دەني ساسسۋ-نگەسسو قاسىم-جومارت توقايەۆتى كونگوعا ساپارمەن كەلۋگە شاقىردى

استانا. KAZINFORM - اقوردادا مەملەكەت باسشىسى قاسىم-جومارت توقايەۆپەن كەلىسسوزدەر جۇرگىزگەن كونگو رەسپۋبليكاسىنىڭ پرەزيدەنتى دەني ساسسۋ-نگەسسو مەملەكەت باسشىسىن براززاۆيلگە ساپارمەن كەلۋگە شاقىردى.

«بۇگىندە ءبىز قارىم-قاتىناسىمىزدى كۇشەيتە تۇسەتىن ءبىرقاتار شەشىمدى قابىلداپ، جۇزەگە اسىرىپ جاتىرمىز. پرەزيدەنت مىرزا، كونگودا قازاقستان ەلشىسىن تاعايىنداۋ تۋرالى شەشىمىڭىزگە ريزاشىلىمدى بىلدىرەمىن. مەنىڭشە، بۇل شەشىم ءسىزدىڭ ۇلكەن الەۋەتى بار ەلدەرىمىز اراسىنداعى قارىم-قاتىناستى كۇشەيتىپ، دامىتۋعا دەگەن نيەتىڭىزدى بىلدىرەدى. بۇل جايىندا ءبىز كەشە جانە بۇگىن سويلەستىك. سونىمەن قاتار ساراپشىلارىمىز بەن مينيسترلەرىمىز بىرلەسكە جۇمىس جۇرگىزىپ، ءبىرقاتار كەلىسىم ازىرلەدى. ولاردى ءبىز جۇزەگە اسىرۋعا تىرىسامىز»، - دەدى مارتەبەلى مەيمان.

كونگو پرەزيدەنتى ەكى بىرلەسىپ جۇزەگە اسىراتىن جوبالاردىڭ جەمىستى ءارى ءوزارا ءتيىمدى بولاتىندىعىنا سەنىم ءبىلدىردى.

«سونىمەن قاتار ەلدەرىڭىزدىڭ سوڭعى 20 جىلدا قول جەتكىزگەن جەتىستىگىن دە اتاپ وتكىم كەلەدى. قازاقستان ورتالىق ازياداعى ەڭ ماڭىزدى ەلگە اينالدى. ويتكەنى، جالپى ىشكى ءونىمى ورتالىق ازيا بويىنشا 50 پايىزدى قۇرايدى. ءبىز بۇل جەتىستىكتى قولدايمىز. سونىمەن قاتار قازاقستانداعى دوستارىمىزدىڭ بارلىق سالادا مول تاجىريبەسى بار ەكەندىگىن دە اتاپ وتكىم كەلەدى. بۇگىندە ءبىز سول تاجىريبەنى قولدانعىمىز كەلەدى. مۇنان بولەك، ءسىزدى براززاۆيلگە، كونگوعا شاقىرامىن. ءبىز ءۇشىن بۇل ۇلكەن مارتەبە»، - دەدى دەني ساسسۋ-نگەسسو.

اۆتور

مارلان جيەمباي