دۇنيەجۇزىلىك كوشپەلىلەر ويىندارىنا 40 جىلقى قاتىسادى

الەم كوز تىككەن كوشپەلىلەر ويىندارىندا ءداستۇرلى بايگەدەن ەلىمىزدىڭ اتىنان 40 تۇلپار قاتىسادى. ىرىكتەۋ كەزەڭىنىڭ ناتيجەسىندە 24 تۇلپار تاڭداپ الىندى. ال قالعان جۇيرىكتەر وسىعان دەيىنگى كورسەتكىشتەرى ارقىلى جولداماعا يە بولعان.

ماڭعىستاۋلىق اتبەگى الەكە دوسقۋات ۇلىنىڭ باپتاۋىنداعى عاسىر - ءدۇبىرلى دوداعا جولداما العانداردىڭ ءبىرى. ول پاۆلوداردا وتكەن ىرىكتەۋدە الدىنا قارا سالماي، بايگەنىڭ جەڭىمپازى اتاندى. ەندى باپكەر وسى ناتيجەنى بايراقتى باسەكەدە قايتالاۋعا دەن قويىپ وتىر.

ايتۋلى باسەكەدە قۇنان بايگە 11، الامان بايگە 25، توپ بايگە 18 شاقىرىمعا سوزىلادى. ال جورعا جارىس 9 شاقىرىمدا جارىسادى. قازىر قازاق اتبەگىلەر عانا ەمەس، كورشى ەلدەر دە ءداستۇرلى بايگەگە تىڭعىلىقتى دايىندالىپ جاتىر. ايتا كەتەيىك، شەتەلدىك كوماندالار بايگەنىڭ ءار تۇرىنە تەك 3 تۇلپاردان قوسا الادى.

اتالعان بايراقتى باسەكەدە ۇشقىر بايگەنىڭ 3، ال ءداستۇرلى بايگەنىڭ 4 ءتۇرى بولادى.

ەسكە سالايىق، 8-13-قىركۇيەك ارالىعىندا استانادا V دۇنيەجۇزىلىك كوشپەلىلەر ويىندارى وتەدى. ءدۇبىرلى جيىنعا 89 ەلدەن سپورتشىلار قاتىسادى. ويىنعا قاتىسۋشىلار 21 سپورت تۇرىنەن باق سىنايدى.