«دۇنيە ديدارىنداعى ديماش»: ءانشىنىڭ تۋعان جەرىندەگى مۋزەيدە كورمە اشىلدى
اقتوبە. KAZINFORM - رەسپۋبليكا كۇنى قارساڭىندا اقتوبە وبلىستىق تاريحي- ولكەتانۋ مۋزەيىندە «دۇنيە ديدارىنداعى ديماش» اتتى كورمە اشىلدى.
مۇندا ءانشى ديماش قۇدايبەرگەننىڭ بالا كۇنىندە جاتقان بەسىگى، وتباسىنىڭ فوتوالبومى مەن ماراپاتتارىن، وزگە دە ەكسپوناتتاردى تاماشالاۋعا بولادى.
تانىمال ءانشىنىڭ ءار جىلدارى جەتكەن جەتىستىكتەرى مەن كونسەرتتەرىندەگى كيىمدەرىنىڭ ءبارى كوپتىڭ كوز الدىنا شىعارىلدى. بارلىعى 140-تان استام ەكسپونات اكەلىندى.
- ديماش قۇدايبەرگەننىڭ فاناتتارى سىيلاعان سىيلىقتار ءبىر قاناتتى الىپ تۇر. ولاردىڭ اراسىندا ءتۇرلى مۋزىكالىق اسپاپتار، كارتينالار مەن قولدان جاسالعان بۇيىمدار بار. سونىمەن بىرگە فوتوالبومىن دا كورۋگە بولادى. ءار ەلدىڭ تۋى ىلىنگەن اعاش بۇتالارىنا قاراپ-اق ءانشى تىڭدارماندارىنىڭ ونداعان، ءتىپتى جۇزدەگەن ەلدە بار ەكەنىن بىلەمىز. سونىمەن بىرگە اتاقتى تۇلعالار بەرگەن سىيلىقتارى دا اكەلىندى، - دەدى اقتوبە وبلىستىق تاريحي- ولكەتانۋ مۋزەيىنىڭ كىشى عىلىمي قىزمەتكەرى ايمان تاۋمان.
مۋزەيگە كەلۋشىلەر اكتەر دجەكي چان سىيعا تارتقان كۇرتەنى كورە الادى. بۇل 2017 -جىلى بەرىلگەن سىيلىق. سونىمەن بىرگە تۇرىكتىڭ مۋزىكالىق پروديۋسەرى جانە دي- دجەي بۋراك يەتەر سىيعا بەرگەن كۇرتە دە بار. قازاق سالت- داستۇرىنە قىزىققاندار كورمەدەن ات ابزەلدەرىن دە تاماشالايدى.
- ديماش اتقا ءمىنىپ، سەرۋەندەگەندى جاقسى كورەدى. ول - حوببيى. كورمەدە ەر- توقىم، قامشى، بەلدىك، اۋىزدىق بار. ونى ءالى كۇنگە دەيىن ءوزى تۇتىنادى، - دەدى ايمان تاۋمان.
كورمەگە بۇگىن وبلىس اكىمى اسحات شاحاروۆ، ءوڭىردىڭ قوعام بەلسەندىلەرى مەن ديماش قۇدايبەرگەننىڭ اتا- اناسى، ۇستازدارى، تۋما- تۋىستارى كەلدى.
- ماقساتىمىز ءوسىپ كەلە جاتقان ۇرپاققا ۇلگى ەتۋ. ديماشتىڭ جەكە زاتتارىمەن قوسا بەلگىلى تۇلعالاردىڭ سىيلىقتارى، كونسەرت كوستيۋمدەرى جيناقتالعان. وسى ارقىلى ءاربىر قازاقتىڭ بالاسى ەڭبەكتەنسە، تالاپتانسا ۇلكەن جەتىستىككە جەتۋگە بولاتىنىن كورسەتكىمىز كەلدى. مەكتەپ وقۋشىسىنان باستاپ كورىپ، ۇمتىلسا دەيمىز. بالالار تەرىس ادەتتەپ اۋلاق بولىپ، جاقسى دۇنيەمەن ايلانىسسا دەگەن ويىمىز بار. اقتوبە وبلىستىق تاريحي- ولكەتانۋ مۋزەيىنىڭ ورنى ەرەكشە. بۇل ءبىزدىڭ ءوسىپ- ونگەن، قاستەرلى دۇنيەلەردى جيناقتاپ وتىرعان كيەلى شاڭىراق. سوندىقتان بۇل جەردە ديماشتىڭ قۇندى زاتتارىنان ارنايى ەكسپونات قالدىرامىز دەگەن ويىمىز بار، - دەدى ديماش قۇدايبەرگەننىڭ اتاسى سۆەتلانا ايتبايەۆا.
ونىڭ ايتۋىنشا، ۇلتتىق مۋزەيدە بولعان كورمەنى ءبىر ايدا 15 مىڭعا جۋىق ادام تاماشالادى. وندا شەتەلدىكتەر كوپ بولعان.
- ۇلتتىق مۋزەيدەن كەيىن اقتوبە «ءبىز الامىز» دەگەندە ءبىز قۋاندىق. سەبەبى اركىمنىڭ تۋعان جەرى، قۇتتى مەكەنى ىستىق. قاسيەتتى توپىراقتان اسقان ەشتەڭە جوق، - دەدى سۆەتلانا ايتبايەۆا.
ەسكە سالساق، قىركۇيەكتە استاناداعى قازاقستان رەسپۋبليكاسىنىڭ ۇلتتىق مۋزەيىندە قازاقستاننىڭ حالىق ءارتىسى، كومپوزيتور جانە مۋلتياسپاپشى ديماش قۇدايبەرگەننىڭ شىعارماشىلىعىنا ارنالعان «دۇنيە ديدارىنداعى ديماش» اتتى كورمە ءوتتى.
اۆتور
التىناي ساعىندىقوۆا