دەسانتتىق-شابۋىلداۋ اسكەرلەرىنىڭ قۇرىلعانىنا 25 جىل - فوتورەپورتاج
قونايەۆ. KAZINFORM - بۇگىن قونايەۆ قالاسىنداعى 32363 اسكەري بولىمىندە قازاقستاننىڭ دەسانتتىق-شابۋىلداۋ اسكەرلەرىنىڭ قۇرىلعانىنا 25 جىل تولۋىنا ارنالعان سالتاناتتى ءىس-شارا ءوتتى.
مەرەكەلىك ءىس-شارا دەسانتشى كاپيتان قايرات قۇدابايەۆتىڭ ەسكەرتكىشىنە گۇل شوقتارىن قويۋ راسىمىمەن باستالدى.
ق ر دەسانتتىق-شابۋىلداۋ اسكەرلەرىنىڭ قولباسشىسى گەنەرال-مايور الماز جۇماكەيەۆ ساربازدان باستاپ، گەنەرالعا دەيىن سارا جولدى ءوتۋ وڭاي شارۋا ەمەس ەكەنىن اتاپ ءوتتى. ول وسى سالاداعى بارلىق بۋىن وكىلدەرىنىڭ اسكەردىڭ قالىپتاسۋى مەن دامۋىنا قوسقان ۇلەسىن تىلگە تيەك ەتتى.
- قازاقستاننىڭ دەسانتىنىڭ تاريحىن ايتىپ وتەر بولسام، 1991 -جىلى كەڭەس وداعى قورعانىس ءمينيسترىنىڭ شەشىمىمەن 35-گۆارديالىق دەسانتتىق-شابۋىلداۋشى بريگادا كوتبۋس قالاسىنان كاپشاعايعا كوشىرىلدى.1992-جىلدىڭ 13-مامىرىندا بۇل بريگادا قازاقستان قارۋلى كۇشتەرىنىڭ قۇرامىنا ءوتتى. وسى ساتتەن باستاپ قازاقستان ارمياسىندا ءوز دەسانتى - 35-گۆارديالىق بريگادا پايدا بولدى، - دەدى الماز جۇماكەيەۆ.
2000 -جىلدىڭ 6 -شىلدەسىندە مەملەكەت باسشىسىنىڭ جارلىعىمەن ءموبيلدى كۇشتەر قۇرىلىپ، ولاردىڭ قۇرامىنا 35-بريگادا دا ەندى.
- قازىر ءبىزدىڭ قۇرامدا 13 اسكەري ءبولىم بار. ءبىز 1500 ادامنان 9000 عا جۋىق قۇرامعا دەيىن وستىك. قازاقستان قارۋلى كۇشتەرى ىشىندە العاش رەت ءدال وسى دەسانتتىق- شابۋىلداۋشى اسكەرلەردە ۇشقىشسىز اۋە جۇيە ءبولىمى قۇرىلدى. قۇرلىقتاعى توپ قۇرامىندا العاش رەت راديوەلەكتروندىق كۇرەس جانە راديوەلەكتروندىق بارلاۋ بولىمشەسى پايدا بولدى. بارلاۋ بولىمشەلەرىن - باتالوندارداعى بارلاۋ ۆزۆودتارىنان باستاپ جەكە بارلاۋ پولكىنە دەيىن تولىق قالپىنا كەلتىردىك. بايلانىس بولىمشەلەرى تولىق جاڭعىرتىلدى. باتالونداردا بارلاۋ جانە بايلانىس باستىقتارىنىڭ لاۋازىمدارى ەنگىزىلدى، - دەدى الماز جۇماكەيەۆ.
25 جىل ىشىندە دەسانتتىق- شابۋىلداۋشى اسكەرلەر قاتارىنان 18 گەنەرال شىقتى، 300 دەن استام وفيتسەر پولكوۆنيك شەنىن الدى، 107 اسكەري قىزمەتشى اسكەردىڭ دامۋىنا قوسقان ەلەۋلى ۇلەسى ءۇشىن مەملەكەتتىك ناگرادالارمەن ماراپاتتالدى.
دەسانتتىق-شابۋىلداۋشى اسكەرلەر جوعارى دايىندىق دەڭگەيىن كورسەتىپ، ماڭىزدى مىندەتتەردى اتقارۋدى جالعاستىرىپ كەلەدى.
سالتاناتتى شارا اياسىندا دەسانتتىق- شابۋىلداۋ قۇراماسىنىڭ اسكەري قىزمەتشىلەرى جاۋىنگەرلىك دايىندىقتىڭ ەلەمەنتتەرىن كورسەتتى.
مەرەكەنىڭ ەڭ اسەرلى ءساتى - جەكە قۇرامنىڭ پاراشيۋتپەن سەكىرۋى بولدى. وسىلايشا، قازاقستاندىق دەسانتتىڭ شەبەرلىگىن پاش ەتتى.
شارا مەرەكەلىك كونسەرتپەن اياقتالدى.
وسىعان دەيىن اسكەري قىزمەتشىلەرگە اقشالاي ريزىق تولەۋ قاعيدالارى كونستيتۋتسياعا سايكەستەندىرىلگەنى تۋرالى جازعانبىز.