دونالد ترامپ ءوزارا تاريفتەر تۋرالى جارلىققا قول قويدى

استانا. KAZINFORM - دونالد ترامپ ا ق ش ونىمدەرىنە سالىق سالاتىن بارلىق ەلدەرگە جاۋاپ تاريفتەرىن ەنگىزۋ تۋرالى جارلىققا قول قويدى، دەپ حابارلايدى euronews.

اق ءۇي باسشىسى جاڭا شارالار ۆاشينگتونمەن ساۋداداعى تەڭگەرىمسىزدىكتى جويۋعا باعىتتالعانىن ايتتى.

- ەگەر ءسىز ءوز ونىمدەرىڭىزدى ا ق ش- تا شىعارساڭىز، ەش سالىق بولمايدى. مەن ادىلەتتىلىك ءۇشىن ءوزارا تاريفتى، ياعني ەلدەر امەريكا قۇراما شتاتتارىنان الاتىن كەز كەلگەن الىمداردى، ءبىز ولاردان الاتىن بولامىز دەپ شەشتىم. ارتىق تا، كەم دە ەمەس. باسقاشا ايتقاندا، ولار بىزدەن سالىق نەمەسە باج سالىعىن الادى، ال ءبىز ولاردان ءدال سول سالىقتى نەمەسە باجدى الامىز، وتە قاراپايىم، - دەدى ترامپ.

ماماندار بۇل قادام ەل ىشىندە ەكونوميكالىق تۇراقسىزدىق تۋدىرۋى مۇمكىن دەپ سانايدى. ولار ەگەر باسقا ەلدەر وزدەرىنىڭ تاريفتەرى مەن ساۋدا كەدەرگىلەرىمەن جاۋاپ بەرسە، تۇتىنۋشىلار ءۇشىن باعا وسەتىنىن العا تارتادى.

ءبىراق ترامپ ءوزىنىڭ جوسپارى جۇمىس ىستەيتىنىنە وپتيميستىك كوزقاراستا.

- ءىس جۇزىندە نە بولاتىنىن ەشكىم بىلمەيدى، ءبىز تەك بۇرىن كورمەگەن دەڭگەيدە جۇمىس ورىندارى اشىلاتىنىن بىلەمىز. ءبىز پايىزدىق مولشەرلەمەلەر بولىپ جاتقان وقيعالارعا بايلانىستى تومەندەيدى دەپ ويلايتىنىمىزدى بىلەمىز جانە ولار تاريفتەرمەن قاتار جۇرەدى، - دەدى دونالد ترامپ.

سوڭعى اپتالاردا ا ق ش پرەزيدەنتى تاريفتەردى ەنگىزۋ ارقىلى وداقتاستارى مەن باسەكەلەستەرىنە قارسى شىقتى. كوپتەگەن ەل ترامپ ءوزىنىڭ قوقان-لوقىسىن ورىندايتىن بولسا، وعان قارسى سوققى بەرۋ ءۇشىن قارسى شارالاردى دايىنداپ جاتىر. ساراپشىلاردىڭ ايتۋىنشا، بۇل ساياسات الەمدى ەكونوميكالىق ءوسىمنىڭ تومەندەۋ قاۋپى بار جاپپاي ساۋدا سوعىسىنا يتەرمەلەيدى.

ترامپ اليۋميني مەن بولات يمپورتىنا % باج سالىعىن ەنگىزگەن ەدى.