دۇنيەجۇزىلىك كوشپەندىلەر ويىندارى: ءدۇبىرلى دوداعا ءبىر اپتا قالدى

استانا. KAZINFORM - ءبىر اپتادان سوڭ الەم نازارى استاناعا اۋادى. اسىرەسە، سپورت سۇيەر قاۋىم ەلوردا تورىندە وتەتىن 5- دۇنيەجۇزىلىك كوشپەندىلەر ويىندارىنا ەلەڭ ەتىپ، «كىمدەر جەڭەدى ەكەن؟» دەپ مويىن بۇراتىنى بەلگىلى.

 8-13-قىركۇيەك ارالىعىندا سپورتتىڭ 21 ءتۇرى بويىنشا 97 مەدال جيىنتىعى ساراپقا سالىناتىنىن اتاپ وتكەن ءجون.

قانشا سپورتشى جۇلدەگە تالاسادى

الەمدىك دوداعا 89 ەلدەن 2800-گە جۋىق قاتىسۋشى كەلەدى دەپ جوسپارلانىپ وتىر. ولاردىڭ قاتارىندا «سەن تۇر، مەن اتايىن» دەگەن حالىقارالىق جارىستاردىڭ جۇلدەگەرى كوپ. سايكەسىنشە، ءار سايىس تارتىستى وتەدى دەپ جوسپارلانىپ وتىر.

دۇنيەجۇزىلىك كوشپەندىلەر ويىنى تۇڭعىش رەت 2016 -جىلى قىرعىزستاندا ۇيىمداستىرىلعانى بەلگىلى. سودان بەرى ايىر قالپاقتى ەلدىڭ سپورتشىلارى ءار دوداعا تىڭعىلىقتى دايىندالىپ، قورجىنىن جۇلدەگە تولتىرۋدى ماقسات ەتەدى. بيىلعى جارىسقا قىرعىزستاننان 282 ادامنان قۇرالعان دەلەگاتسيا قاتىسپاق. ونىڭ 180- ءى سپورتشى، ال 40-ى جاتتىقتىرۋشى. تاعى 15- ءى - فەدەراتسيالاردىڭ وكىلدەرى.

تۇركيا دۇنيەجۇزىلىك كوشپەندىلەر ويىندارىندا 9 سپورت تۇرىنە قاتىسۋعا نيەت بىلدىرگەن. اتالعان ەلدەن 120-عا جۋىق سپورتشى توپ جارۋعا بارىن سالماق.

ەستەرىڭىزگە سالساق، سوڭعى رەت دۇنيەجۇزىلىك كوشپەندىلەر ويىندارى وسىدان ەكى جىل بۇرىن تۇركيانىڭ يزنيك قالاسىندا وتكەن ەدى. دودانى جوعارى دەڭگەيدە ۇيىمداستىرعان تۇرىكتەر استانا قالاسىندا دا قىزۋ تارتىس بولاتىنىنا سەنىمدى.

ال وزبەكستان اتىنان 120-دان استام سپورتشى قاتىسادى. ولار سپورتتىڭ 14 تۇرىنەن باق سىنايدى. وزبەكستاندىقتار «تەڭگە ءىلۋ» مەن «اۋدارىسپاققا» ءبىرىنشى رەت قاتىسادى.

ايتا كەتەيىك، بيىلعى كوشپەندىلەر ويىندارىنا برۋنەي- دارۋسسالام، ليبەريا، ۆەنەسۋەلا، يرلانديا، دومينيكان، گامبيا، برۋني، ەفيوپيا، پەرۋ ەلىنىڭ سپورتشىلارى العاش رەت قاتىسادى.

قۇسبەگىلىك باعدارلاماعا العاش رەت ەنىپ وتىر

V دۇنيەجۇزىلىك كوشپەندىلەر ويىندارىندا 21 سپورت تۇرىنەن جارىستار وتكىزىلەدى. ولاردىڭ قاتارىندا ات جارىسى، ۇلتتىق كۇرەس تۇرلەرى، ءداستۇرلى زياتكەرلىك ويىندار، جەكپە-جەكتەن جارىستار، ءداستۇرلى ساداق اتۋ، قۇس سالۋدىڭ ۇلتتىق تۇرلەرى، ات ۇستىندەگى سايىستار، حالىق ويىندارى بار.

