دەپۋتات تەرىس ءدىني ناسيحاتقا قاتىستى جاۋاپكەرشىلىكتى كۇشەيتۋدى ۇسىندى

استانا. KAZINFORM - بۇگىن ءماجىلىس دەپۋتاتى ەرمۇرات باپي تەرىس ءدىني اعىمدارعا توسقاۋىل قويۋ ماسەلەسىن كوتەرىپ، ق ر باس پروكۋرورى بەرىك اسىلوۆتىڭ اتىنا ساۋال جولدادى.

- بۇگىن مەن ءبىر جاعىنان ازاماتتاردىڭ جەكە ماسەلەسى سياقتى كورىنسە دە، قوعامدىق تۇراقتىلىق تۇعىرىن تەڭسەلتىپ، ۇلتتىق مادەني بىرەگەيلىك پەن ەلىمىزدىڭ اقپاراتتىق قاۋىپسىزدىگىنە قاۋىپ توندىرەر قاتەرلەر توڭىرەگىندەگى تاقىرىپتى قوزعاماقپىن. ءسوز نازىك ءدىني دۇنيەنى جالباعاي جامىلىپ، ەلدىڭ ينتەرنەت الەمىندە حالىقتىڭ ساناسىنا مانيپۋلياتسيا جاسايتىن «پسيەۆدودىني اۆتوريتەتتەر» تۋراسىندا بولماق. تۋراسىن قايمىقپاي ايتقاندا، دۇمشە دوگمانى تىقپالاعان بۇل قارابايىر ءدىندارلار ءبىزدىڭ ۇلتتىق ۇستانىمدى ءىرىتىپ، مەملەكەتىمىز بەن قوعامنىڭ تاعانىن تەڭسەلتۋدە، - دەدى ە. باپي ءماجىلىسىنىڭ جالپى وتىرىسىندا.

وسى ورايدا دەپۋتات ۇلتتىق ماسەلەنى پوپۋليزم جولىندا قۇربان ەتۋگە قۇشتار جۋرناليست ارىپتەستەر مەن ماسس-مەديانىڭ باسقا دا وكىلدەرىن كاسىبي، ادامي جانە ازاماتتىق ۇستانىمعا بەرىك بولۋعا شاقىردى.

- ءاربىر رەداكسيا مەن جۋرناليستىڭ ەسىندە بولسىن: مىڭجىلدىق ۇلتتىق مۇراتتارعا قاستىق جاساۋعا، كاسىبي سانانىڭ ءىرىپ-شىرۋىنە جول بەرىلمەۋى ءتيىس. مۇنداي ساندىراقتارعا جول بەرۋ - زاڭعا ورەسكەل قايشى ارەكەت دەپ سانالۋى كەرەك! ەكىنشى ءبىر كەراناۋ كورىنىس - ناۋرىز مەرەكەسى يسلام دىنىنە جات مەيرام دەپ جاريالاعان ساقالى بار مۇرتى جوق بىرەۋدىڭ ۆيدەو مالىمدەمەسى بولدى. الەۋمەتتىك جەلىلەردى كەزىپ كەتكەن بۇل داقپىرت تابيعاتپەن تەل تۋاتىن مەرەكەنى جوققا شىعارۋ عانا ەمەس، سونىمەن بىرگە ءبىزدىڭ حالىقتىڭ عاسىرلاردان تامىر تارتاتىن سالت-داستۇرىنە، ۇلتتىق مادەنيەتى مەن بىرەگەيلىگىنە كۇمان كەلتىرۋدىڭ كەبى. ەلدەگى ءدىني نەگىزدەگى قوعامدىق جارقىشاق اسقىنىپ كەتپەسىن دەسەك، اكىمشىلىك جازامەن عانا ۋشىعىپ بارا جاتقان جاعدايدى اۋىزدىقتاۋ ازدىق ەتەدى! اسىرەسە، الەۋمەتتىك رەسۋرستار ارقىلى تەرىس ءدىني ناسيحات پەن ءدىني ارازدىقتى قوزدىرۋشى تۇلعالاردى قىلمىستىق جاۋاپكەرشىلىككە تارتۋعا مۇمكىندىك بەرەتىن زاڭ نورمالارىن دەپۋتاتتار كورپۋسىنىڭ تالقىلاۋىنا ۇسىنۋدى سۇرايمىن. تۇپتەپ كەلگەندە، ۇلتتىق مۇرات پەن حالىقتىق مۇراعا وراسان زور زالالىن تيگىزەتىن بۇل پروبلەمانىڭ تۇڭعيىعى تەرەڭ جانە الدەقايدا قاۋىپتى بولماق. ەڭ باستىسى - بۇل ۋاعىزشى- سىماق توبىر ءبىزدىڭ جاس وسكىن ۇرپاقتى، ەلدىڭ بولاشاعىن ۋلاۋدا. سىرتتان سىڭگەن تەرىس ءدىني ۋسويقى ۋاعىز، اسىرەسە، بۋىنى بەكىمەگەن جاستاردىڭ سارىۋىز ساناسىنا جەلىمدەي جابىسىپ، ولاردى ۇلتتىق سالت-ءداستۇر داعدىسىنان ايىرۋدىڭ ايلاسىن جاساۋدا، - دەدى ەرمۇرات باپي.

