دەپۋتات: مەكتەپتەردەگى وقۋ جۇكتەمەسى وقۋشى ءۇشىن اۋىر

استانا. قازاقپارات - قازاقستان مەكتەپتەرىندە اپتاسىنا 67 ساعات وقۋ جۇكتەمەسى بەرىلەدى، دەپ حابارلايدى 24KZ.

«بۇل وقۋشى ءۇشىن اۋىر»، - دەيدى سەناتور التىنبەك نۇح ۇلى. ونىڭ ايتۋىنشا، جاپونيا، قىتاي، كورەياعا قاراعاندا ءبىزدىڭ ەلدەگى وقۋ باعدارلاماسى 2,5 ەسە كوپ.

«سونىمەن قاتار مەكتەپ پاندەرىنىڭ جازىلۋ ستيلى دە كۇردەلى»، - دەيدى سەناتور. جالپى ەلدەگى ءبىلىم جۇيەسى جالپىعا مىندەتتى ءبىلىم بەرۋ ستاندارتىنا ساي جاسالادى. وسى ارقىلى بۇگىندە 1-سىنىپتا 9 ءپان، 2-4 سىنىپتا 11-12 ءپان وقىتىلادى. وسىلاي ءار سىنىپ سايىن جاڭا پاندەر قوسىلىپ، 10-11- سىنىپتا 16 پانگە دەيىن جەتەدى.

سەيفوللا سمايلوۆ، ورتا ءبىلىم مازمۇنى ينستيتۋتىنىڭ ديرەكتورى:

- 2016 -جىلى وتاندىق ءبىلىم بەرۋ جۇيەسى جاڭارتىلعان مازمۇنداعى ءبىلىم باعدارلاماسىنا كوشتى. سوعان وراي بۇرىڭعى پاندەردىڭ ورنىنا جاڭا پاندەر الماستىرىلىپ، وزگەرتىلدى. مىسالى، بۇرىن وقىتىلاتىن «سىزۋ» دەگەن ءپان، بۇرىن وقىتىلاتىن «ادام مەن قوعام» دەگەن ءپان بولاتىن. قازىر ول پاندەر وقىتىلمايدى، ونىڭ ورنىنا باسقا پاندەر ەنگىزىلدى. ياعني، وقۋشىعا اپتاسىنا 67 ساعات وقۋ جۇكتەمەسى جۇكتەلەدى.

«ال بۇل وقۋشى ءۇشىن اۋىر» ، - دەيدى سەناتور التىنبەك نۇح ۇلى. ونىڭ ايتۋىنشا، جاپونيا، قىتاي، كورەيا ەلدەرىنە قاراعاندا بۇل 2,5 ەسەگە كوپ.

التىنبەك نۋح ۇلى، سەنات دەپۋتاتى:

- مەكتەپتەگى پاندەر سانى سالىستىرعان كەزدە، مىسالى، جاڭاعى ايتىپ وتىرعان مەملەكەتتەردە كوپ جاعدايدا پاندەر ينتەگراتسيالانعان. ياعني، قىسقارتىلعان ساندارى، بىرىكتىرىلگەن. 4-تەن 6 پانگە دەيىن بولسا، بىزدە قازاقستاندا ءتىپتى جوعارعى مىناۋ 8-9- سىنىپتاردا 15-16 پانگە دەيىن وقىتىلادى. ياعني، 2,5 ەسە كوپ.

ەل مەكتەپتەرىندە حيميا، بيولوگيا، گەوگرافيا سىندى وقۋ پاندەرى جەكە جۇرگىزىلىپ، 578 ساعاتتى قۇراسا، ازيا ەلدەرىندە بىرىكتىرىلىپ، «عىلىم» ءپانى دەپ وقىتىلادى. ونى وقىتۋ مەرزىمى - 324 ساعات. حالىقارالىق PISA زەرتتەۋىنىڭ قورىتىندىسى بويىنشا وسى ەلدەردەگى وقۋشىلاردىڭ جاراتىلىستانۋ عىلىمى بويىنشا ساۋاتتىلىعى جوعارى.

سەيفوللا سمايلوۆ، ورتا ءبىلىم مازمۇنى ينستيتۋتىنىڭ ديرەكتورى:

- ءار ەلدە ءارتۇرلى. مىسالى، ازيا ەلدەرىن الىپ قارايتىن بولساق، وزىق ەلدەر جاپونيا، وڭتۇستىك كورەيا ەلدەرىندە تۇسكە دەيىن مىندەتتى شەكتەۋلى ساباقتار وتەدى. ال ءبىراق ول جەردى ونى ەشكىم كورسەتىپ ايتپايدى. بۇل ءبىلىم الۋشى وقۋشى ارى قاراي ءوز ءبىلىمىن جەتىلدىرەمىن، وقيمىن دەسە، ول قوسىمشا اقىلى نەگىزدە ساباققا بارادى. ءبىراق ول ەشقانداي قۇجاتتا كورسەتىلمەگەن. ەگەر ول ونى وتپەسە، ەرتەڭ ول وقۋعا تۇسە الماي قالادى.

سەناتور سونداي-اق مەكتەپ پاندەرىنىڭ جازىلۋ ءستيلى كۇردەلى ەكەنىن ايتادى. عىلىمي تىلدە جازىلعان كىتاپتى بالا دا، اتا- انادا دۇرىس تۇسىنبەيدى. «بالانى جالىقتىرىپ الماس ءۇشىن بارىنشا جالپىلاما، تۇسىنىكتى تىلدە قايتا شىعارساق. الدىمەن پاندەردى ينتەگراتسيالاپ الساق، سودان كەيىن بارىپ سوعان سايكەس جاڭا وقۋلىقتار جازىلسا. ارينە، مۇنىڭ ءبارى ءبىر- اق كۇندە بولاتىن دۇنيە ەمەس. ول ءۇشىن الدىمەنەن جاڭا جالپىعا مىندەتتى ءبىلىم بەرۋ ستاندارتتارىن جاڭادان جازىپ شىعۋ كەرەك. ياعني، ستاندارتتارعا سايكەس ۇلگىلىك وقۋ باعدارلامالارى جازىلادى. ۇلگىلىك وقۋ باعدارلامالارىنا سايكەس جاڭا وقۋلىقتار جازىلادى»، - دەيدى دەپۋتات التىنبەك نۇح ۇلى.

قازىرگى جالپى ورتا ءبىلىم بەرۋدىڭ مەملەكەتتىك جالپىعا مىندەتتى ستاندارتى 2007 -جىل قازاقستان رەسپۋبليكاسىنىڭ «ءبىلىم تۋرالى» زاڭىنىڭ 5-بابى، 5-1 تارماقشاسىنا جانە 56-بابىنا سايكەس ازىرلەنگەن. ورتا ءبىلىم مازمۇنى ينستيتۋتىنىڭ مالىمدەۋىنشە، قازىر ارنايى مەكەمەلەر ستاندارتتار مەن ۇلگىلىك وقۋ جوسپارىن جەتىلدىرۋ باعىتىن قاراستىرۋعا كىرىسكەن.