دەپۋتات كەلەر جىلدى زورلىق-زومبىلىققا قارسى كۇرەس جىلى دەپ جاريالاۋدى ۇسىندى
ءماجىلىستىڭ جالپى وتىرىسىندا دەپۋتات قاراقات ابدەن حاراسسمەنتكە قاتىستى انونيمدى ساۋالنامانى ەلىمىزدىڭ بارلىق جوعارى وقۋ ورىنىندا تاۋەلسىز تۇردە وتكىزۋدى ۇسىندى، دەپ حابارلايدى Kazinform.
«وتباسىنداعى زورلىق-زومبىلىققا جول بەرمەۋ كەزەك كۇتتىرمەي شەشەتىن ماسەلەگە اينالدى. ەلدى ەلەڭ ەتكىزگەن سوڭعى حابارلار قوعامدىق سانانى ءدۇر سىلكىندىردى. وسى قورقىنىشتى جاڭالىقتار ىزىمەن حاراسسمەنت وقيعالارى دا تەز تارادى. جاقىندا استانا مەديتسينا ۋنيۆەرسيتەتىندە پروفەسسور-وقىتۋشىنىڭ ستۋدەنتكە جاساعان جىنىستىق قىسىم فاكتىسى انىقتالدى. وسىدان كەيىن الىمجەتتىك كورگەن ستۋدەنتتەر ءوز وقيعالارىن الەۋمەتتىك جەلىدە جاريالاي باستادى. جەكە وزىمە ءارتۇرلى وقۋ ورىندارىنىڭ ستۋدەنتتەرىنەن 100 دەن اسا حات كەلىپ ءتۇستى»، - دەدى ق. ابدەن پرەمەر-ءمينيستردىڭ ورىنباسارى تامارا دۇيسەنوۆانىڭ اتىنا جولداعان ساۋالىندا.
دەپۋتات جىنىستىق قىسىمعا ۇشىراعان ەلوردالىق بويجەتكەننىڭ ىسىمەن تانىسىپ، بۇل سالادا كەمشىلىكتەردىڭ كوپتىگىنە كوزى جەتكەنىن ايتتى.
«ءدال بۇگىن ەلىمىزدىڭ وقۋ ورىندارىندا قانشا حاراسسمەنت وقيعاسى ورىن العانىن ءدوپ باسىپ ايتۋ قيىن. سەبەبى ستاتيستيكا جۇرگىزىلمەيدى. ال زاڭدا حاراسسمەنت ۇعىمى اتىمەن جوق. جالپى زورلىق-زومبىلىقتىڭ قاي ءتۇرىن بولسىن، ياعني حاراسسمەنتتى دە قاتاڭ قاراپ، زاڭ جوباسىنا ءبىرقاتار وزگەرتۋلەر مەن تولىقتىرۋلار ەنگىزۋ كەرەك. بۇل جولى ستۋدەنت قىزىمىز باتىل بولىپ شىقتى. ەش قورىقپاستان بولعان جاعدايدى جايىپ سالدى. ءتيىستى شەشىم قابىلدانىپ، الگى حاراسسەر جۇمىستان شىعارىلدى. ءبىراق، ءبىز مۇنداي ماسەلەنى ءارقاشان ستۋدەنتتىڭ - باتىلدىعىنا، باسشىنىڭ - ادىلدىگىنە سەنىپ قويا المايمىز. جۇيەلى، كەشەندى شەشىمدەر كەرەك»، - دەدى ول.
بۇل تۇرعىدا دەپۋتات حاراسسمەنتكە قاتىستى انونيمدى ساۋالنامانى ەلىمىزدىڭ بارلىق جوعارى وقۋ ورىندارىندا تاۋەلسىز تۇردە وتكىزۋدى ۇسىندى. سونىمەن قاتار، بارلىق جوعارى وقۋ ورنىنىڭ جارعىسىنا حاراسسمەنت تۋرالى ناقتى ەرەجەلەر ەنگىزۋدى سۇرادى.
«باس پروكۋراتۋرانىڭ دەرەكتەرى بويىنشا 2023- جىلدىڭ 10 ايىندا تۇرمىستاعى زورلىق-زومبىلىقتان 85 ايەل قازا تاپقان. قورقىنىشتى ستاتيستيكا. حاراسمەنت تە زورلىق-زومبىلىقتىڭ ءبىر ءتۇرى. ايتىلعان ويىمدى قورىتىندىلاي كەلە، كەلەر جىلدى زورلىق-زومبىلىققا قارسى كۇرەس جىلى دەپ جاريالاۋدى ۇسىنامىن» - دەدى قاراقات ابدەن.
ەسكە سالساق، جاقىندا سەناتور دارحان قىدىرالى ەلىمىزدەگى ايەلدەردى جۇمىس ورنىندا حاراسسمەنتتەن قورعاۋدى تالاپ ەتتى.