دونورلىق جۇرەكتى ساقتايتىن وتاندىق قۇرىلعى پايدا بولدى

دونورلىق ورگاندى 1 تاۋلىك بويى ساقتاۋعا مۇمكىندىك تۋدى، دەپ حابارلايدى 24KZ.

وتاندىق كارديوحيرۋرگتار وسىنداي جاعىمدى جاڭالىعىمەن ءبولىستى. دالىرەك ايتقاندا، اعزانى ترانسپلانتاتسيالاۋعا ارنالعان بىرەگەي قۇرىلعى ويلاپ تاپتى. قازىر الەمدە ونىڭ تەڭدەسى جوق. جاڭا اپپارات كلينيكاعا دەيىنگى سىنامادان وتكەن. دارىگەرلەر تاياۋ بولاشاقتا مىڭداعان ادامنىڭ ءومىرىن ۇزارتۋعا ءۇمىت بارىن ايتتى.

«الەم» اتتى قۇرىلعىنى تانىستىرۋ راسىمىنە ءبىزدىڭ تىلشىلەرىمىز دە قاتىستى. بۇعان دەيىن دارىگەرلەرىمىز اعزانى ترانسپلانتاتسيالاۋ ءۇشىن كۇتىپ ۇستاۋى قىمباتقا تۇسەتىن امەريكالىق قۇرىلعىنى قولدانىپ كەلدى. ورگان 4-6 ساعات ىشىندە تاسىمالدانىپ ۇلگەرسە عانا جارامدى بولىپ ەسەپتەلەتىن. ەندى دونورلىق جۇرەكتى الىس قاشىقتىقتان جەتكىزىپ، وپەراتسيانى ءساتتى ورىنداۋعا مۇمكىندىك ارتتى. ونى 24 ساعاتقا دەيىن ساقتاۋعا وسى وتاندىق اپپارات كومەكتەسەدى. ماماندار بۇل كارديوحيرۋرگيا سالاسىنداعى الەمدىك سەرپىلىس ەكەنىنە سەنەدى.

يۋريي پيا، UMC باسقارما ءتوراعاسى:

- ەلىمىزدىڭ اۋماعى ۇلكەن، حالىق سانى از، ال قالالار اراسىنداعى اراقاشىقتىق الشاق بولعاندىقتان، ۋاقىت جوعالتىپ، ءتيىستى دونورلىق اعزانى الۋ وتە قيىنعا سوعادى. بىردە پاۆلوداردان دونورلىق جۇرەكتى جەتكىزۋ قاجەت بولىپ، قولايسىز اۋا رايى سالدارىنان ۋاقىتتى سوزىپ الدىق. وپەراتسيالىق زالدا دونورلىق ورگاندى جاساندى قان اينالىمى اپپاراتىنا قوسۋ جايىندا وي كەلدى. وسىلايشا، 2017 -جىلى «جۇرەك ورتالىعى» قورىمەن بىرلەسىپ، وسى جوباعا كىرىسىپ كەتتىك.

ەلدە 4 مىڭعا جۋىق ناۋقاس اعزا اۋىستىرۋ وپەراتسياسىنا مۇقتاج. 80 مىڭعا جۋىق ادامعا سوزىلمالى جۇرەك اۋرۋى دياگنوزى قويىلعان. ونىڭ 10% جۋىعىنا شۇعىل كومەك قاجەت. جاڭا اپپارات دونور جۇرەگىنىڭ قاعىسىن توقتاتپايدى. جاساندى قان اينالىمى مەن قاجەتتى تەمپەراتۋرانى قامتاماسىز ەتە الادى.

ماحاببات بەكبوسىنوۆا، UMC باسقارما ءتوراعاسىنىڭ ورىنباسارى:

- بىلتىر جۇرەك اۋرۋىنا شالدىققان 300 ەرەسەك ادامنىڭ ءحالى مۇشكىل بولدى. وكىنىشكە قاراي، ناۋقاستاردىڭ بارلىعى دەر كەزىندە كومەك الا المايدى، سەبەبى ەلدە بىرنەشە جىل بويى دونورلىق باعدارلامانىڭ ورىندالۋى وتە باياۋ ىسكە اسىپ جاتىر. بۇگىندە رەسمي دەرەككە ساي 137 ادام دونور اعزاسىن كۇتىپ ءجۇر، ولاردىڭ 10-ى - بالا.

تيمۋر لەسبەكوۆ، UMC كارديوحيرۋرگيا كلينيكالىق-اكادەميالىق دەپارتامەنتىنىڭ ديرەكتورى:

- بۇل اپپاراتتى قۇراستىرعان توپتىڭ قۇرامىنا كىرۋ ءساتى ماعان بۇيىردى. قىسىلتاياڭ شاقتا بار تاجىريبەمىزدى جيناقتاپ، شەشۋشى قادام جاساعا بەل بۋدىق. تىڭ قۇرىلعىنىڭ بىرنەشە يننوۆاتسيالىق جەتىستىگى بار. جاڭا ادىستەمەنى كلينيكالىق تاجىريبەدە ءساتتى قولدانۋعا ءۇمىتتىمىز.

دارىگەرلەر اپپاراتتى بولاشاقتا دونورلىق وكپە، بۇيرەك، باۋىر ترانسپلانتاتسياسىنا دا قولدانۋدى جوسپارلاپ وتىر. ءتيىستى رۇقساتتاما راسىمدەرىنەن كەيىن قۇرىلعىنى كلينيكالىق سىناقتان وتكىزۋ كەزەڭى باستالادى. كارديوحيرۋرگتەر «ەلدەگى بارلىق دونورلىق ەمحانالاردى وسىنداي اپپاراتپەن قامتۋ ۇلكەن جەتىستىك بولار ەدى»، - دەگەن تىلەگىن جەتكىزدى.

اۆتورلارى: رۋحاني اسقار، مارات ديقانبايەۆ.

www.24.kz