دەپۋتات شەتەلدەن كىرگىزىلەتىن اۆتوكولىكتەردىڭ كەدەندىك الىمدارىن تومەندەتۋدى ۇسىندى

قازاقستانعا شەتەلدەن كىرگىزىلەتىن اۆتوكولىكتەردىڭ شەكتىك قۇنى بەكىتىلگەن كەدەندىك سەتكانىڭ باعاسىن تومەندەتۋ قاجەت. بۇل تۋرالى ۇكىمەت باسشىسى ءاليحان سمايىلوۆتىڭ اتىنا ساۋال جولداعان ءماجىلىس دەپۋتاتى نارتاي سارسەنعاليەۆ ايتتى، دەپ حابارلايدى Kazinform.

«بۇگىنگى دەپۋتاتتىق ساۋالىم بيلىكتىڭ بەيمالىم شەشىمدەرىنەن سوڭ توز-توزى شىققان تەمىردى تاقىمداۋعا ءماجبۇر مۇقىم ەلدىڭ مۇڭى. راسىندا سولاي، ۇلتتىق ستاتيستيكا بيۋروسىنىڭ مالىمەتىنە سۇيەنسەك، قازاقستانداعى اۆتوكولىكتەر ادام تاسۋدان اۋەلدە ادا بولۋى كەرەك. سەبەبى ابدەن توزىعى جەتكەن. سانمەن سويلەيىك: قازىر قازاقستاندا 4 ميلليون جەڭىل اۆتوكولىك، 454 مىڭ جۇك كولىگى مەن 95 مىڭ اۆتوبۋس بار. ستاندارتقا سالساق، تەمىر تۇلپاردىڭ تالقانى شىقپاي ءجۇرىپ بەرەتىن ۋاقىتى ەڭ كوپ دەگەندە - 10 جىل. ال، قازاقستاندا تىركەلگەن جەڭىل اۆتوكولىكتەردىڭ 49 پايىزىنىڭ زاۋىتتان شىققانىنا 20 جىلدان اسقان، 21 پايىزىنا 10 جىل تولعان، وسىلاي كەتە بەرەدى. جاڭا دەپ سانالاتىن 3 جىلعا دەيىنگى جەڭىل اۆتوكولىكتەردىڭ ۇلەسى ەلىمىزدە 6 پايىز عانا ەكەن. وسىدان-اق قازاقستانداعى اۆتوپاركتىڭ مۇشكىل جاعدايىن بىلۋگە بولادى»، - دەدى ءماجىلىس دەپۋتاتى.

ونىڭ اتاپ وتۋىنشە، قازاقستانعا شەتەلدەن اۆتوكولىك اكەلۋ ءۇشىن بىرنەشە تولەم جاساۋ قاجەت. ءبىرىنشى، كولىك باعاسىنىڭ 12 پايىزىن قۇرايتىن قوسىمشا قۇن سالىعىن تولەۋ كەرەك. ەكىنشى، اۆتوكولىك باعاسىنىڭ 15 پايىزىنا تەڭ مەملەكەتتىك باج تولەۋ ءتيىس. ءۇشىنشى، سايكەستەندىرۋ سەرتيفيكاتىن تولەۋ كەرەك. ياكي، شەتەلدەن قانداي اۆتوكولىك اكەلسەڭ دە ولاردىڭ قازاقستانداعى ديلەرلەرىنەن سەرتيفيكات الۋ شارت. ونىڭ قۇنى 60 مىڭ تەڭگەدەن 140 مىڭ تەڭگەگە دەيىن. ءتورتىنشى، شامامەن 20700 تەڭگە كەدەندىك الىم تولەۋى ءتيىس. بەسىنشى، اۆتوكولىكتىڭ قوزعالقىشىنىڭ كولەمىنە قاراي ۋتيلالىم تولەۋ شارت. ول 258750 تەڭگەدەن باستالىپ قىمباتتاي بەرەدى. قوزعالتقىش كولەمى 3-تەن اسسا 1983750 تەڭگە تولەۋ كەرەك. وعان قوسا شامامەن 350000 تەڭگە اكسيز تولەۋ قاجەت.

