دەپۋتات جەر قويناۋى زاڭ جوباسى تۋراسىندا: ۇكىمەتتىڭ مۇددەسىن قورعايتىن باپتار جوق

استانا. KAZINFORM - بۇگىن پارلامەنت ماجىلىسىندە «جەر قويناۋى جانە جەر قويناۋىن پايدالانۋ تۋرالى» كودەكسكە جاڭا تۇزەتۋلەردىڭ تانىستىرىلىمى ءوتتى.

زاڭ جوباسى ءماجىلىستىڭ ءبىرقاتار دەپۋتاتىنىڭ باستاماسىمەن دايىندالدى. ولاردىڭ قاتارىندا ءماجىلىس ءتوراعاسىنىڭ ورىنباسارى البەرت راۋ دا بار.

قۇجاتتى دەپۋتات ۆيكتور اۆەرشين تانىستىردى. ونىڭ ايتۋىنشا، قارالىپ وتىرعان زاڭ جوباسى جەر قويناۋىن پايدالانۋ سالاسىنداعى اشىق باسەكەلەستىك ءتارتىپتى نىعايتۋعا باعىتتالعان. سونىمەن قاتار، دەرەكتەر بازاسى جانە سيفرلاندىرۋ تەتىگى رەتىندە جەر قويناۋىن پايدالانۋدىڭ ءبىرىڭعاي پورتالىن زاڭنامالىق تۇردە بەكىتۋ ەسكەرىلگەن. قۇجات اياسىندا جاڭا نورمالار جەر قويناۋىن پايدالانۋعا قاتىستى زاڭ بۇزۋ ارەكەتتەرىنە، فاۆوريتيزم مەن رەيدەرلىك ءىس-قيمىلداردى بولدىرماۋعا مۇمكىندىك بەرەدى.

«بۇدان بولەك، تاجىريبەلىك ءوندىرىس ماقساتىندا ءوندىرۋدى سىلتاۋ ەتىپ، قاتتى پايدالى قازبالاردى جاسىرىن وندىرۋگە دە تىيىم سالىنادى جانە ول بويىنشا كەن ورنىن بارلاۋعا ارنالعان ليتسەنزيا دەرەۋ قايتارىلادى»، - دەدى ول.

قۇجات جوباسىن تالقىلاۋ بارىسىندا ءماجىلىس دەپۋتات باقتىقوجا ىزمۇحامبەتوۆ ونداعى كەيبىر نورماعا قارسىلىعىن ايتتى. تانىستىرىلىم اياقتالعانان كەيىن دەپۋتات نە ءۇشىن ەسكەرتۋ ايتقانىن ءتۇسىندىردى.

«مىنا زاڭ جوباسىن قاراۋعا قاي ۋاقىتتا جانە كىم ۇكىمەتكە ءوتىنىم جولدادى؟ ۇكىمەت وعان قورىتىندىنى قالاي بەردى؟ وتىرىس بارىسىندا سونى سۇرادىم. زاڭ جوباسىن دايارلاعاندار سۇراقتارىمىزعا دا جاۋاپ بەرە المادى. مەن 20 جىلدان استام جەر قويناۋىن پايدالانۋ سالاسىن باسقارعان اداممىن. سوندىقتان بۇل سالاداعى زاڭنامانىڭ ءمان-جايىن بىلمەسەم، وسى باعىتتاعى تالقىلاۋلارعا ارالاسپاس ەدىم. زاڭ جوباسى جۇمىس توبىندا قارالماعان، ياعني ءبىز ونى باستامادىق، ءبىراق ۇكىمەت «ءبارى دۇرىس» دەگەن قورىتىندىسىن بەرىپ وتىر...

كەز كەلگەن زاڭ مەملەكەتتىڭ مۇددەسىن قورعاۋ كەرەك. اڭگىمە وسىندا. اتاپ ايتقاندا، جەر قويناۋىنا قاتىستى زاڭعا ەنگىزىلگەن وزگەرىستەر مەن تولىقتىرۋلاردا قازاقستاننىڭ مۇددەسىن قورعايتىن باپتار بولۋى كەرەك. ال ەگەر مىنا باپتاردى (ۇسىنىلىپ وتىرعان) قاراساڭىزدار، ول جەردە مۇددە جوعالىپ كەتىپ تۇر. وسىنى تۇسىنگەننەن كەيىن ايتىپ وتىرمىن. مىنانى وقىپ شىقساق، ۇكىمەت كوپ نارسەگە ارالاسا المايدى. زاڭ جوباسىندا ۇكىمەتتىڭ مۇددەسىن قورعايتىن باپتاردى كورمەدىم. جۇمىس توبىندا تالقىلاپ، كەلىسىمگە كەلۋىمىز كەرەك. ەشقانداي تالقىلاۋسىز، تانىستىرۋسىز ۇكىمەتپەن كەلىسىلگەن دەگەن باپتاردى كورسەتىپ وتىر. ولاي بولمايدى عوي؟! ەندى ماجىلىستەگى جۇمىس توبىنداعى تالقىلاۋ كەزىندە، زاڭ جوباسىنداعى كەمشىلىكتەردى ەگجەي-تەگجەيلى ايتامىز»، - دەدى ب. ىزمۇحامبەتوۆ تىلشىلەر سۇراعىنا جاۋاپ بەرە وتىرىپ.

اۆتور

رۋسلان عابباسوۆ