋعا كەتپەسىن. بۇدان بىلاي سەندە دوس بولمايدى دەگەن ءسوز ەمەس قوي. بالكىم، كەرىسىنشە بولار. ەسەيگەن سايىن ادامنىڭ تانىپ-بىلەتىن تاقىرىپ اياسى كەڭەيەدى، مۇددەسى وزگەرەدى، تالقىلايتىن جاڭا جەرلەر، قىزىقتى دۇنيەلەر تابىلا بەرەدى. وسىنىڭ ءبارىن ايتىپ-جەتكىزەر، ياكي تىڭدار قۇلاق تابىلماس دەيمىسىڭ؟ تابىلادى. كەيدە جاڭا دوستارمەن دوستىعىڭ الدەقايدا ماعىنالى، قىمبات، لايىقتى بولىپ شىعادى. ەسكى دوستاردىڭ اراسىندا تەك كەلەمەجدەۋ عانا قالىپ قويادى. وندايدا بار. ادامدار ساياحات تۋرالى تىڭداعاندى جاقسى كورەدى. وسى باعىتتا ءوزىڭدى دامىتقانىڭ ءجون ەمەس پە؟ سوندا جاڭا دوستارىڭ دا كوبەيە بەرەدى. ايتاتىن تاقىرىپ تا مولىنان بولماق.

4. ۋاقىت تاپشىلىعى

جاسىڭ كەلگەن سايىن ويىن-ساۋىققا، دۋ-دۋمانعا ۋاقىتىڭ از قالىپ بارا جاتقانىن تۇسىنەسىڭ. ەگەر جالپى قالىپ جاتسا. ماماندىعىڭا ساي نەمەسە باسقا دا مىڭداعان سەبەپتەرمەن ءومىرىڭ كەدەرگىسى كوپ جۇگىرىسكە اينالادى. سول كەزدە ۋاقىتتى باعالاۋ كەرەكتىگىن تۇسىنەسىڭ. نە نارسەنى دە ءوز ۋاقىتىندا جاساعان ابزال ەكەنىن بىلەتىن بولاسىڭ. اينالاڭداعى ادامدارعا دا وسى ەرەجەگە ساي قارايسىڭ. ءبىر كۇنى كىم سەنىڭ ۋاقىت بولگەنىڭە لايىق، ال كىم لايىق ەمەس ەكەنىن بايقايسىڭ.

5. وتىرىگى كوپ، شىنايىلىعى جوق جەردەن قاشاسىڭ

جاس كۇنىڭدە وتىرىك ايتقاندا تۇرعان نە بار؟ شىنايىلىقسىز دا ءومىر بار دەپ ويلاۋىڭ بەك مۇمكىن. ادەتتە بالا ازداپ وتىرىك قوسىپ سويلەگەندى جاقسى كورىپ تۇرادى. ياكي، تۇيمەدەيدى تۇيەدەي ەتىپ جەتكىزۋگە بەيىم كەلەدى. ەڭ جاقىن دوسىنا اڭگىمە ايتقاندا بوسپەلىگى باسىم ءتۇسىپ جاتادى. الايدا ەسەيگەن سايىن ادامنىڭ وتىرىككە ماجبۇرلىگى كەمىپ، جالعان دۇنيەگە جانى قاس بولا باستايدى. الداعاندى، ارباعاندى جەك كورەدى. ەكىجۇزدى اداممەن داۋلاسقاندا دا «اقىلدىڭ ءتىلىن» العاندى ءجون سانايتىن بولادى. ودان گورى ماعىنالى اڭگىمەنى تىڭداعان جانىڭا جاعاتىنىن بايقايسىڭ. بىرەۋدى رەنجىتەتىن، جانىنا قاياۋ سالاتىن بوس اڭگىمەنىڭ پايداسىز ەكەنىن باعامدايسىڭ. شاماڭ جەتكەنشە اينالاڭداعى ادامداردىڭ ماعىنالى، كەلەلى اڭگىمە ايتا الاتىندىعىن باعالاي تۇسەسىڭ. جالپى كەلەشەككە وڭ كوزبەن قاراپ، ودان قورىقپايتىن بولاسىڭ.

ەڭ باستىسى ءوزىڭدى باعالا. ۋاقىتىڭدى باعالا. سوندا ءومىرىڭنىڭ كەلەسى ايالداماسىنا الدەقايدا تاجىريبەلى، كورەگەن بولىپ جەتەسىڭ.

higherperspectives.com

اۋدارعان شىنار ءابىلدا