دونالد ترامپ رەسمي تۇردە پرەزيدەنتتىككە رەسمي ۇمىتكەر اتاندى

استانا. kazinform - بەيسەنبى كۇنى رەسپۋبليكالىق پارتيانىڭ ۇلتتىق قۇرىلتايىنىڭ سوڭعى كۇنىندە دونالد ترامپ ميلۋوكيدە سالتاناتتى ءسوز سويلەپ، جينالعانداردىڭ قوشەمەتىنە يە بولدى. سونىمەن قاتار، پرەزيدەنتتىككە كانديداتۋراسىن رەسمي تۇردە قابىلدادى، دەپ جازادى ABC News.

ترامپ جەرگىلىكتى ۋاقىت بويىنشا ساعات 22:30 دا ساحناعا شىعىپ، سەنبى كۇنى پەنسيلۆانياداعى شابۋىلدان كەيىن العاش رەت رەسپۋبليكالىق پارتيانىڭ پرەزيدەنتتىگىنە كانديدات رەتىندە ۇسىنىلۋدى قابىلدادى.

«مەن امەريكانىڭ جارتىسى ەمەس، بۇكىل امەريكا اتىنان ۇمىتكەرمىن، ويتكەنى امەريكانىڭ جارتىسى ءۇشىن جەڭىسكە جەتۋ ەشقانداي جەڭىس اكەلمەيدى»، - دەدى دونالد ترامپ.

ترامپ سەنبى كۇنگى شابۋىلدان كەيىن قولداۋ كورسەتكەندەرگە العىس ايتتى. د. ترامپ پەنسيلۆانياداعى اتىس كەزىندە جينالعانداردىڭ ۇرەيلەنىپ قاشىپ كەتپەگەنىن اتاپ ءوتتى.

ولاردىڭ كوپشىلىگى ەرلىك كورسەتىپ، سنايپەردىڭ قايدا بولۋى مۇمكىن ەكەنىن ىزدەي باستادى. مۇنى ۇمىتكەردىڭ ارتىندا تۇرعان توپقا قاراپ كورۋگە بولادى. ەشكىم جۇگىرمەدى، سونىڭ ارقاسىندا كوپتەگەن ادام امان قالدى.

د. ترامپتىڭ ءسوزى 1 ساعات 33 مينۋتقا سوزىلدى. بۇل تاريحتاعى پرەزيدەنتتىككە ۇسىنىلاتىن ەڭ ۇزاق ءسوز بولدى. بۇعان دەيىنگى رەكورد 1 ساعات 15 مينۋتتى قۇراعان، ونى 2016 -جىلى دا د. ترامپ ورناتقان بولاتىن.