دومينيكان رەسپۋبليكاسىنىڭ پرەزيدەنتىنەن جەكە شاقىرتۋ العان قازاقستاندىق پوليگلوت ومار اليەۆپەن سۇحبات

استانا. KAZINFORM - قازاقستاندىق پوليگلوت ومار اليەۆ - الەۋمەتتىك جەلى جۇلدىزى. الماتى مەديتسينالىق كوللەدجىنىڭ ستۋدەنتى الەمنىڭ كوپتەگەن تىلىندە بەينەروليك ءتۇسىرۋ ارقىلى تانىلدى.

ونىڭ تانىمالدىلىعى دومينيكان رەسپۋبليكاسىنىڭ پرەزيدەنتى لۋيس ابينادەرگە دەيىن جەتتى. ومار اليەۆ لۋيس ابينادەردىڭ شاقىرتۋىن قابىل الدى ما؟

Massaget.kz ءتىلشىسى قازاقستاندىق پوليگلوتپەن سۇحباتتاستى.

ومار اليەۆ ادەتتە ۆيدەولارىندا كوپ جالاۋشانىڭ ىشىنەن كەزدەيسوق بىرەۋىن تاڭدايدى دا، سول ەل تىلىندە سويلەيدى. سونداي ۆيدەولاردىڭ بىرىندە وعان دومينيكان رەسپۋبليكاسىنىڭ تۋى تۇسەدى: ول يسپان تىلىندە وسى ەلگە بارعىسى كەلەتىنىن جانە ولاردىڭ ۇلتتىق تاعامىنىڭ ءبىرىن جەپ كورگىسى كەلەتىنىن ايتادى.

ەڭ قىزىعى، بۇل ۆيدەونى دومينيكان رەسپۋبليكاسىنىڭ پرەزيدەنتى كورىپ، پوليگلوت پاراقشاسىنا جازىلادى. سونداي-اق ول ۆيدەو استىنا پىكىر قالدىرادى. پرەزيدەنت ومار جاعاجايلاردان، اس ۇيدەن ءلاززات الا الاتىنىن جازادى. لۋيس ابينادەر ومار سول جاقتا قالىپ قويعىسى كەلۋى مۇمكىن ەكەنىن دە جازدى.

ومار اليەۆ - الماتى قالاسىنداعى مەديتسينالىق كوللەدجدىڭ 2-كۋرس ستۋدەنتى. ول ءتىس تەحنيگى ماماندىعىندا وقيدى.

«مەن 6 ءتىلدى جاقسى بىلەمىن: قازاق، ورىس، كۇرد، تۇرىك، ءازىربايجان جانە اعىلشىن تىلدەرى. ال باسقا تىلدەردە بەينەروليك تۇسىرەر الدىندا قارىنداسىم - ديلان ەكەۋمىز دايىندالامىز، جاتتايمىز. تۇسىرىلىمگە دەيىن مەن سول ەل جايلى زەرتتەيمىن، ولار نەنى جاقسى كورەتىنى جانە قانداي تاماق جەيتىندەرى جايلى وقىپ بىلەمىن»، - دەيدى ول.

قازاقستاندىق پوليگلوت قازىر بەنگال جانە كحمەر تىلدەرىن مەڭگەرىپ جاتىر.

«تىلدەردى مەڭگەرۋگە دەگەن قىزىعۋشىلىعىم بالالىق شاقتا باستالدى. مەن تىلدەردى ادەيى مەڭگەرىپ باستاعان جوقپىن. بالالىق كەزىمدە انام تۇرىك جانە ءازىربايجان تىلدەرىندە سەريالدار قارايتىن. كەيىن الەۋمەتتىك جەلىدەگى پاراقشالارىمدى جۇرگىزەر الدىندا «مەنىڭ قانداي داعدىلارىم بار، قولىمنان نە كەلەدى» دەپ ويلاندىم. «مەن بىرنەشە ءتىل بىلەمىن، نەگە باسقا تىلدەردە دە سويلەپ، ۆيدەو تۇسىرمەسكە» دەگەن يدەيا كەلدى. مۇنداي ۆيدەولارىم جەلىدە جىلدام تاراپ كەتتى. سوندىقتان مەن ونى دامىتۋدى قولعا الىپ، اۋديتوريامدى كەڭەيتكىم كەلدى»، - دەيدى ومار اليەۆ.

ومار اليەۆ باسقا ەلدەرگە شىعۋعا قۇجاتتارمەن قيىندىقتار تۋىنداپ تۇرعانىن ايتتى.

«مەن دومينيكان رەسپۋبليكاسىنىڭ پرەزيدەنتىنەن شاقىرتۋ العان بويدا ونىڭ جەكەسىنە جازدىم. العىسىمدى ءبىلدىردىم جانە «ءسىزدىڭ ەلگە بارامىن دەپ ۇمىتتەنەمىن» دەپ جازدىم. ءبىراق ءبىر ۇلكەن پروبلەما تۋىنداپ تۇر. ماعان قازاقستان ازاماتتىعىن بەرمەي جاتىر. مەنىڭ اتا-انام ءازىربايجاننان، ءبىراق مەن قازاقستاندا دۇنيەگە كەلدىم. بۇل سۇراقتى ءالى دە شەشىپ جاتىرمىز. وسى نارسە ماعان قازىر قيىندىقتار تۋىنداتىپ وتىر. سەبەبى مەن جەكە كۋالىك، پاسپورت الا الماي وتىرمىن. مەن وسى ەلدە دۇنيەگە كەلدىم، وسى ەلدىڭ ازاماتىمىن، ءبىراق ازاماتتىعىن الا الماي وتىرمىن. اتا-انامنىڭ قازاقستاندا ءومىر ءسۇرىپ جاتىرعاندارىنا 20 جىلدان استى، ولاردا تەك تۇرۋعا ىقتيارحات قانا بار. مەن ارينە دومينيكان رەسپۋبليكاسىنا بارعىم كەلەدى، ءبىراق ازىرگە قۇجاتتارعا بايلانىستى بارا المايمىن»، - دەيدى ومار.

ومار اليەۆتىڭ Instagram-پاراقشاسىندا 3,5 ميلليوننان اسا، ال TikTok تا 33 ميلليونداي وقىرمانى بار. ول 60 قا جۋىق ەلدىڭ تىلىندە بەينەروليكتەر تۇسىرگەن.