دەپۋتات قازاقستانداعى سۋديالاردى سااكاشۆيليدىڭ ادىسىمەن ىرىكتەۋدى ۇسىندى: ول قالاي

استانا. KAZINFORM - ءماجىلىس دەپۋتاتى ابزال قۇسپان "قازاقستانداعى سۋديالار تاۋەلسىز دەپ ويلايسىز با؟" دەگەن سۇراققا جاۋاپ بەردى، دەپ حابارلايدى Ulysmedia.kz.

پارلامەنت پالاتالارىنىڭ بىرلەسكەن وتىرىسىنان كەيىن جۋرناليستەر دەپۋتاتتان "قازاقستانداعى سۋديالار تاۋەلسىز دەپ ويلايسىز با؟" دەپ سۇراعان.

- قازاقستاننىڭ سوتتارى قازىر تولىققاندى تاۋەلسىز دەپ ايتا المايمىن. ونى مەنسىز دە بىلەسىزدەر دەپ ويلايمىن. ءبىراق تولىق تاۋەلسىزدىگىن قامتاماسىز ەتۋ ءۇشىن جوق دەگەندە ەكى نارسەنى جاساۋىمىز كەرەك. بىرىنشىدەن، تولىق ماتەريالدىق قاجەتتىلىكتەرىن وتەۋىمىز قاجەت. بارلىق الەمدە بار پراكتيكا. ءبىز ويلاپ تاۋىپ جاتقان دۇنيە ەمەس. ەشبىر ادامدى پاتريوت بول، سۋديا بول، جاۋاپكەرشىلىكتى موينىڭا ارتىپ ال دەپ تالاپ ەتە المايمىز. سوتتىڭ جالاقىسى جوعارى بولۋى كەرەك. كولىك، تۇرعىن ۇيمەن قامتاماسىز ەتۋ كەرەك، - دەيدى ول.

ابزال قۇسپان جەكە پىكىرىن بىلاي ايتادى.

- وسى كەزگە دەيىنگى سۋديالاردى قايتادان قانشا اۋىر جانە قيىن بولسا دا، جاعدايلارىن جاساپ العاننان كەيىن ەكىنشى قادام - قايتادان اتتەستاتسيادان وتكىزۋىمىز كەرەك. گرۋزيادا سااكاشۆيلي (بۇرىنعى پرەزيدەنتى) قۇقىق قورعاۋ سالاسىن رەفورمالاعان كەزدە وسىلاي جاسادى. ەڭ بىرىنشىدەن، بىلىققا بەلشەسىنەن باتقان گاي قىزمەتكەرلەرىن تولىق جۇمىستان بوساتىپ، ولاردىڭ قىزمەتىن ۋچاسكەلىك پوليتسيا ينسپەكتورلارعا تاپسىرىپ، كونكۋرس نەگىزىندە قايتادان ىرىكتەگەن. ءبىراق جالاقىلارىن بىرنەشە ەسە كوبەيتىپ، قايتادان العان. بۇرىن جۇمىس ىستەپ كەلە جاتقان ادامدار مەن جاڭادان كەلگەندەردى بولگەن جوق. الدىمەن پوليتسيانى، كەيىن باسقا ماسەلەلەردى رەتتەي كەلە كادىمگىدەي جەمقورلىق دەڭگەيىن تومەندەتتى. مىنە، وسىنداي جۇمىستى اتقارۋ كەرەك. ۆەلوسيپەد ويلاپ تابۋدىڭ قاجەتى جوق، - دەيدى ول.

دەپۋتاتتىڭ بۇرىنعى سىنى

ابزال قۇسپان بۇعان دەيىن سوت سالاسىن "ءىس جۇزىندە جابىق كورپوراتسياعا اينالىپ كەتتى" دەپ سىناعان ەدى. قۇسپان دەپۋتاتتىق ساۋالىندا سۋديالاردىڭ سوت تورەلىگىن ىسكە اسىرۋ كەزىندە تاۋەلسىز جانە تەك كونستيتۋتسيا مەن زاڭعا عانا باعىناتىنى، ولاردىڭ مارتەبەسى مەن تاۋەلسىزدىگىنە نۇقسان كەلتىرەتىن زاڭداردى نەمەسە وزگە دە نورماتيۆتىك قۇقىقتىق اكتىلەردى قابىلداۋعا جول بەرىلمەيتىنى، سوتقا نەمەسە سۋدياعا قۇرمەتتەمەۋشىلىك بىلدىرۋ زاڭدا بەلگىلەنگەن جاۋاپتىلىققا اكەپ سوعاتىنى كونستيتۋتسيالىق زاڭمەن دۇرىس بەكىتىلگەن دەپ ەسەپتەيدى. ونىڭ ايتۋىنشا، سۋديالىق لاۋازىمعا كاسىبي بىلىكتىلىكتەن بولەك جوعارى مورالدىق- ادامگەرشىلىك قاسيەتتەرى مەن ەل الدىندا ءمىنسىز بەدەلى بولۋى تالاپ ەتىلەدى.