دەپۋتات ەڭبەك ءمينيسترىنىڭ مالىمدەمەسىن سىنادى

استانا. KAZINFORM - بۇگىن ءماجىلىستىڭ جالپى وتىرىسىندا دەپۋتات ايدوس سارىم ەڭبەك ءمينيسترىنىڭ وتكەن اپتادا «جۇمىس ىستەپ جۇرگەن زەينەتكەرلەرگە بيۋدجەتتەن تولەمدەردى توقتاتۋعا قاتىستى» ايتقان ۇسىنىسى بويىنشا ساۋال جولدادى.

«ءسىزدىڭ جۇمىس ىستەيتىن زەينەتكەرلەرگە زەينەتاقى تولەمدەرىن توقتاتۋ تۋرالى ۇسىنىسىڭىز نارازىلىق تۋدىردى. مۇنداي قادام ەڭبەك جانە الەۋمەتتىك تۇرعىدا قامتاماسىز ەتۋ قۇقىعىنا كەپىلدىك بەرەتىن ق ر كونستيتۋتسياسىنا قايشى كەلەدى. ءاربىر قازاقستان ازاماتى زەينەتكەرلىك جاسقا جەتكەندە دە ادال ەڭبەك ەتۋگە قۇقىلى. ولاي بولماسا، كاسىبي مۇعالىمدەردىڭ، دارىگەرلەردىڭ جانە باسقا ساناتتاعى مامانداردىڭ تاپشىلىعىنا بايلانىستى ماسەلەنى قالاي شەشە الامىز؟!»، - دەدى ا. سارىم ق ر ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆانىڭ اتىنا جولداعان ساۋالىندا.

ونىڭ ايتۋىنشا، enbek.kz مالىمەتىنە سايكەس، 4-قاراشاداعى جاعداي بويىنشا 53826 بوس جۇمىس ورنى بولسا، ونىڭ ىشىندە 13356-سىندا ەڭبەك ءوتىلى تالاپ ەتىلمەگەن.

«تاعى ءبىر تەندەنسيا بار - قازاقستاننان شەتەلگە جۇمىس كۇشىنىڭ كەتۋى، ولار نەگىزىنەن - جاستار. بۇل ۇردىستەر جۇمىس ورىندارىنىڭ جەتىسپەۋشىلىگىنەن ەمەس، تومەن جالاقى جانە تارتىمسىز جۇمىس جاعدايلارىنا قاتىستى»، - دەدى دەپۋتات.

ونىڭ پايىمىنشا، جوعارىدا اتالعان باستامالار ۇرپاقتار اراسىنا الاۋىزدىق تۋدىرىپ، زەينەتكەرلەردى جاستارعا قارسى قويادى. زەينەتكەرلەر جاستاردىڭ جۇمىس ورىندارىن «يەمدەنىپ وتىر» دەگەن ارگۋمەنت نەگىزسىز.

«وسى ورايدا الداعى ۋاقىتتا قوعامدا الەۋمەتتىك شيەلەنىس تۋدىراتىن مالىمدەمەلەردەن اۋلاق بولۋعا شاقىرامىن»، - دەدى ايدوس سارىم.

ايتا كەتەيىك، ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا «زەينەتكە شىعىپ، ءبىراق جۇمىس ىستەپ جۇرگەن ازاماتتارعا زەينەتاقى توقتاتىلۋى مۇمكىن بە؟» دەگەن سۇراققا جاۋاپ بەردى.

«وتكەن جۇمادا ەڭبەك رەسۋرستارىن دامىتۋ ورتالىعىندا ب ا ق وكىلدەرىمەن بەيرەسمي كەزدەسۋ وتكىزدىم. بۇل ساۋال سول كەزدەسۋدە قويىلدى، ءبىراق مەنىڭ جاۋابىمنان كونتەكستى جۇلىپ العان. مەن زەينەتكە شىعۋدىڭ 2 ءتاسىلى بارىن ياعني ەرتە جانە كەش شىعۋ جانە بۇل ازىرگە ۇسىنىس ەكەنىن ايتتىم. بۇل ۇسىنىس قازىر زەينەتاقى الىپ وتىرعان ازاماتتارعا ەشقانداي كەدەرگى كەلتىرمەيدى. ولار قالاي زەينەتاقىسىن الدى، قالاي جۇمىس ىستەپ وتىر، سولاي ءارى قاراي جالعاسا بەرەدى»، - دەدى سۆەتلانا جاقىپوۆا ۇكىمەت وتىرىسىنان كەيىن وتكەن باسپا ءسوز ءماسليحاتىندا.

اۆتور

رۋسلان عابباسوۆ