اتاپ ايتساق،

* اسىق اتۋ

* وردو

* ارقان تارتىس

* بايگە

* كوكپار

* اۋدارىسپاق

* تەڭگە ءىلۋ

* قازاق كۇرەسى

* اشىرتمالى ابا گۇرەشي

* كورەش (بەلبەۋ تاتار كۇرەسى)

* كوكبورۋۋ

* الىش

* ماس-رەستلينگ

* Powerful nomad (الىپتار سايىسى)

* توعىزقۇمالاق (توعىزقورعۇل)

* مانگالا

* وۆاري

* جامبى اتۋ

* ءداستۇرلى ساداق اتۋ

* قۇسبەگىلىك

* قۇراش (وزبەك كۇرەسى)

ايتا كەتەيىك، قۇسبەگىلىك الدىڭعى ءتورت ويىننىڭ باعدارلاماسىنا ەنبەگەن ەدى. ياعني، اتالعان سپورت ءتۇرى بويىنشا دودا تاريحىنداعى العاشقى جۇلدەگەرلەر انىقتالماق.

بايراقتى باسەكەدە قازاقستاننىڭ نامىسىن قۇسبەگىلىكتەن توعىز سپورتشى قورعايدى. ولار، بۇركىت قۇسى بويىنشا - سەرىكبەك كۋنتۋگان، ەرزات بايكاداموۆ، ارمان كۋشكاروۆ، قارشىعا قۇسى بويىنشا - داۋرەن ارشاباي، باعدات كەۋەنوۆ، قۇدايبەرگەن راۋيل ۇلى جانە يتەلگى قۇسى بويىنشا - ەرلان كەنجەتايەۆ، باقداۋلەت باباجان، يبراگيم بازاربايەۆ.

جوعارىدا اتى اتالعان توعىز ازامات ەل ىشىندەگى چەمپيوناتتارىمىزدا - جۇزدەن جۇيرىك شىققان ۇزدىكتەر. جىل باسىنان بەرى ۇلتتىق قۇراما ساپىنداعى قۇسبەگىلەر ءۇشىن الماتى قالاسى مەن اقمولا وبلىسىندا ەكى وقۋ-جاتتىعۋ جيىنى وتكەن بولاتىن. ءۇشىنشى وقۋ-جاتتىعۋ جيىنى استانا قالاسىندا 27-تامىزدان 7 -قىركۇيەككە دەيىن جالعاسادى.

جارىستار قاي نىسانداردا وتەدى

دۇنيەجۇزىلىك كوشپەندىلەر ويىندارىنىڭ ينفراقۇرىلىمىنا ەلوردالىق 6 نىسان كىردى: «استانا-ارەنا» ستاديونى، «قازانات» يپپودرومى، ج. ۇشكەمپىروۆ اتىنداعى جەكپە-جەك سارايى، «الاۋ» مۇز ايدىنى سارايى، «Qazaqstan» جەڭىل اتلەتيكالىق سپورت كەشەنى، «دۋمان» كەشەنى.

«قازانات» يپپودرومىندا جانە ەتنواۋىل اۋماعىندا ات جارىسى، ءداستۇرلى ساداق اتۋ جانە قۇستارمەن اڭ اۋلاۋدىڭ ۇلتتىق تۇرلەرى بويىنشا جارىستار، سونداي- اق ات جارىستارى وتەدى. ج. ۇشكەمپىروۆ اتىنداعى جەكپە-جەك سارايى مەن «الاۋ» مۇز ايدىنى سارايىندا ۇلتتىق كۇرەس، جەكپە-جەك جانە حالىق ويىندارى بويىنشا جارىستار، «دۋمان» كەشەنىندە ءداستۇرلى زياتكەرلىك ويىندار وتەدى. «Qazaqstan» جەڭىل اتلەتيكالىق سپورت كەشەنىندە اككرەديتتەۋ جانە جابدىقتاۋ ورتالىقتارى ورنالاساتىن بولادى.

