دەپۋتات اليمەنت مولشەرىن ايقىنداۋ تەتىگىن قايتا قاراۋدى ۇسىندى

استانا. KAZINFORM - بالالاردىڭ ومىرىنە ءتيىستى جاعداي جاساۋ ءۇشىن اليمەنت ءاردايىم جەتە بەرمەيدى. سەناتور جاننا اسانوۆا وسىنداي تولەمدەردى ەسەپتەۋ ءتارتىبىن قايتا قاراۋدى ۇسىندى. سوندىقتان ول ءوزىنىڭ دەپۋتاتتىق ساۋالىندا وسى سالاداعى پروبلەمانى كوتەردى.

دەپۋتاتتىڭ ايتۋىنشا، «نەكە (ەرلى-زايىپتىلىق) جانە وتباسى تۋرالى» كودەكستە اليمەنت ءبىر بالاعا اتا-انا تابىسىنىڭ تورتتەن ءبىرىن قۇرايتىنى كورسەتىلگەن. اليمەنت تولەيتىن اتا-انا كوبىنەسە ءىس جۇزىندە ەڭ تومەنگى جالاقىنى 85 مىڭ تەڭگە ەتىپ كورسەتىپ، كىرىسىن تومەندەتىپ جۇرەدى. ناتيجەسىندە ءبىر بالاعا اليمەنت نەبارى 22 مىڭ تەڭگەنى قۇرايدى.

«ءبىزدىڭ ەلىمىزدەگى ءاربىر بالا تەك تاماق پەن كيىم عانا ەمەس، سونىمەن قاتار ءبىلىم الۋعا، مەديتسينالىق قىزمەت پەن باسقا دا الەۋمەتتىك يگىلىكتەرگە قول جەتكىزۋدى قامتيتىن لايىقتى ءومىر ءسۇرۋ دەڭگەيىنە قۇقىلى. اليمەنت مولشەرىن انىقتاۋدىڭ قولدانىستاعى ءتارتىبى ەسكىردى جانە بالانىڭ جاس ەرەكشەلىگى دە ەسكەرىلمەيدى. بۇل بالالاردىڭ تولىققاندى دامۋىنا قاجەت رەسۋرسقا قول جەتكىزە الماۋىنا اكەلەدى. قازىرگى كەزدە ەلىمىزدىڭ زاڭناماسىندا اليمەنتتىڭ ەڭ تومەنگى مولشەرى تۋرالى تۇسىنىك جوق، ويتكەنى ولار اليمەنت تولەۋشىنىڭ كىرىس مولشەرىنە قاراماستان ۇلەستىك قاتىناستا ەسەپتەلەدى. مۇنىڭ ءبارى ءوندىرىپ الىناتىن اليمەنت مولشەرىن ازايتۋ ماقساتىندا تولەۋشىگە ءوزىنىڭ ناقتى تابىسىن جاسىرۋىنا الىپ كەلەدى»، - دەدى جاننا اسانوۆا ۇكىمەت باسشىسىنىڭ ورىنباسارى تامارا دۇيسەنوۆانىڭ اتىنا جولداعان ساۋالىندا.

سونىمەن قاتار دەپۋتات سوت ارقىلى اليمەنت مولشەرىن وزگەرتۋ نەمەسە ولاردى بەلگىلەنگەن مولشەردە بەلگىلەۋ مۇمكىندىگىنە قاراماستان، بورىشكەردىڭ ناقتى كىرىسىن ەڭبەك قاتىناستارىنىڭ ەرەكشەلىگىنە بايلانىستى دالەلدەۋ قيىن ەكەنىن اتاپ ءوتتى.

«وتباسىلىق جاعداي مەن بالالار سانى جانە ولاردىڭ ناقتى سۇرانىسىن ەسكەرە وتىرىپ، اليمەنتتىڭ نەعۇرلىم ءادىل مولشەرىن بەلگىلەۋ ءۇشىن نەكە- وتباسى زاڭناماسىنىڭ ەرەجەلەرىن قايتا قاراۋ مۇمكىندىگىن قاراستىرۋدى سۇرايمىن. جاسىنا جانە الەۋمەتتىك فاكتورلارعا بايلانىستى بالالارعا نەگىزگى قاجەت زاتتار مەن سۇرانىسىنا تالداۋ جاساۋ كەرەك. اليمەنتتى تومەندەتۋدىڭ الدىن الۋ ءۇشىن جۇمىس بەرۋشىلەر مەن ءوزىن ءوزى جۇمىسپەن قامتىعانداردىڭ كىرىستەردى جاسىرۋىن انىقتاۋ تەتىگىن ازىرلەۋ كەرەك»، - دەدى جاننا اسانوۆا.

ايتا كەتەيىك، تارازدا 4 ميلليون تەڭگەدەن استام اليمەنت تولەمەگەن ادام انىقتالىپ، سوتقا دەيىنگى تەرگەۋ باستالدى.

استانادا اليمەنت بەرەشەگى بار 150 بورىشكەرگە قۇمار ويىن ويناۋعا تىيىم سالىندى.