دۇنيەجۇزىلىك كوشپەندىلەر ويىندارىنا ارنالعان مەرەيتويلىق پوشتا ماركاسى اينالىمعا شىقتى
استانا. KAZINFORM - دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ ديرەكتسياسى جانە «قازپوشتا» ا ق باسشىلىعى بىرلەسىپ، ءدۇبىرلى دودا قارساڭىندا مەرەيتويلىق پوشتا ماركاسىن جارىققا شىعاردى.
جاڭا پوشتا ماركاسىن تانىستىرۋ راسىمىندە 5- دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ ديرەكتسياسىنىڭ باسشىسى نايل نۇروۆ بۇل وقيعا كوشپەندى حالىقتاردىڭ باي مادەني مۇراسىن قۇرمەتتەيتىن جانە باعالايتىن بارلىق جاندار ءۇشىن ماڭىزدى ءىس- شارا ەكەنىن اتاپ ءوتتى.
«5-دۇنيەجۇزىلىك كوشپەندىلەر ويىندارى - بۇل تەك سپورتتىق ءىس- شارا عانا ەمەس، ءبىزدىڭ داستۇرىمىزبەن، مادەني مۇرامىزبەن بىرەگەي بايلانىستىڭ قۇرالى. مەرەيتويلىق پوشتا ماركاسىن شىعارۋ - وتكەنىمىزگە دەگەن ماقتانىشتىڭ جانە ونى بولاشاق ۇرپاققا جەتكىزۋگە دەگەن ۇمتىلىسىمىزدىڭ سيمۆولى. بۇل باستاما كوشپەندى حالىقتاردىڭ مادەني داستۇرلەرىن ساقتاۋعا جانە دامىتۋعا ءوز ۇلەسىن قوسادى دەگەن سەنىمدەمىز»، - دەدى نايل نۇروۆ.
مەرەيتويلىق پوشتا ماركاسى 500 دانامەن شىققان. ياعني، ساناۋلى. بۇگىننەن باستاپ ەلىمىزدىڭ ءار وڭىرىندەگى پوشتا بولىمشەلەرىنەن ماركانى پايدالانىپ، ەل ىشىندە، الىس شەتەلگە سالەمدەمە، حات جولداۋعا مۇمكىندىك بار. ەستەلىك رەتىندە ساتىپ الساڭىز دا بولادى. باعاسى - 500 تەڭگە.
ايتپاقشى، الەم بويىنشا حوببي رەتىندە ماركا جيناۋ ەكىنشى ورىندا تۇر ەكەن. بۇل رەتتە، «قازپوشتا» ا ق ماماندارى 10، 20 جىلدان كەيىن دۇنيەجۇزىلىك كوشپەندىلەر ويىندارىنا ارنالعان مەرەيتويلىق پوشتا ماركاسىنىڭ قۇنى اسپانداپ كەتەتىنىن بولجاپ وتىر.
«قازپوشتا» ا ق باسقارما ءتورايىمى اسەل جاناسوۆا دۇنيەجۇزىلىك كوشپەندىلەر ويىندارى اياسىندا مەرەيتويلىق پوشتا ماركاسىن شىعارۋ - مادەني مۇرامىزعا دەگەن قۇرمەت بەلگىسى عانا ەمەس، كوشپەندى حالىقتاردىڭ داستۇرلەرىن ساقتاۋ مەن ناسيحاتتاۋعا قوسقان ەلەۋلى ۇلەس ەكەنىن اتاپ ءوتتى.
5- دۇنيەجۇزىلىك كوشپەندىلەر ويىندارىنا ارنالعان مەرەيتويلىق پوشتا ماركاسى بىرەگەي فيلاتەليالىق ونەر تۋىندىسى بولىپ تابىلادى. ماركانىڭ اۆتورى - دۇنيەجۇزىلىك كوشپەندىلەر ويىندارى ديرەكتسياسىنىڭ ماركەتينگ ءبولىمىنىڭ باسشىسى سەرىك بۋكسيكوۆ. ماركادا ەجەلگى ءداستۇردىڭ ساقتاۋشىسى «بۇركىتشى» بەينەلەنگەن. ول تاباندىلىق پەن ادالدىقتى بەينەلەيدى. ماركانىڭ ورتالىق ەلەمەنتى - كوشپەندىلەر فيلوسوفياسىندا جۇزەگە اسىرىلعان ءومىردىڭ اينالىمى مەن ۋاقىت پەن كەڭىستىكتىڭ بىرلىگىن بەينەلەيتىن گوفرلەنگەن شەڭبەر ەكەنىن اتاپ وتكەن ءجون.
ەستەرىڭىزگە سالساق، 5- دۇنيەجۇزىلىك كوشپەندىلەر ويىندارى استانا قالاسىندا 8-13 قىركۇيەك ارالىعىندا وتەدى. الەمدىك دوداعا 89 ەلدەن 2800 گە جۋىق قاتىسۋشى كەلەدى دەپ جوسپارلانىپ وتىر. سپورتتىڭ 21 ءتۇرى بويىنشا 97 مەدالدەر جيىنتىعى ساراپقا سالىنباق.
اۆتور
ورالحان قوجانوۆ