دۇنيەجۇزىلىك كوشپەندىلەر ويىنىنىڭ اشىلۋ راسىمىنە بارلىق بيلەت ساتىلىپ كەتتى
استانا. قازاقپارات - 8-قىركۇيەكتە «استانا- ارەنا» ستاديونىندا وتەتىن دۇنيەجۇزىلىك كوشپەندىلەر ويىندارىنىڭ اشىلۋ سالتاناتىنا بارلىق بيلەت ساتىلىپ كەتتى. بۇل تۋرالى كوشپەندىلەر ويىندارىنا دايىندىق جانە وتكىزۋ ديرەكسياسى باسشىسىنىڭ ورىنباسارى ابىلاي قوندىبايەۆ ايتىپ بەردى.
«بۇگىنگى تاڭدا بارلىق سپورت تۇرلەرىنە بيلەتتەر اشىق ساتىلىمدا. ءبىراق ويىنداردىڭ اشىلۋ سالتاناتىنا بارلىق بيلەت ساتىلىپ كەتتى. ازىرگە سپورتتىق شارالارعا 10 مىڭنان استام بيلەت ساتتىق. ەڭ كوپ قىزىعۋشىلىق تانىتقان سپورت تۇرلەرىنىڭ اراسىندا جامبى اتۋ، ءداستۇرلى ساداق اتۋ، كوكپار، بايگە بار»، - دەدى سپيكەر «قازانات» يپپودرومىندا وتكەن باسپا ءسوز ءماسليحاتىندا.
6-تامىز كۇنى دۇنيەجۇزىلىك كوشپەندىلەر ويىندارىنىڭ اشىلۋ سالتاناتى مەن بارلىق جارىسىنا بيلەتتەر ساتىلىمى باستالعان بولاتىن. اشىلۋ راسىمىنە بيلەتتەر 15000-50000 تەڭگە ارالىعىندا ساتىلدى.
بۇل رەتتە، جارىستاردىڭ ورتاشا بيلەت قۇنى - 3600 تەڭگە. ماسەلەن، قازاق كۇرەسى، الىش جانە كوراش سپورتىنا بيلەتتەر 2500 تەڭگەدەن 7500 تەڭگە ارالىعىندا ەكەن. جارىستار جاقسىلىق ۇشكەمپىروۆ اتىنداعى جەكپە-جەك سارايىندا وتەدى. «الاۋ» مۇزايدىنىندا اسىق اتۋ، وردو، ماس-رەستلينگ، كۇراش، ارقان تارتۋ جانە اشىرتمالى ابا گۇرەشى بويىنشا كىل مىقتىلار جۇلدەگە تالاسادى. بيلەت قۇنى 1000-3000 تەڭگە ارالىعىندا.
ازاماتتاردىڭ جەكەلەگەن ساناتتارى ءۇشىن ءارتۇرلى جەڭىلدىكتەر قاراستىرىلعان. P جەڭىلدىك مەكتەپ وقۋشىلارى (6 جاستان 18 جاسقا دەيىن) مەن زەينەتكەرلەر ءۇشىن قولجەتىمدى. 5 جاسقا دەيىنگى بالالار (ورىنسىز) مەن I جانە II توپتاعى مۇگەدەكتەر بيلەتتەردى تەگىن الا الادى. جەڭىلدىك بيلەتتەرىن راستايتىن قۇجاتتى كورسەتكەننەن كەيىن وففلاين كاسسالاردان ساتىپ الۋعا بولادى.
بارلىق جارىسقا بيلەتتەردى رەسمي بيلەت وپەراتورىنىڭ www.zakazbiletov.kz سايتىنان ساتىپ الۋعا بولاتىنىن ەسكە سالامىز.
ايتا كەتەيىك، 5- دۇنيەجۇزىلىك كوشپەندىلەر ويىندارى استانا قالاسىندا 8-13-قىركۇيەك ارالىعىندا وتەدى. وندا سپورتتىڭ 21 ءتۇرى بويىنشا 97 مەدال جيىنتىعى ساراپقا سالىنباق.
الەمدىك دوداعا 89 ەلدەن 2800 گە جۋىق قاتىسۋشى كەلەدى دەپ جوسپارلانىپ وتىر. سونىمەن بىرگە، استاناعا 100 مىڭعا جۋىق تۋريست كەلۋى مۇمكىن. دۇنيەجۇزىلىك كوشپەندىلەر ويىنىنا قازاق سپورتشىلارى بارلىق 21 سپورت تۇرىنەن قاتىسادى. سونىڭ بارىنەن مەدال الۋدى جوسپارلانعان.
اۆتور
ايجان سەرىكجان قىزى