دەپۋتات تالعارداعى وقيعا تۋرالى: دارىگەرلەردىڭ مارتەبەسى تۋرالى زاڭ كەرەك
ءماجىلىس دەپۋتاتى گۇلدارا نۇرىموۆا تالعاردا دارىگەرلەردىڭ سوققىعا جىعىلۋىنا بايلانىستى پرەمەر-ءمينيستردىڭ ورىنباسارى تامارا دۇيەسەنوۆانىڭ اتىنا دەپۋتاتتىق ساۋال جولدادى، دەپ حابارلايدى قازاقپارات ءتىلشىسى.
«كەشە تالعار اۋداندىق ورتالىق اۋرۋحاناسىنىڭ جانساقتاۋ بولىمشەسىندە رەانيماتولوگ- انەستەزيولوگ پەن مەيىرگەردى قايتىس بولعان ناۋقاستىڭ ۇلدارى سوققىعا جىقتى. ءبىز مەديتسينا قىزمەتكەرىنە ءزابىر كورسەتكەن بۇل ورەسكەل فاكتىگە جول جوق دەپ ەسەپتەيمىز. قاتىگەز كۇش كورسەتۋ ارەكەتىنىڭ كەسىرىنەن مەديتسينا قىزمەتكەرلەرى ومىرىنە قاۋىپ توندىرەتىن اۋىر جاراقات الدى - باس سۇيەگى جابىق تۇردە زاقىمدانىپ، ميى ءىسىندى، قان ۇيۋ وشاقتارى مەن سۇيەكتەردىڭ جابىق سىنىعى تىركەلدى»، - دەدى دەپۋتات.
سونداي-اق ول بۇعان دەيىن الماتى وبلىسى مەن الماتى قالاسىندا بولعان وقيعالاردى ەسكە سالدى.
«مەن دارىگەر رەتىندە ەشبىر دوكتور قولىنا تۇسكەن ناۋقاسقا ءولىم تىلەمەيتىنىن ايتقىم كەلەدى. مەديتسينا ماماندارى كۇن سايىن جۇمىس بارىسىندا دورەكەلىككە تاپ كەلىپ، ناۋقاستاردىڭ اگرەسسيۆتى تۋىستارىنان زارداپ شەگىپ جاتادى»، - دەدى ول.
دەپۋتات تالعارداعى جاعدايدا ءادىل باعا بەرىلىپ، كىنالىلەر زاڭمەن جازالانۋ كەرەگىن ايتتى.
«ەكىنشىدەن، دەنساۋلىق ساقتاۋ مينيسترلىگى مەديتسينا ماماندارىن قورلاۋعا توزۋشىلىك جوق ەكەنى تۋرالى قوعام اراسىندا ءتۇسىندىرۋ جۇمىستارىن جۇرگىزۋ كەرەك. ۇشىنشىدەن، مەديتسينا قىزمەتكەرلەرىنىڭ مارتەبەسى تۋرالى زاڭ قابىلدايتىن كەز كەلدى»، - دەدى ول.