دوكتورانتۋراعا ءتۇسۋ ەمتيحانىنا ءوتىنىش قابىلداۋ باستالدى

استانا. KAZINFORM - بۇگىن، 3 - شىلدەدە، دوكتورانتۋراعا ءتۇسۋ ەمتيحانىنا (د ت ە) قاتىسۋعا ءوتىنىش قابىلداۋ باستالدى. ول 2025 -جىلعى 3-تامىزىنا دەيىن جالعاسادى. ەمتيحاننىڭ ءوزى 4-20 -تامىز ارالىعىندا وتەدى. بۇل تۋرالى عىلىم جانە جوعارى ءبىلىم مينيسترلىگى حابارلادى.

- ءتۇسۋ ەمتيحانىنا قاتىسۋعا تىركەلۋ ق ر ع ج ب م ۇلتتىق تەستىلەۋ ورتالىعىنىڭ http://app.testcenter.kz/ سايتىندا وتەدى. دوكتورانتۋراعا ءتۇسۋ ءۇشىن تەك ءبىر جوعارى وقۋ ورنى مەن ءبىلىم بەرۋ باعدارلامالارىنىڭ ءبىر توبىن عانا تاڭداۋعا بولاتىندىعىن ەسكەرتەمىز. ەگەر تۇسۋشىگە بەرىلگەن وتىنىشكە (تەستىلەۋدى تاپسىرۋ قالاسى، ءبىلىم بەرۋ باعدارلامالارىنىڭ توبى، تەستىلەۋدى تاپسىرۋ ءتىلى) وزگەرىستەر ەنگىزۋ قاجەت بولعان جاعدايدا، وعان وتىنىشتەردى قابىلداۋ جۇيەسى جابىلعانعا دەيىن (3 -تامىزعا دەيىن) ءوتىنىشتى وڭدەۋ نەمەسە جويۋ مۇمكىندىگى بەرىلەدى، - دەلىنگەن مينيسترلىك حابارلاماسىندا.

تەستىلەۋدى وتكىزۋ ورنى مەن ۋاقىتى تۋرالى اقپارات ءتۇسۋشىنىڭ جەكە كابينەتىندە 9 -تامىزدا قولجەتىمدى بولادى. ء تۇسۋ ەمتيحانىنا اڭگىمەلەسۋ، ەسسە جازۋ جانە ءبىلىم بەرۋ باعدارلاماسى توبىنىڭ بەيىنى بويىنشا ەمتيحان كىرەدى.

جالپى ءتۇسۋ ەمتيحانىنىڭ ەڭ جوعارى كورسەتكىشى - 100 بالل. ونىڭ ىشىندە اڭگىمەلەسۋ - 30 بالل، ەسسە - 20 بالل، بەيىنى بويىنشا ەمتيحان سۇراقتارى 50 بالل. ال مەملەكەتتىك ءبىلىم بەرۋ تاپسىرىسى بويىنشا كونكۋرسقا قاتىسۋ ءۇشىن جانە اقىلى نەگىزدە دوكتورانتۋراعا ءتۇسۋ ءۇشىن شەكتى بالل - 75.

دوكتورانتۋراعا ءتۇسۋ ءۇشىن قازتەست جۇيەسى بويىنشا مەملەكەتتىك ءتىلدى مەڭگەرگەنىن راستايتىن سەرتيفيكات جانە شەت ءتىلىن مەڭگەرگەنىن راستايتىن سەرتيفيكات ۇسىنۋ قاجەت. TOEFL ITP سەرتيفيكاتى بار تۇلعالار د ت ە باستالعانعا دەيىن اعىلشىن ءتىلىن بىلۋگە ارنالعان قوسىمشا تەستىلەۋدى تاپسىرادى.

اتاپ وتسەك، 2024 -جىلى شەت ءتىلىن مەڭگەرگەنىن راستايتىن سەرتيفيكاتتاردىڭ شەكتى دەڭگەيلەرى B1 گە دەيىن تومەندەتىلدى جانە تىزىمگە TOEIC جانە Duolingo English Test سەرتيفيكاتتارى ەنگىزىلدى.

2024 -جىلدان باستاپ تۇسۋشىلەردىڭ بەيىنىنە قاراي دوكتورلار باعدارلاماسى بويىنشا دوكتورانتۋراعا تۇسۋگە مۇمكىندىكتەرى بار. بۇل باعدارلاما ءۇشىن شەت ءتىلىن مەڭگەرگەنىن راستايتىن سەرتيفيكاتتىڭ بەلگىلى ءبىر دەڭگەيى تالاپ ەتىلمەيدى. سونداي-اق بەيىنى بويىنشا دوكتورلار باعدارلاماسى بويىنشا تۇسۋشىلەر ەمتيحان بارىسىندا ەسسە جازبايدى.

ەڭ جوعارى كورسەتكىش - 80 بالل، ونىڭ ىشىندە اڭگىمەلەسۋگە - 25 بالل، كاسىپورىندار مەن ۇيىمداردىڭ ۇسىنىس حاتىنا (بولعان جاعدايدا) - 5 بالل جانە بەيىنى بويىنشا ەمتيحان سۇراقتارى - 50 بالل. شەكتى بالل - كەمىندە 50.

ايتا كەتەيىك، عىلىم جانە جوعارى ءبىلىم مينيسترلىگى ءماجىلىس دەپۋتاتتارىنىڭ دوكتورانتۋراعا ءتۇسۋدىڭ قولدانىستاعى فورماتىن وزگەرتۋگە قاتىستى ساۋالىنا جاۋاپ بەردى.