ونىڭ پايىمىنشا، بۇگىنگى قوعام اداسۋ الاياقتىعى شىلاۋىنا شىرمالىپ، «اقپاراتتىق تەرروريزم» دەپ اتاۋعا بولاتىن قياناتتى قۇبىلىسقا تاپ بولدى. بۇنى قوعامدىق جۇيەنىڭ قۇندىلىقتارىن ناقاق قيراتۋ، تۇسىنىك پەن تۇيسىكتى تەرىس جولعا سالۋ، ادامدار ساناسىنا ماڭىزى وزگەرگەن ءمان- ماقساتتى اگرەسسيۆتى تۇردە ءسىڭىرۋ قۇبىلىسى دەپ قابىلداۋ قاجەت.

- ءىس جۇزىندە حالىقتىق، قازاقتىق ۇلتتىق داستۇرلەرگە قارسى شىعۋ - قازاقستاننىڭ كونستيتۋتسيالىق قۇرىلىسىنا قارسى شىعۋ دەگەن ءسوز! «قازاقستان - زايىرلى مەملەكەت» دەپ، اتا زاڭدا اتاپ كورسەتىلگەن قاعيداتقا ءدىني داڭعازامەن قارسى شىعۋ - قىلمىس!

ەگەر ءبىز بۇل تەرىس دوگماعا بۇگىن وتە قاتاڭ جانە جۇيەلىك تويتارىس بەرمەسەك، ەرتەڭ تىزەمىزدى تىستەلەپ، قاپىدا قالۋىمىز ابدەن مۇمكىن. سەبەبى، بۇگىندە اسىرەسە جاستاردىڭ سەنىم- تانىمى مەن قوعامدىق كوزقاراسى ءداستۇرلى ءدىننىڭ مەشىتتەرىندە ەمەس، الەۋمەتتىك جەلىلەردە قالىپتاسۋدا. ەگەر بۇل رەسۋرستاردا رەسمي ينستيتۋتتاردىڭ جۇيەلى، اۆتوريتەتتى جانە زاماناۋي ۇستانىمى تاپشى بولسا، بۇل بوس قالعان كەڭىستىكتى قارابايىر جانە قاۋىپتى پروپاگاندا تولتىرادى... باس پروكۋراتۋرا، ءتيىستى قۇزىرەتتى ۆەدومستۆولار مەن مەملەكەتتىك ورگاندار ونلاين ورتاداعى وسى قيتۇرقى قۇبىلىستى شەكتەۋ ارەكەتىنە جەدەل كىرىسۋى كەرەك، - دەدى دەپۋتات.

ايتا كەتەيىك، جاقىندا ق ر باس پروكۋراتۋراسى ازاماتتاردى، ونىڭ ىشىندە ونلاين- پلاتفورمالاردا پىكىر ءبىلدىرۋ كەزىندە زاڭنامانى قاتاڭ ساقتاۋعا شاقىردى.

اۆتور

رۋسلان عابباسوۆ