«ءارى قاراي، كولىكتىڭ شىعارىلعان جىلىنا قاراي تولەم بار. «پەرۆيچكا» دەيدى. ەگەر قازاقستانعا اكەلىنگەن كولىكتىڭ شىعارىلعانىنا 3 جىلدان اسسا تاعى 1,8 ميلليون تەڭگە تولەۋ كەرەك. وعان س ۆ ح مەن پورتتىڭ جانە بروكەرلەردىڭ اقشاسىن قوسىڭىز. وسىنشا مىندەتتى تولەمنىڭ سالدارىنان شەتەلدەگى ساپالى اۆتوكولىكتى قازاقستان ازاماتتارى اكەلىپ مىنە المايدى. ازاماتتارىمىز مىندەتتەمەلەردى تولەمەيمىز دەپ وتىرعان جوق، ءبىراق باستى پروبلەما كەدەندىك سەتكا. ياعني، ول قۇجاتتا قازاقستانعا كىرەتىن بارلىق اۆتوكولىكتەردىڭ ەڭ تومەنگى باعاسى بەلگىلەنگەن. ءبىر عانا مىسال، قازاقستانداعى سۋ جاڭا حيۋنداي ەلانترانىڭ قۇنى رەسمي سايتتا 11 ميلليون تەڭگەدەن باستالادى. ال شەتەلدە سول اۆتوكولىكتى كەمىندە ەكى ەسە ارزانعا الۋعا بولادى. ءبىراق كەدەندىك سەتكادا اتالعان كولىكتىڭ باعاسى 13800 دوللار دەپ بەكىتىلگەن. ءسىز ونى شەتەلدەن 10000 دوللارعا ساتىپ الساڭىز دا قازاقستانعا تەك 13800 دوللار دەگەن باعامەن كىرەدى جانە بارلىق سالىقتىق جانە مىندەتتى تولەمدەر وسى باعادان ەسەپتەلەدى. ەڭ سوراقىسى، تاۋسىلمايتىن تولەمنەن ارىلۋ ءۇشىن شەتەلدەن العان اۆتوكولىكتەرىن الدىمەن قىرعىزستانعا اكەلىپ تىركەيدى. ول جاقتاعى تولەم بىزدەن 2 ەسە از ەكەن. سوسىن قازاقستانعا كىرگىزەدى. وسىلايشا ءبىز ءوز قولىمىزبەن وزگە ەلدىڭ بيۋدجەتىنە قارجى قۇيىپ وتىرمىز. 2023 -جىلدىڭ قاڭتارى مەن ءساۋىرى ارالىعىندا قىرعىز ەلىنە 41 مىڭ اۆتوكولىك كىرگەن. كەيىن سونىڭ ءبىراز بولىگى ءبىزدىڭ ەلگە وتكەن دەلىنەدى اشىق دەرەكوزدە. وسىلايشا قازاقستان ازاماتتارىن جاقسى كولىك ءمىنۋ قۇقىعىنان قاعىپ جانە قازىناعا ءتۇسۋى ءتيىس قىرۋار قاراجاتتان دا قاعىلىپ وتىر»، - دەدى ول.

وسى ورايدا نارتاي سارسەنعاليەۆ ءوز اتىنا تولاسسىز كەلىپ جاتقان وتانداستارىمىزدىڭ 3 تالابىن جاريا ەتتى:

قازاقستانعا شەتەلدەن كىرگىزىلەتىن اۆتوكولىكتەردىڭ شەكتىك قۇنى بەكىتىلگەن كەدەندىك سەتكانىڭ باعاسىن تومەندەتۋ.

العاشقى تىركەۋ باعاسىن ءتۇسىرۋ. قازىر قازاقستانعا اكەلىنەتىن كولىكتەردىڭ شىققانىنا 3 جىلدان اسسا وعان 1,8 ميلليون تولەۋ مىندەتەلەدى، وسى مەرزىمدى 7 جىلعا دەيىن سوزۋ. ۋتيل الىمنىڭ باعاسىن تومەندەتۋ.

اۆتور

مارلان جيەمباي