دومبىرا مونۋمەنتى، باسپانا: ەرەكشە سىيلىقتار جاساعان 20 جىلدىق تۇلەكتەر جۇرتتى ءتانتى ەتتى
استانا. KAZINFORM – الەۋمەتتىك جەلىدە مەكتەپ بىتىرگەنىنە 20 جىل بولعان تۇلەكتەردىڭ اۋىلعا، مەكتەپكە جاساعان تارتۋلارىنىڭ ۆيدەوسى تاراپ كەتتى. جەلىدە تاراعان وسىنداي ۆيدەولارعا شولۋ جاسالدى.
Facebook جەلىسىندە تاراعان ۆيدەولاردىڭ بىرىندە تۇلەكتەر اۋىلعا دومبىرا ۇلگىسىندەگى مونۋمەنت سىيعا تارتقانى كورىنەدى. جەلى قولدانۋشىلارى بۇل باتىس قازاقستان وبلىسى جالپاقتال اۋىلى ەكەنىن جازىپ جاتىر.
«مەكتەپ بىتىرگەندەرىنە 20 جىل بولعان تۇلەكتەر تارتۋ ەتكەن»، - دەپ جازدى الەۋمەتتىك جەلىدەگىلەر.
كوپشىلىك تۇلەكتەردىڭ تاپقىرلىعىنا ريزا بولعان.
«قازاق، قازاق ەمەس. ناعىز قازاق - دومبىرا»، «قانداي كەرەمەت، قولدارىڭىز التىن، ەلىمىزدىڭ رۋحىن كوتەرىپ، امان بولىڭىزدار، دومبىرانى كورىپ، كۇش قۋات پايدا بولادى ەكەن، قازاق ەلىمىز امان بولسىن»، «تۋعان جەرگە تۋىڭدى تىك» دەگەن. تۇلەكتەردەن كەرەمەت تارتۋ ءارى تاريح»، «قازاقتىڭ كيەلى دومبىراسىنىڭ قاسيەتىن اسقاقتاتقان ادال جۇرەكتەرىڭنەن اينالايىن، تۇلەكتەر! شەبەرلىكتەرىڭ شىڭدالا بەرسىن»، - دەپ جازدى جەلى قولدانۋشىلارى.
ەندى ءبىر كادرلاردا تۇلەكتەر مۇقتاج وتباسىن قۋانىشقا بولەگەنى كورىنەدى. تۇلكىباس اۋدانىنىڭ تۇلەكتەرى قايىرىمدىلىق جاساپ، 7 بالالى جانۇياعا 5 بولمەلى، قوراسى مەن سارايى قاراستىرىلعان باسپانا سىيلادى. باسپانا اباي اتىنداعى ءبىلىم وشاعى، ب. سادىقوۆ جانە لومونوسوۆ مەكتەبىنىڭ 20 جىل بۇرىن تۇلەپ ۇشقان جاستارىنىڭ اتىنان بەرىلگەن.
«ورتادان 10 ميلليون تەڭگەدەن اسا قاراجات جينالعان. 9 ميلليون تەڭگەسىنە ءۇي الىپ، ونى تولىق جوندەۋدەن وتكىزگەن. ءىشىن قاجەت جيھاز- تەحنيكالارمەن جابدىقتاپ تا بەرىپ وتىر. ساۋاپتى ءىستى ۇران قىلعان تۇلكىباستىقتار سول باسپانانىڭ اۋلاسىندا قۇدايى اس بەرىپ، ابدۋلايەۆتار وتباسىنا تابىستادى. بۇل وتباسى وسى كەزگە دەيىن جالدامالى پاتەردە تۇرىپ كەلگەن. شارا سوڭىندا ءداستۇر بويىنشا 2004 -جىلعى مەكتەپ تۇلەكتەرى ەستافەتانى 2005 -جىلعى تۇلەكتەرگە تابىستادى»، - دەپ جازىلعان ontustiktv.kz مالىمەتىندە.
تۇركىستان وبلىسى قازىعۇرت اۋدانى ساراپحانا اۋىلدىق وكرۋگىنىڭ 1987 -جىلى دۇنيەگە كەلگەن ازاماتتارى دا اۋىل تۇرعىنىنا باسپانا سالىپ بەرگەن. مەكتەپ بىتىرگەنىنە 20 جىل بولعان تۇلەكتەر اۋىلدا مۇنداي ءۇردىس ءۇش جىلدان بەرى داستۇرگە اينالعانىن ايتتى.
otyrar.kz-كە مالىمەتىنشە، ءبىلىم ۇياسىنان تۇلەپ ۇشقانىنا 20 جىل بولعان تۇلەكتەر اۋىل اكىمى، يمامىمەن، اقساقالدارمەن اقىلداسىپ، ناقتى قاي وتباسى باسپاناعا مۇقتاج ەكەنىن انىقتاپ، شەشىم قابىلداعان. ناتيجەسىندە تاڭداۋ 1981 -جىلى دۇنيەگە كەلگەن اۋىل تۇرعىنى باۋىرجان قيلىباي ۇلىنىڭ وتباسىنا تۇسكەن. 43 جاستاعى ەر ازامات - ءۇش بالانىڭ اكەسى. وتە ەڭبەكقور، ءارتۇرلى قۇرىلىستا جالدامالى جۇمىس ىستەپ، وتباسىن اسىراپ ءجۇر ەكەن.
