دونور ەلدەر سيريالىقتارعا كومەكتەسۋ ءۇشىن تاعى 7,5 ميلليارد ەۋرو بولەدى

استانا. KAZINFORM - دونور ەلدەر بريۋسسەلدە وتكەن كونفەرەنسيادا ازاماتتىق سوعىس پەن تابيعي اپاتتاردان زارداپ شەككەن سيريالىقتارعا كومەك كورسەتۋ ءۇشىن تاعى 7,5 ميلليارد ەۋرو بولۋگە كەلىستى، دەپ جازادى DW.

دۇيسەنبى، 27-مامىردا بريۋسسەلدە وتكەن كونفەرەنسيادا دونور ەلدەر سيريا حالقى مەن كورشى ەلدەردەگى سيريالىق بوسقىندارعا كومەك كورسەتۋ ءۇشىن تاعى 7,5 ميلليارد ەۋرو بولۋگە كەلىستى. 2024 -جىلى 3,8 ميلليارد ەۋرو گرانت تۇرىندە، تاعى 1,2 ميلليارد ەۋرو كەيىنىرەك بولىنەدى. 2,5 ميلليارد ەۋرو نەسيە تۇرىندە بەرىلەدى، دەپ حابارلايدى Associated Press.

گەرمانيا وسى سومانىڭ 1,053 ميلليارد ەۋروسىن بولەدى، دەدى كونفەرەنسيادا گەرمانيا سىرتقى ىستەر مينيسترلىگىنىڭ مەملەكەتتىك ءمينيسترى توبياس ليندنەر. بۇل قاراجات 2023 -جىلدىڭ اقپانىندا ايماقتا بولعان جانە 59 مىڭ ادامنىڭ، ونىڭ ىشىندە 6 مىڭى سيريادا قازا تاپقان جانتۇرشىگەرلىك جەر سىلكىنىسىنىڭ سالدارىن جويۋعا جۇمسالادى.

سيرياداعى ازاماتتىق سوعىس 2011 -جىلى باستالعان. سوعىس كەزىندە 500 مىڭعا جۋىق ادام قازا تاۋىپ، دەرلىك 23 ميلليون تۇرعىنى بار ەلدىڭ جارتىسىنا جۋىعى ۇيلەرىن تاستاپ كەتۋگە ءماجبۇر بولدى. قازىر كورشىلەس تۇركيا، ليۆان جانە يوردانيا مەملەكەتتەرىندە 5,7 ميلليون سيريالىق بوسقىن بار. باشار اساد رەجيمى مەن ونىڭ قارسىلاستارى اراسىنداعى قاقتىعىستى ىشكى ساياسي جولمەن شەشۋ پەرسپەكتيۆاسى ءالى دە كورىنبەي تۇر.

2023 -جىلى بريۋسسەلدە وتكەن دونورلىق كونفەرەنسيادا سيريالىقتار ءۇشىن 5,6 ميلليارد ەۋرو جينالدى.

گەرمانيا بوسقىنداردىڭ سيرياعا كۇشتەپ قايتارىلۋىنا قارسى

جاقىندا ەۋروپالىق وداقتىڭ سەگىز ەلى - اۆستريا، گرەكيا، دانيا، يتاليا، كيپر، مالتا، پولشا جانە چەحيا سيرياداعى جاعدايدى قايتا قاراۋعا شاقىردى. ولاردىڭ پىكىرىنشە، ەلدە ءالى «تولىق ساياسي تۇراقتىلىققا» قول جەتكىزىلمەگەنىمەن، سيريانىڭ كەيبىر ايماقتارى بوسقىنداردىڭ ول جاققا ورالۋى ءۇشىن قازىردىڭ وزىندە قاۋىپسىز دەپ ساناۋعا بولادى. بۇل يدەيانى سيريادان كەلگەن 780 مىڭعا جۋىق بوسقىن شاعىن اۋداندا تۇراتىن ليۆان ۇكىمەتى قولداپ وتىر.

دەگەنمەن حالىقارالىق قىزىل كرەست كوميتەتى سياقتى حالىقارالىق گۋمانيتارلىق ۇيىمدار قازىر سيريالىق بوسقىنداردىڭ جاپپاي ورالۋىنا جاعداي جوق دەپ ەسەپتەيدى. ليندنەر سونداي-اق بريۋسسەلدەگى كونفەرەنسيادا گەرمانيا ۇكىمەتىنىڭ ەلدەن قاشقان سيريالىقتاردى كۇشتەپ ەلىنە قايتارۋعا قارسى ەكەنىن ايتتى.

«ءبىز انىق ايتۋىمىز كەرەك: سيرياعا قايتۋ ەلدەگى جاعداي قاۋىپسىز بولعان كەزدە عانا مۇمكىن بولادى جانە تەك ەرىكتى تۇردە جۇزەگە اسادى»، - دەپ كەلتىرەدى dpa باسپاسى ونىڭ ءسوزىن.

اۆتور

جاراسقان نۇرىبايەۆ