ويىنداردىڭ عىلىمي باعدارلاماسىنىڭ ءىس-شارالارى ۇلتتىق مۋزەيدە وتەدى.

وڭتۇستىك-باتىس جاعىنان «قازانات» يپپودرومىنا ىرگەلەس 10 گ ا اۋماقتا ورنالاسقان «كوشپەلىلەر الەمى» ەتنواۋىلى ۆيك مادەني باعدارلاماسىن ىسكە اسىرۋ ءۇشىن باستى الاڭ بولادى، سونداي-اق مادەني باعدارلاما شەڭبەرىندەگى ءىس-شارالار استانانىڭ ءتۇرلى الاڭدارىندا (الاڭدار، ساياباقتار، سكۆەرلەر، باسقا دا قوعامدىق كەڭىستىكتەر، تەاترلار، كونسەرت زالدارى، كينوتەاترلار، مۇراجايلار، كورمە پاۆيلوندارى جانە ت. ب.) وتەدى.

كوشپەندىلەر ويىنىن وتكىزۋگە قانشا قارجى جۇمسالادى؟

ويىنداردىڭ وپەراتسيالىق بيۋدجەتى - 5,7 ميلليارت تەڭگە. اتالعان سوماعا قارجىلىق سەرىكتەستەر مەن دەمەۋشىلەردىڭ قاراجاتى قوسىلادى. جالپى العاندا، وپەراتسيالىق بيۋدجەت شامامەن 8 ميلليارت تەڭگە بولماق.

بۇل رەتتە، 5- دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ جونىندەگى ديرەكسياسى «Alageum Electric» كومپانيالار توبىمەن ەكىجاقتى مەموراندۋمعا قول قويدى.

مەموراندۋم نەگىزىندە «Alageum Electric» 5- دۇنيەجۇزىلىك كوشپەندىلەر ويىندارىنىڭ رەسمي باس دەمەۋشىسى بولىپ تانىلدى. ال، ويىنداردىڭ باس سەرىكتەسى - Halyk Bank.

سەرىكتەستەر بولگەن قاراجات ءبىرىنشى كەزەكتە جۇلدەلەردى تولەۋگە باعىتتالادى. ولاردىڭ جالپى سوماسى 253 ميلليون تەڭگەنى قۇرايدى. ءار سپورت ءتۇرى بويىنشا جەكە جانە كوماندالىق جۇلدەلەر تاعايىندالادى. كوكپار مەن كوك بورىدەن جەڭىمپاز كوماندا 10 ميلليون تەڭگە، ەكىنشى ورىن العان كوماندا 6 ميلليون تەڭگە، ءۇشىنشى ورىن ءۇشىن 4 ميلليون تەڭگە الادى. جەكە سپورت تۇرلەرىندە التىن مەدال يەگەرلەرىنە 500 مىڭ تەڭگەدەن ۇلەستىرىلسە، ەكىنشى ورىن 300 مىڭ تەڭگەنى يەلەنەدى. قولا جۇلدەگەر 200 مىڭ تەڭگە الادى.

ايتا كەتەيىك، جورعا، قۇنان بايگە، توپ بايگە جەڭىمپازى 3 ميلليون تەڭگەدەن يەلەنسە، الامان بايگە جەڭىمپازى 5 ميلليون تەڭگەنى قالتاسىنا سالادى.

بۇدان بولەك، دەمەۋشىلەردىڭ بولگەن قاراجاتى شەتەلدەن كەلەتىن عىلىمي باعدارلاما سپيكەرلەرىنە، مادەني باعدارلاماعا قاتىسۋشىلارعا ارنالعان كادەسىيلار مەن اۆيابيلەتتەردى ساتىپ الۋعا جۇمسالماق.

اۆتور

ورالحان قوجانوۆ