«ءبىزدىڭ اۋىلدىق وكرۋگتە بەس مەكتەپ بار. ءار مەكتەپتىڭ تۇلەكتەرى ءوزارا اقىلداسا كەلە وسىنداي شەشىمگە كەلدى. اراسىندا بەلسەندىلەرى جينالىپ، وسى يگى ءىستى قولعا الدىق. ءۇي قۇرىلىسىن بىلتىر كۇزدە باستادىق. ارامىزدا قولىنان قۇرىلىس كەلەتىن جىگىتتەر بار. ولار ءبىر تيىنسىز وزدەرى ءۇيدىڭ توبەسىن جاپتى. ەندى ءبىر جىگىتتەرىمىز كاسىپ سالاسىندا ءجۇر، ولار قۇرىلىس ماتەريالدارىنا دەمەۋشىلىك ەتتى. ءۇيدىڭ ىرگەتاسىن قۇيۋ، قابىرعاسىن كوتەرۋ دەگەن سياقتى جۇمىستارعا ورتادان اقشا جيناپ، باسپانانى سالىپ بىتتىك. اۋىل اكىمى دە 1987 -جىلعى ازامات. ول دا وسى باسپانانىڭ سالىنۋىنا بەلسەندىلىك تانىتتى. جەر ءبولۋ، قۇجاتى جاعىنان ۇلكەن كومەگى ءتيدى. كەشەگى جەكسەنبىدە باسپانا كىلتىن تابىستادىق. شىنى كەرەك، ول ازامات قۋانعانىنان ءتىپتى كوزىنە جاس الىپ، العىسىن جاۋدىردى. تەك ءوزى ەمەس، ونىڭ سىنىپتاستارى دا بىزگە العىستارىن ايتتى»، - دەدى تۇلەكتەر.
تۇلەكتەر بەس بولمەلى باسپانانى سالىپ قانا قويماي، ءىشىن تۇرمىسقا قاجەت جيھاز جانە تەحنيكالارمەن تولىقتاي قامتىعان.
سونداي-اق، مەكتەپ بىتىرگەنىنە 20 جىل بولعان تۇلەكتەردىڭ ءبىر بولىگى اۋىل مەشىتى جانىنان قىسى-جازى اۋىزاشار نەمەسە اس بەرۋگە ارنالعان جابىق اس ءۇي سالىپ جاتقانى بەلگىلى بولدى.
بۇل تۇلەكتەر قايىرىمدىلىق جاساپ جاتقان ءبىرىنشى وقيعا ەمەس. تۇركىستان وبلىسى ورداباسى اۋدانى تەمىرلان اۋىلىنىڭ 2004 -جىلعى مەكتەپ بىتىرۋشىلەرى دە مۇقتاج وتباسىلاردىڭ بىرىنە باسپانا سىيلاۋدى جوسپارلاعان. مەكتەپ تۇلەكتەرى اۋدان ورتالىعىنداعى قوس قاباتتى تۇرعىن ۇيدەن ەكى بولمەلى پاتەر ساتىپ العان. كوپبالالى وتباسىعا جيھازدارىنا دەيىن الىپ بەرمەك. بۇل باسپانا اۋدانداعى جالعىزباستى انالاردىڭ بىرىنە تاپسىرىلادى.
«تەمىرلانداعى ەڭ مۇقتاج دەگەن جاندى تاڭداپ الدىق. ازىرشە ول وتباسى وزىنە جاسالعالى جاتقان توسىنسىيدان بەيحابار»، - دەدى تۇلەكتەر بۇعان دەيىن.
تۇلەكتەر سوڭعى قوڭىراۋ كۇنى ومىردەن وتكەن ۇستازدارى مەن سىنىپتاستارىنىڭ رۋحىنا قۇران باعىشتاۋ كەزىندە جالعىزباستى اناعا حابارلاسىپ، ءسۇيىنشى سۇراۋدى جوسپارلاعان.
سونىمەن قاتار، تۇركىستان قالاسىندا مەكتەپ بىتىرگەنىنە 20 جىل بولعان تۇلەكتەر دە يگى ىسكە مۇرىندىق بولعان. بەكزات شاعىناۋدانىنىڭ 1986 -جىلعى ازاماتتارى جيىرما جىلدىققا وراي باسپانا تارتۋ ەتتى.
تۇلەكتەر بىرنەشە جىل قاتارىنان مۇقتاج وتباسىلاردى قۋانتىپ، العىسقا بولەنىپ كەلەدى. ال بۇل جاناشىر جانداردىڭ تاراپىنان تارتۋ ەتىلگەن 17-باسپانا ەكەن. ولار 2020 -جىلى دۇنيەدەن وتكەن دوستارى جارقىنبەك وتەپوۆتىڭ وتباسىنا ءۇي سالىپ بەردى. باسپانا سوڭعى قوڭىراۋدان سوڭ سالتاناتتى تۇردە تابىستالعان.
Massaget.kz