دەپۋتات اۋىل حالقىنىڭ تابىسىن كوتەرۋدەگى كەمشىلىكتەردى اتادى

استانا. KAZINFORM - ءماجىلىس دەپۋتاتى ماقسات تولىقباي «اۋىل اماناتى» باعدارلاماسىن جۇزەگە اسىرۋ كەزىندە انىقتالعان كەمشىلىكتەردى جاريا ەتتى.

- ءبىزدىڭ پارتيا قولعا العان سالالىق باعدارلامانىڭ ءبىرى «اۋىل اماناتى» دەپ اتالادى. ءۇش جىل بۇرىن ىسكە قوستىق، جەتىستىكتەر بارشىلىق. تەك 2023 -جىلى 100 ميلليارد تەڭگە شاعىن نەسيە بەرىلدى. 15000 جاڭا جۇمىس ورنى اشىلدى. ءبىراق باعدارلامانىڭ ورىندالۋىنا كەلگەندە، ايتىلىپ جاتقان سىن از ەمەس. ازىرگە، اۋىل حالقىنىڭ تابىسىن تولتىرۋعا ارنالعان ەلدەگى جالعىز جوبا - وسى بولعاندىقتان، ودان ءۇمىت كۇتەتىن ەل كوپ. ءبىراق، سول ەلدىڭ بۇل جوباعا ايتار وكپە-نازى دا جوق ەمەس. نەگە بۇلاي؟ كاسىپتەن ءناسىبىن تاپقىسى كەلەتىندەردى اكىمدىك اۋرە-سارساڭعا سالعان. بيۋروكراتيا سالدارىنان ءۇش-ءتورت ايلاپ قۇجات جيناتىپ، تابانىنان توزدىرادى. ەكىنشىدەن بۇل جوبانى قارجىلاندىرۋ تەتىگى دە قارىن اشىتادى. نەگىزى جوبانىڭ باستى ماقساتى - 7 جىلدا 350 مىڭ جۇمىس ورنىن اشىپ، جىل سايىن كەمىندە 20-25 مىڭ تۇرعىنعا ميكرونەسيە بەرىلۋ كەرەك. ءبىراق بيۋدجەت تاپشىلىعىنا بايلانىستى، بىلتىر جوباعا بار بولعانى 20 ميلليارد  تەڭگە بولىنگەن، - دەدى ماقسات تولىقباي ءماجىلىستىڭ جالپى وتىرىسىندا پرەمەر-ءمينيستردىڭ ورىنباسارى- ۇلتتىق ەكونوميكا ءمينيسترى سەرىك جۇمانعاريننىڭ اتىنا جولداعان ساۋالىندا.

ونىڭ ايتۋىنشا، كووپەراتيۆتەردە ۆەتەرينار، زووتەحنيك، مەحانيزاتور، اگرونوم سياقتى ماماندار جەتىسپەيدى. سوندىقتان ەڭ الدىمەن اۋىل تۇرعىندارى اراسىندا جالپى جوبا تۋرالى، سونىڭ ىشىندە اۋىل كووپەراتيۆتەرىنىڭ جۇرتقا، نارىققا بەرەتىن پايداسى مەن مۇمكىندىكتەرى تۋرالى ءتۇسىندىرۋ جۇمىستارىن شيراتقان ءجون.

- جالپى كرەديتتىڭ ءبارىن تەك مال ساتىپ الۋعا عانا بەرۋگە بولمايدى. مال جاتقانعا ەمەس، باققانعا بىتەدى. ال ونى باعىپ قاعۋ ءۇشىن جايىلىمداردىڭ جايىن ايتپاعاندا، ەلدە ءالى كۇنگە دەيىن كوپكە ۇلگى بولاتىن جەم-ءشوپ دايىندايتىن ورتالىقتار جۇيەسى جوق. بۇل دا وزەكتى. سونىمەن قاتار قازىر شالعايداعى اۋىلعا ليزينگكە تراكتورلار بەرىلە باستادى. جاقسى باستاما. ءبىراق تەحنيكا ەرتەڭ سىنباي ما؟ وعان ارى قاراي قوسالقى بولشەكتەرىن قايدان الادى ەل؟ جاپپاي تراكتورلارعا قىزمەتتى كىم كورسەتەدى؟ تەحنيكانىڭ ساقتالۋىن كىم قامتاماسىز ەتەدى؟ قىسقاسى ايتا بەرسەڭ باسى اشىق سۇراقتار وتە كوپ. سوندىقتان سىزدەن، وسى ماسەلەلەرگە شۇعىل ارادا نازار اۋدارۋىڭىزدى سۇرايمىن، - دەدى دەپۋتات.

اۆتور

رۋسلان عابباسوۆ