دەپۋتات اۋە بيلەتتەرى باعاسىنىڭ قىمبات بولۋى سەبەبىن اتادى

استانا. KAZINFORM - سەناتور سۇيىندىك الداشەۆ ءوزىنىڭ دەپۋتاتتىق ساۋالىندا قازاقستاننىڭ ازاماتتىق اۆياتسياسىنداعى پروبلەمالار تۋرالى جاريا ەتتى.

دەپۋتاتتىڭ ايتۋىنشا، ءساۋىر ايىنىڭ باسىندا سەناتتىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ مۇشەلەرى دوڭگەلەك ۇستەل وتىرىسىن وتكىزىپ، سالاداعى نەگىزگى ماسەلەلەردى تالقىلادى. بىرىنشىدەن، بۇل اۆياتسيالىق وتىننىڭ جەتىسپەۋشىلىگى. وتاندىق مۇناي وڭدەۋ زاۋىتتارى ءوسىپ كەلە جاتقان سۇرانىستى جابا المايدى جانە ايىرماشىلىقتى يمپورتتان الۋعا تۋرا كەلەدى. قازىردىڭ وزىندە وتىن تاپشىلىعى شامامەن 237 مىڭ توننا. 2030 -جىلعا قاراي بۇل تاپشىلىق 550 مىڭ تونناعا جەتۋى مۇمكىن.

قازاقستاندىقتاردى اۋە بيلەتتەرىنىڭ باعاسى دا الاڭداتىپ وتىر. دەپۋتات اتاپ وتكەندەي، بيلەت قۇنىنىڭ قۇرىلىمىندا 36,5 پايىزى اۆياتسيالىق وتىنعا جۇمسالاتىن شىعىندى قۇرايدى. تەحنيكالىق قىزمەت كورسەتۋ - ,9، اۋەجايعا قىزمەت كورسەتۋ - ,7 جانە جولاۋشىلارعا قىزمەت كورسەتۋ - %6,1. سونىمەن قاتار، جانارماي نارىعىنا ەشكىم كىرە المايدى، اشىق ەمەس.

- اۆياوتىندى ساتۋدان تۇسكەن كىرىس اۋەجايلارداعى كىرىستىڭ نەگىزگى بولىگىن قۇرايدى. باسقا ويىنشىلاردىڭ وسى ينفراقۇرىلىمعا قول جەتكىزۋىنە مۇددەلى ەمەس اۋەجايلار بار، بۇل اۆياكومپانيالار ءۇشىن وتىننىڭ جوعارى قۇنىنىڭ سەبەبى سانالادى جانە ناتيجەسىندە اۋە بيلەتتەرىنىڭ قۇنىنا اسەر ەتەدى. وكىنىشكە قاراي، بۇگىندە اۆياوتىندى ساتۋدىڭ جانە ونىڭ باعاسىن بەلگىلەۋدىڭ اشىق تەتىگى جوق، سونداي-اق مەملەكەتتىك ورگانداردىڭ بۇل ماسەلەنى رەتتەۋگە ءبىرىڭعاي كوزقاراسى جوق، - دەدى سۇيىندىك الداشەۆ ۇكىمەت باسشىسىنىڭ اتىنا جولداعان ساۋالىندا.

سەناتور اۋەجايلاردى دامىتۋعا جۇيەلى كوزقاراستىڭ جوقتىعىنا دا توقتالدى. ولاردىڭ كوپشىلىگى جەرگىلىكتى بيۋدجەتتەردەن قارجىلاندىرىلادى جانە شىعىنعا ۇشىرايدى. ينفراقۇرىلىم توزعان، جابدىق ەسكىرگەن ءارى اۋەجايلاردىڭ جارتىسى شۇعىل جوندەۋدى قاجەت ەتەدى.

- وتاندىق ازاماتتىق اۆياتسيانى باسقارۋدىڭ ءتيىمدى وڭتايلى ۇلگىسىن ازىرلەۋدى ۇسىنامىز. وتاندىق مۇناي وڭدەۋ زاۋىتتارىندا ءوندىرىستى ۇلعايتۋ ماسەلەسىن شەشۋ كەرەك. اۆياكومپانيانى اۆياوتىنمەن قامتاماسىز ەتۋ جونىندە ءبىرىڭعاي جۇيەلى تاسىلدەر ازىرلەنۋى ءتيىس. اۋەجايلار بەيىندى ەمەس قىزمەت تۇرلەرىن قوسپاعاندا، نەگىزگى قىزمەت تۇرىنە نازار اۋدارۋى كەرەك. وسى سالانىڭ ينۆەستيسيالىق تارتىمدىلىعىن ارتتىرۋ جونىندەگى جۇمىستى جانداندىرۋ، اۋەجايلاردىڭ قىزمەتىنە ينۆەستورلاردى تارتۋ جونىندەگى وڭتايلى تەتىكتەردى ازىرلەۋ قاجەت، - دەدى دەپۋتات.

ەسكە سالساق، جاقىندا پرەمەر-مينيستر ولجاس بەكتەنوۆ مەملەكەت باسشىسىنىڭ اۆياوتىن نارىعىن دامىتۋعا قاتىستى تاپسىرمالارىن جۇزەگە اسىرۋ ماسەلەلەرى جونىندە جيىن وتكىزدى.

سونىمەن قاتار، قازاقستاندا ەكولوگيالىق اۆياوتىن وندىرەتىن زاۋىت سالىناتىنى ءمالىم بولدى.