دومبىرانى كورىپ، وزگە اسپاپتاردى مەنسىنبەي قالدىم - امەريكالىق مۋزىكانت

استانا. قازاقپارات - الەۋمەتتىك جەلىدە اداي كۇيىن اۋەلەتكەن امەريكالىق استاناعا كەلدى. دجەف گيەش ەسىمدى ازامات قازاقتىڭ 20 دان اسا كۇيىن دومبىرادا ەمىن-ەركىن وينايدى. امەريكالىق ازامات ءوزىنىن ۇستازىمەن بىرگە ەلوردادا كونسەرت وتكىزبەك.

كەشتە ونەرپازدار قازاقتىڭ ۇلتتىق ونەرىمەن ۇيلەسكەن روك-ن-رولل باعىتىنداعى تۋىندىلاردى پاش ەتەدى. امەريكالىق مۋزىكانتتىڭ «بالبىراۋىن» كۇيىن ۇيرەنۋگە ەكى اپتا ۋاقىتى كەتكەن. ال حالىق كۇيى «نار اعاشىن» ءتىپتى 1 كۇندە مەڭگەرىپ العان. 50 جاستاعى دجەفف گەرش ەكى جىلدان بەرى قازاقتىڭ قارا دومبىراسىن جانىنا سەرىك ەتىپ كەلەدى.

ول: «دومبىرانى كورىپ، وزگە اسپاپتاردى مەنسىنبەي قالدىم»، - دەيدى.

دجەف گەرش، امەريكالىق مۋزىكانت:

- العاش اداي كۇيىن الەۋمەتتىك جەلىدەن كورىپ قالدىم. ماعان قاتتى ۇنادى. مەن وسىنى تۇبىندە ۇيرەنبەي قويمايمىن دەپ الدىما ماقسات قويدىم. مىنە مەڭگەرىپ تە الدىم. مەن دومبىرادان بولەك گيتارا مەن شاميسەندە دە ويناي الامىن. الايدا قازاقتىڭ ءتول اسپابىن ۇيرەنگەلى مەنىڭ شاميسەنگە دەگەن قىزىعۋشىلىعىم جوعالدى. ەندى قازاقتىڭ بارلىق كۇيىن، ونىڭ تاريحىن بىلگىم كەلەدى. ايتپاقشى قازاق تىلىنە دە دەن قويدىم.

ءيا، امەريكالىق ازاماتقا دومبىرا مەن ءتىلدى قازاقتىڭ قارشاداي عانا قىزى ۇيرەتىپ ءجۇر. «World Dombyra Academy» جوباسىنىڭ جەتەكشىسى ايگەرىم مىرزاحمەت تەك شەتەلدىكتەرگە عانا دومبىرادا ءدارىس بەرەدى. ونىڭ دجەفتان بولەك الەمنىڭ 30-دان اسا ەلىندە شاكىرتى بار.

ايگەرىم مىرزاحمەت، «World Dombyra Academy» مەكتەبىنىڭ نەگىزىن قالاۋشى:

- شەتەلدىكتەرگە دومبىرانى اعىلشىن تىلىندە ۇيرەتىپ، ءبىزدىڭ قازاق مادەنيەتىن ناسيحاتتاپ ءجۇرمىن. بارلىق وقۋشىلارىم ءارتۇرلى كونتينەنتتەن بولعاندىقتان ونلاين ۇيرەنەمىز نەمەسە جازىلعان ساباقتار ارقىلى. قازىر امەريكادان كەلگەن دجەف شاكىرتىم كوزبە كوز ۇيرەنۋدە. نەگىزى ۇيرەنۋ قيىن ەمەس. شەت ەلدىك ازاماتتاردا ۇمتىلىس كوپ، تالاپتارى كوپ. قاتتى ۇيرەنگىسى كەلەدى. بىرنەشە پراكتيكا جاسايدى.

وسىعان دەيىن دومبىرانى تەك الەۋمەتتىك جەلىدەن ۇيرەنگەن دجەفف استاناعا كەلدى. مۇنداعى ماقسات قازاقتىڭ ءتول ونەرىمەن جاقىنىراق تانىسۋ. سونداي- اق ول ۇستازى ايگەرىممەن بىرگە ەلوردادا جەكە كوتسەرت وتكىزبەك.

24.kz