دوحاداعى اراب-يسلام سامميتىنە قاتىسۋشىلار يزرايلدىڭ ب ۇ ۇ- داعى مۇشەلىگىن توقتاتۋعا شاقىردى

استانا. KAZINFORM - اراب مەملەكەتتەرى ليگاسى (ا م ل) مەن يسلام ىنتىماقتاستىعى ۇيىمىنا (ي ى ۇ) مۇشە ەلدەر قاتاردا وتكەن توتەنشە سامميتتە يزرايلدىڭ دوحاعا جاساعان شابۋىلىن ايىپتاپ، ەلدىڭ ب ۇ ۇ- داعى مۇشەلىگىن توقتاتۋدى ۇسىندى، دەپ حابارلايدى DW اقپارات اگەنتتىگى.

سامميتتىڭ قورىتىندى مالىمدەمەسىندە اتاپ ايتقاندا يزرايلگە قارۋ-جاراق ساتۋعا تىيىم سالۋ جانە بۇل مەملەكەتكە قارسى سانكسيالار ەنگىزۋ قاجەتتىگى ايتىلعان. سونداي-اق ي ى ۇ- عا مۇشە 57 ەل يزرايلدىڭ ب ۇ ۇ- داعى مۇشەلىگىن توقتاتۋعا قول جەتكىزۋ ءۇشىن كەلىسىلگەن كۇش-جىگەرگە شاقىردى. قاتار ءامىرى تاميم بەن حاماد ءال تاني ەۆرەي مەملەكەتىنىڭ دوحاعا جاساعان سوققىسىن «قورقاق لاڭكەستىك ارەكەت» جانە «مەكتەپتەر مەن ديپلوماتيالىق وكىلدىكتەر ورنالاسقان تۇرعىن اۋدانعا جاسالعان وپاسىز اگرەسسيا» دەپ سيپاتتادى.

سامميتكە قاتىسۋشىلار بۇدان باسقا يزرايلدىڭ يوردان وزەنىنىڭ باتىس جاعالاۋىندا ەلدى مەكەندەر سالۋى جانە ونى «گەنوسيد، ەتنيكالىق تازارتۋ جانە اشارشىلىق» ءۇشىن ايىپتادى. قول قويعانداردىڭ پىكىرىنشە، يزرايلدىڭ ارەكەتتەرى تاياۋ شىعىستاعى «بەيبىتشىلىكتىڭ كەز كەلگەن بولاشاعىنا نۇقسان كەلتىرىپ وتىر».

ءوز كەزەگىندە ا ق ش مەملەكەتتىك حاتشىسى ماركو رۋبيو ءدال سول كۇنى، 15- قىركۇيەكتە ۆاشينگتوننىڭ حاماس- قا قارسى سوعىستا يزرايلگە ءوز ماقساتتارىنا جەتۋدە قولداۋ كورسەتەتىنىن راستادى.

- گازا سەكتورىنىڭ حالقى جاقسى بولاشاققا لايىق، ءبىراق بۇل جاقسى بولاشاق حاماس جويىلمايىنشا باستالۋى مۇمكىن ەمەس. ءسىز ءبىزدىڭ مىزعىماس قولداۋىمىزعا سەنە الاسىز، - دەپ مالىمدەدى رۋبيو يەرۋساليمدە يزرايل پرەمەر-ءمينيسترى بينيامين نەتانياحۋمەن بىرلەسكەن باسپا ءسوز ءماسليحاتىندا.

تاياۋ شىعىسقا ۇشار الدىندا تىلشىلەرمەن سويلەسكەن رۋبيو ا ق ش پرەزيدەنتى دونالد ترامپتىڭ قاتار اۋماعىنا جاسالعان سوققىلارعا «قۋانبايتىنىن»، ءبىراق ۆاشينگتوننىڭ يزرايلدى قولداۋىن جالعاستىراتىنىن باسا ايتتى.

دونالد ترامپتىڭ ءوزى بەنيامين نەتانياحۋدىڭ «بۇدان بىلاي قاتارعا سوققى جاسامايتىنىن» مالىمدەدى.

ايتا كەتەيىك، يزرايل 9- قىركۇيەكتە قاتار استاناسى دوحاعا اۋەدەن شابۋىل جاساپ، نىساناعا پالەستينالىق حاماس- تىڭ ساياسي بيۋروسىنىڭ مۇشەلەرىن العانىن مالىمدەگەن بولاتىن. سوققىدان 6 ادام، ونىڭ ىشىندە توپتىڭ باس كەلىسسوزشىسى حاليل ءال-حاييدىڭ ۇلى مەن قاتار ىشكى ىستەر مينيسترلىگىنىڭ قىزمەتكەرى قازا تاپتى.

كەيىن نەتانياحۋ دوحاعا نە ءۇشىن سوققى جاساعانىن ايتتى.