دەپۋتات: ءتىلىمىزدى تاپتاعان چەرچەسوۆكە قاقپامىزعا كىرگەن ءار گول ءۇشىن 80 ميلليون تەڭگە تولەپ وتىرمىز

استانا. KAZINFORM - ءماجىلىس دەپۋتاتى قازىبەك يسا باس پروكۋرور بەرىك اسىلوۆ پەن سىبايلاس جەمقورلىققا قارسى اگەنتتىك ءتوراعاسى اسقار جۇماعاليعا فۋتبولداعى جەمقورلىق تۋرالى ساۋال جولدادى.

دەپۋتاتتىڭ ايتۋنىشا، 2018-2023 -جىلدارى «سامۇرىق- قازىنا» اكسيونەرلىك قوعامى «استانا» فۋتبول كلۋبىنا 50,1 ميلليارد تەڭگە، «بارىس» حوككەي كلۋبىنا 48,8 ميلليارد تەڭگە، «Astana Qazaqstan Team» ۆەلوسيپەد كلۋبىنا 31,5 ميلليارد تەڭگە بولگەن. ياعني، كۆازي مەملەكەتتىك سەكتوردان 4 كلۋبقا عانا 6 جىلدا 138 ميلليارد تەڭگە جۇمسالعان.

«فۋتبولدى دامىسىن دەپ قانشا قارجى بولسەك تە، فۋتبول ەمەس، جەمقورلىق دامىپ جاتىر. FIFA رەيتينگىسى بويىنشا 110-130-ورىنداردان اسا الماي كەلەمىز. ال فۋتبولداعى «كەلىسىلگەن ويىندار» سانى بويىنشا الەمدىك رەيتينگىدە 4-ورىندامىز.

ءتورت ويىندا قاقپاسىنا 8 گول كىرگىزىپ، ويسىراي جەڭىلگەن، ءبىر دە ءبىر جەڭىسكە جەتپەگەن فۋتبولدان قازاقستان ۇلتتىق قۇراماسىنىڭ باس باپكەرى س. چەرچەسوۆكە ءبىزدىڭ ءا. بارمەنقۇلوۆ باسقاراتىن قازاقستان فۋتبول فەدەراتسياسى 640 ميلليون ت گ تولەيدى دەيدى. وسى 640 ميلليون تەڭگەنى 8 گولعا بولەيىك. سوندا ءبىز پۇلىمىزدى ماقتايتىن، ءتىلىمىزدى تاپتايتىن چەرچەسوۆكە قارسىلاستىڭ ەمەس، ءبىزدىڭ ۇلتتىق قۇرامانىڭ قاقپاسىنا سالعىزعان ءار گولى ءۇشىن 80 ميلليون تەڭگە تولەپ وتىرمىز»، - دەپ كىجىندى دەپۋتات.

قازىبەك يسا باس پروكۋراتۋرا مەن سىبايلاس جەمقورلىققا قارسى ءىس-قيمىل اگەنتتىگى بارلىق سپورت فەدەراتسياسى مەن كاسىبي سپورت كلۋبتارىنا ريەۆيزيا جۇرگىزۋ كەرەك دەپ وتىر.

«كاسىبي سپورت، فۋتبول - بۇل نەگىزى بيزنەس. سوندىقتان بيۋدجەتكە بايلانعان فۋتبول جانە باسقا دا كاسىپتىك كلۋبتاردىڭ بارلىعىن جەكەشەلەندىرىپ، مەملەكەتتەن قارجىلاندىرۋدى توقتاتۋ قاجەت. مەملەكەت قارجىسى بالالار مەن جاسوسپىرىمدەر مەكتەپتەرىنە، ۇلتتىق سپورتقا، بۇقارالىق سپورتقا جۇمسالۋى كەرەك. وسى ۋاقىتقا دەيىن مەملەكەتتەن جالپى سپورتقا، سونىڭ ىشىندە فۋتبول سالاسىنا بولىنگەن قارجىنىڭ ەسەبى بەرىلۋى ءتيىس. ويتكەنى، ول حالىق قارجىسى»، - دەدى ءماجىلىس دەپۋتاتى.

اۆتور

ەسىمجان ناقتىباي