دۇنيەجۇزىلىك كوشپەندىلەر ويىنىندا قازاقستان قانشا مەدال الۋى مۇمكىن

استانا. KAZINFORM - دۇنيەجۇزىلىك كوشپەندىلەر ويىنىنا قازاق سپورتشىلارى بارلىق 21 سپورت تۇرىنەن قاتىسادى. سونىڭ بارىنەن مەدال الۋدى جوسپارلانعان. بۇل تۋرالى ۇلتتىق جانە ات سپورتى تۇرلەرى ورتالىعىنىڭ قوعاممەن بايلانىس ءبولىمىنىڭ باسشىسى قايىرحان ماۋلەن ايتىپ بەردى.

«كەز كەلگەن ۇلكەن سپورتتىق شارا الدىندا باپكەرلەر مەدال سانى بويىنشا مىندەتتەمە الادى. سونىڭ ىشىندە كوكپاردان التىن جۇلدە بولجاپ وتىرمىز. جامبى اتۋدان 4 ستيل بويىنشا جارىس وتەدى - ونىڭ ەكەۋىنەن كەم دەگەندە ەكى التىن الۋ جوسپاردا بار. قازاق كۇرەسىنەن قىزداردا 8، ەرلەردە - 8، باس-اياعى 16 سالماق دارەجەسىندە جارىستار بولادى. سونىڭ كەم دەگەندە 70-80 پايىزىندا التىن الۋ جوسپارلانعان»، - دەدى قايىرحان ماۋلەن.

ودان بولەك، كۇراش، اشتىرمالى ابا گيۋرەش سەكىلدى سپورت تۇرلەرىنەن ۇلتتىق قۇرامالار جاساقتالعان. توعىزقۇمالاق، اسىق اتۋ، تەڭگە ءىلۋ، اۋدارىسپاقتا دا التىن جۇلدە الۋ كوزدەلگەن.

«نەگىزگى مىندەت - جالپى مەدال جيىنتىعىندا قازاقستاننىڭ ءبىرىنشى ورىن الۋى»، - دەدى ق. ماۋلەن.

ايتا كەتەيىك، 5- دۇنيەجۇزىلىك كوشپەندىلەر ويىندارى استانا قالاسىندا 8-13-قىركۇيەك ارالىعىندا وتەدى. وندا سپورتتىڭ 21 ءتۇرى بويىنشا 97 مەدال جيىنتىعى ساراپقا سالىنباق.

الەمدىك دوداعا 89 ەلدەن 2800 گە جۋىق قاتىسۋشى كەلەدى دەپ جوسپارلانىپ وتىر. سونىمەن بىرگە، استاناعا 100 مىڭعا جۋىق تۋريست كەلۋى مۇمكىن.

اۆتور
ايجان سەرىكجان قىزى