دونالد ترامپ ۋكرايناداعى قاقتىعىسقا كىنالى ءۇش تۇلعانى اتادى

استانا. KAZINFORM – ا ق ش پرەزيدەنتى دونالد ترامپ ۋكرايناداعى سوعىس ارەكەتتەرىنىڭ باستالۋىنا ءۇش نەگىزگى تۇلعانى كىنالى دەپ اتادى.

ولاردىڭ قاتارىندا رەسەي پرەزيدەنتى ۆلاديمير پۋتين، ا ق ش- تىڭ ەكس-پرەزيدەنتى دجو بايدەن جانە ۋكراينا باسشىسى ۆلاديمير زەلەنسكي بار.

سۋمى قالاسىنا جاسالعان سوققى تۋرالى پىكىر بىلدىرگەن ترامپ بۇل ارەكەتتى «قاتەلىك» دەپ باعالاپ:

نەگىزگى قاتەلىك - سوعىستىڭ باستالۋىنا جول بەرۋ بولدى، - دەپ مالىمدەدى.

ونىڭ ايتۋىنشا، ەگەر ءوزى پرەزيدەنت بولعاندا، بۇل قاقتىعىس مۇلدە ورىن الماس ەدى. ترامپ بايدەننىڭ سوعىستى بولدىرماۋعا مۇمكىندىگى بولعانىن ايتىپ، مۇناي باعاسىن تومەندەتۋ ارقىلى جاعدايدى تۇراقتاندىرۋعا بولار ەدى دەپ ەسەپتەيدى.

بايدەن دە، زەلەنسكي دە بۇل سوعىستى توقتاتا الار ەدى. ال پۋتين ونى باستاماۋى كەرەك ەدى. ياعني ءبارى دە بەلگىلى ءبىر دەڭگەيدە كىنالى، - دەدى ا ق ش- تىڭ پرەزيدەنتى.

سونداي-اق، ترامپ ۋكراينا پرەزيدەنتى ۆلاديمير زەلەنسكيدىڭ ا ق ش- تان 15 ميلليارد دوللارعا 10 Patriot اۋە شابۋىلىنا قارسى قورعانىس جۇيەسىن ساتىپ الۋعا دايىن ەكەنىن مالىمدەگەنىن دە اتاپ ءوتتى. بۇل جۇيەلەردى ساتىپ الۋ ەۋروپالىق سەرىكتەستەردىڭ قارجىلىق كومەگىمەن جۇزەگە اسىرىلماق.

ءسىز سوعىس باستاعاندا، ونى جەڭۋگە مۇمكىندىگىڭىز بار ەكەنىن ءبىلۋىڭىز كەرەك. ءسىز وزىڭىزدەن 20 ەسە كۇشتى قارسىلاسپەن سوعىسىپ، باسقالار سىزگە زىمىران بەرەدى دەپ ۇمىتتەنبەۋىڭىز كەرەك، - دەدى ول.

Truth Social الەۋمەتتىك جەلىسىندە ترامپ قازىرگى رەسەي مەن ۋكراينا اراسىنداعى جانجالدى «بايدەننىڭ سوعىسى» دەپ اتاپ، ءوزىنىڭ پرەزيدەنتتىك كەزەڭىندە مۇنداي شيەلەنىس بولماعانىن العا تارتتى.

مەن كەلگەندە، ءتورت جىل بويى مۇنداي ماسەلە تۋىنداعان جوق. قازىر بۇل قاقتىعىستى دەرەۋ توقتاتۋ كەرەك. بۇل كوپتەگەن ادامداردىڭ ءومىرىن ساقتاپ قالۋعا كومەكتەسەدى، - دەپ تۇيىندەدى ول.