دەسانتشى قىزدار اسپان استىندا قالقىدى
قارۋلى كۇشتەردىڭ قونايەۆ گارنيزونىنداعى دەسانتتىق- شابۋىلداۋ بريگاداسىنىڭ اسكەري قىزمەتشىلەرى پاراشيۋتپەن جوسپارلى سەكىرۋدى ورىندادى.
ولاردىڭ ىشىندە حالىقارالىق ايەلدەر كۇنى قارساڭىندا «مەن ماماندىعىمدى جاقسى كورەمىن» چەللەندجىن باستاعان 13 سانيتارلىق نۇسقاۋشى قىز بار، دەپ حابارلايدى Egemen.kz ق ر قورعانىس مينيسترلىگىنە سىلتەمە جاساپ.
قىزداردىڭ ءبارى 35-گۆارديالىق دەسانتتىق- شابۋىلداۋ بريگاداسىندا ءبىر جىلدان استام ۋاقىت قىزمەت ەتىپ كەلەدى جانە ولاردىڭ ءبىرازى كەمىندە ءۇش رەت پاراشيۋتپەن سەكىرگەن. نازىك جاندىلاردىڭ كوبى دەسانتتىق-شابۋىلداۋ بولىمشەلەرىنىڭ سانيتارلىق نۇسقاۋشىلارى لاۋازىمدارىندا قىزمەت ەتەدى جانە پاراشيۋتپەن سەكىرۋ ولار ءۇشىن ءقاۋىپتى ەمەس، جاۋىنگەرلىك دايىندىق ەلەمەنتتەرىنىڭ ءبىرى بولىپ سانالادى.
ەفرەيتور اينۇر ماحانتايەۆا اۋەدەن پاراشيۋتپەن سەكىرۋگە العاش رەت قادام باستى. ارۋ قىز سەكىرۋگە ۇزاق دايىندالعانىن جەتكىزدى. باستاپقىدا قورقىنىشتى بولسا دا، دوستارى مەن ارىپتەستەرى ونى جەردە دە، تىكۇشاقتا دا قولداپ وتىردى.
«ەكى اي بويى مەن سەكىرۋگە دايىندالدىم، د-6 4 سەريالى پاراشيۋت جۇيەسىنىڭ بارلىق تاكتيكالىق- تەحنيكالىق سيپاتتامالارى مەن قۇرامداس بولىكتەرىن، دۇرىس ورالۋىن مۇقيات ۇيرەندىم. اۋە- دەسانتتىق كەشەنىندە سەكىرۋدىڭ جەردەگى ەلەمەنتتەرى، سونىڭ ىشىندە شتاتتان تىس جاعدايلاردى دا پىسىقتادىم»، دەدى اينۇر ماحانتايەۆا.
بريگادا كومانديرىنىڭ اۋە-دەسانتتىق دايىندىق جونىندەگى ورىنباسارى پودپولكوۆنيك ابدۋراحيم يۋلداشيەۆتىڭ ايتۋىنشا، اسىرەسە قىزدار مۇمكىندىگىنشە ءجيى سەكىرۋدى قالايدى ەكەن، سەبەبى ولاردى دەسانتتىق-شابۋىلداۋ اسكەرلەرىندەگى قىزمەتى ىنتالاندىراتىن كورىنەدى.
دەسانتشىلار «مەن ماماندىعىمدى جاقسى كورەمىن» چەللەندجىن باستاپ، پوگون كيگەن قىزداردى وسى باستامانى قولداۋعا شاقىرادى.
وسى كۇنى 35- دەسانتتىق- شابۋىلداۋ بريگاداسىنان بارلىعى 160 تان اسا اسكەري قىزمەتشى پاراشيۋتپەن سەكىردى، ونىڭ ىشىندە 96 ادام اسكەري بورىشىن وتەپ جۇرگەن ساربازدار.
بوتاكوز باقبەرگەن