دۇنيەجۇزىلىك كوشپەندىلەر ويىندارى: سيفر مەن قىزىق دەرەك

استانا. قازاقپارات - 8-13-قىركۇيەك ارالىعىندا ەلوردادا ۇلى دالانى دۇبىرگە بولەگەن 5-دۇنيەجۇزىلىك كوشپەندىلەر ويىندارى دۇركىرەپ ءوتتى.

جەر- جاھاننىڭ 90 عا جۋىق مەملەكەتىنەن كەلگەن 2500 گە تارتا سپورتشى ءبىر اپتاعا جۋىق كوشپەندى حالىقتاردىڭ ءتول سپورتىنان سىنعا ءتۇسىپ، 97 مەدال جيىنتىعىن ساراپقا سالدى. وسى ورايدا تۋريزم جانە سپورت مينيسترلىگى كوشپەندىلەر وليمپياداسىندا تىركەلگەن قىزىقتى دەرەكتەردى ۇسىندى.

قازاقستان قورجىنىندا قانشا جۇلدە بار؟

التى كۇنگى الاماندا ۇلتتىق قۇراما سپورتشىلارى 43 التىن، 32 كۇمىس، 37 قولا (جالپى 112 مەدال) جۇلدە ولجالاپ، جالپى كوماندالىق ەسەپتە ءبىرىنشى ورىنعا يە بولدى. ويىنداردا جالپى سانى 33 ەلدىڭ سپورتشىسى مەدال يەلەندى. جۇلدە العان مەملەكەتتەر قاتارىندا مۇحيتتىڭ ارعى بەتىنەن كەلگەن كانادا مەن مەكسيكا وكىلدەرى دە بار.

قازاق كۇرەسىنە قانشا سپورتشى قاتىستى؟

ءدۇبىرلى دودا اياسىندا ءتول كۇرەسىمىزدەن وتكەن جارىسقا الەمنىڭ 44 ەلىنەن 294 پالۋان باق سىنادى. بۇل - قازاق كۇرەسىنىڭ دۇنيەجۇزى بويىنشا قارقىندى دامىپ كەلە جاتقانىنىڭ ايقىن كورىنىسى. جۇلدە العان ەلدەر قاتارىندا كورشى مەملەكەتتەردەن بولەك، ەۋروپا پالۋاندارى دا بار. اتاپ ايتقاندا، قازاق كۇرەسىنەن بەلدەسۋلەردە يتاليا، پولشا، ماجارستان، نيدەرلاند سپورتشىلارى جۇلدەگە قول جەتكىزدى.

جانكۇيەرى ەرەكشە كوپ بولعان سپورت ءتۇرى

5-دۇنيەجۇزىلىك كوشپەندىلەر ويىندارىندا ەڭ كوپ كورەرمەن كوكپار مەن كوكبورى جارىستارىنا كەلدى. «قازانات» يپپودرومىندا وتكەن ەكى سايىستىڭ دا فينالدىق باسەكەسىن 20 مىڭ (ءار فينالعا 10000 كورەرمەن كەلدى) جانكۇيەر تاماشالادى.

ەڭ كوپ سپورتشى الىپ كەلگەن ەلدەر

قازاقستان قۇراماسىنىڭ سپورتشىلارىن ەسەپكە الماعاندا، بيىلعى ويىندارعا ەڭ كوپ سپورتشىنى قىرعىزستان قۇراماسى قوستى - 172 سپورتشى.

ويىندارعا قاتىسقان ەڭ جاس سپورتشى - حامزا امانگەلدى. الامان بايگەدە باق سىناعان حامزا نەبارى 10 جاستا.

ەڭ ەگدە سپورتشى - 80 جاستاعى يسپانيالىق سولەداد حيمەنەس كارريون. ول ءداستۇرلى ساداق اتۋ سايىسىندا ونەر كورسەتتى.

ويىندارعا قانشا ەرىكتى جۇمىلدىرىلدى؟

سپورتشىلار مەن دەلەگاتسيا وكىلدەرىنە 1600 ۆولونتەر كومەك كورسەتتى. ونىڭ ىشىندە 20 شەتەلدىك ەرىكتى بار.

5-دۇنيەجۇزىلىك كوشپەندىلەر ويىندارىنا قانشا جىلقى قاتىستى؟

كوشپەندىلەر ويىندارىندا كوپ سپورت ءتۇرى جىلقىلاردىڭ كومەگىمەن وينالاتىن بولعان سوڭ، بيىلعى دوداعا جالپى سانى 499 باس جىلقى قاتىستى. ونىڭ ىشىندە 100 باس ۇلتتىق قۇرامانىڭ جىلقىسى، ويىنداردى ۇيىمداستىرۋ ديرەكتسياسى جىلقىسىز كەلگەن وزگە ەلدەردىڭ قاتىسۋشىلارى ءۇشىن 300 باس جىلقى جالعا العان. سونداي- اق، قىرعىز رەسپۋبليكاسى - 91، وزبەكستان رەسپۋبليكاسى - 8 باس جىلقى اكەلدى.

سونىمەن قاتار جارىستارعا 41 قۇس قاتىستى. ونىڭ ىشىندە 9 باس ۇلتتىق قۇرامعا، 8 باس قىرعىزستان رەسپۋبليكاسىنا تيەسىلى. 24 باس قۇستى وزگە ەلدەر ءۇشىن قۇسبەگىلىك فەدەراتسياسى ۇسىندى.

كوشپەندىلەر ويىندارى يۋنەسكو-نىڭ زاتتاي ەمەس مادەني مۇرالارىنىڭ تىزىمىنە ەنگەنىن جازعان بولاتىنبىز.

اۆتور

ەلميرا ورالبايەۆا