دەنساۋلىق ساقتاۋ جۇيەسىنە وزگەرىستەر ەنگىزىلدى: قازاقستاندىقتاردى نە كۇتىپ تۇر

استانا. قازاقپارات - 2026 -جىلعى 1-قاڭتاردان باستاپ وتاندىق دەنساۋلىق ساقتاۋ جۇيەسىندە جاڭا نورمالار كۇشىنە ەنەدى. ءماجىلىس پەن سەنات ماقۇلداعان ءتيىستى زاڭ پرەزيدەنتتىڭ قول قويۋىنا جولداندى.

 قازاقستاندىقتار مەن دەنساۋلىق ساقتاۋ جۇيەسىن قانداي وزگەرىستەر كۇتىپ تۇرعانىن Kazinform اگەنتتىگىنىڭ تىلشىسىنە دەنساۋلىق ساقتاۋ ءمينيسترى اقمارال ءالنازاروۆا ايتىپ بەردى.

ءمينيستردىڭ ايتۋىنشا، باستى جاڭالىقتاردىڭ ءبىرى - مەديتسينالىق قىزمەت پاكەتىن ناقتى ءبولۋ.

- 2021 -جىلى مەملەكەت باسشىسى كەپىلدەندىرىلگەن جانە ساقتاندىرۋ پاكەتىنە كىرەتىن قىزمەتتى ناقتى اجىراتۋ قاجەت ەكەنىن تاپسىردى. جاڭا زاڭ جوباسى اياسىندا قىزمەتتى ناقتى بولدىك. بۇل ەمحانالار ءۇشىن بارلىق قارجى جانە پاتسيەنت اعىنىن باسقارۋعا مۇمكىندىك بەرەدى، اشىقتىقتى قامتاماسىز ەتەدى، - دەدى اقمارال ءالنازاروۆا.

ەكىنشى ماڭىزدى وزگەرىس - ونكولوگيالىق سكرينينگ مىندەتتى الەۋمەتتىك مەديتسينالىق ساقتاندىرۋ (م ءا م س) پاكەتىنەن كەپىلدەندىرىلگەن تەگىن مەديتسينالىق كومەك كولەمى (ت م ك ك ك) پاكەتىنە كوشىرىلدى. بۇل بۇكىل حالىققا ونكولوگيالىق اۋرۋلاردى ەرتە انىقتاۋ قىزمەتتىنە قول جەتكىزۋگە مۇمكىندىك بەرەدى.

ءۇشىنشى جاڭاشىلدىق جوسپارلى مەديتسينالىق كومەك الۋدىڭ اياسى كەڭەيدى.

- بۇگىندە شامامەن 3 ميلليون ازامات م ءا م س جۇيەسىنە جارنا تولەمەيدى، سوندىقتان دا ولار جوسپارلى مەديتسينالىق كومەكتى الا الماي وتىر. وسى ساناتتاعى ازاماتتارعا قاتىستى «سيفرلىق وتباسى كارتاسى» اياسىندا زەرتتەۋ جۇرگىزىلدى. بۇل قۇرال وتباسى مۇشەلەرىنىڭ ءارقايسىسىنىڭ تابىسىن كورۋگە مۇمكىندىك بەرەدى. ەگەر وتباسىندا ەكونوميكالىق قيىندىق بارى انىقتالسا، جەرگىلىكتى اتقارۋشى ورگاندار، ياعني اكىمدىكتىڭ قاراجاتى ەسەبىنەن ساقتاندىرۋ مارتەبەسى بەرىلەدى، - دەپ ءتۇسىندىردى مينيستر.

مينيسترلىكتىڭ ەسەپتەۋىنشە، 2026 -جىلعى 1-قاڭتاردان باستاپ شامامەن 1 ميلليون ادام جوسپارلى مەديتسينالىق كومەككە قول جەتكىزەدى.

رەفورمانىڭ تاعى ءبىر جاڭا قىرى - ساقتاندىرۋ جۇيەسىنىڭ تۇراقتىلىعىنا بايلانىستى.

- دەنساۋلىق ساقتاۋ جۇيەسى ءۇشىن بارلىق وزەكتى ەسەپ جۇرگىزىلدى. قابىلدانعان نورمالار ساقتاندىرۋ جۇيەسىنىڭ قارجىلىق تۇراقتىلىعىن 2043 -جىلعا دەيىن جانە ودان كەيىن دە قامتاماسىز ەتەدى. ءبىز قارجىلىق تۇراقتىلىقتى قالاپ وتىرمىز، - دەپ تولىقتىردى اقمارال ءالنازاروۆا.

2026 -جىلعى قاڭتاردان باستاپ جارنانى ەسەپتەۋ بازاسىنىڭ جاڭا جوعارعى شەگى ەنگىزىلەدى، ياعني جۇمىس بەرۋشىلەر ءۇشىن - 40 ەڭ تومەنگى جالاقى، جۇمىسشىلار ءۇشىن 20 ەڭ تومەنگى جالاقى مولشەرى بەلگىلەندى. اتالعان وزگەرىستەر جوعارى تابىسى بار جۇمىسشىلاردىڭ شامامەن %9 ىن (500 مىڭنان استام ادام) قامتيدى. م ءا م س جۇيەسىنىڭ تابىس بولىگىنىڭ ءوسىمى جىلىنا شامامەن 200 ميلليارد تەڭگەنى قۇرايدى دەپ باعالانىپ وتىر.

سونىمەن قاتار، مەملەكەت تاراپىنان م ءا م س جۇيەسىنە جارنا مولشەرىن كەزەڭ- كەزەڭىمەن ارتتىرۋ كوزدەلىپ وتىر:

- 2027-جىلى - %2,2 دان باستاپ؛ 

- 2037 -جىلى - %4,7 عا دەيىن.

م ءا م  س جۇيەسىندە جاڭا نورما ەنگىزىلەدى — 5  جىل قاتارىنان تۇراقتى جارنا تولەگەن ازاماتتار تولەمدى ۋاقىتشا توقتاتقان جاعدايدا، 6 اي بويى مارتەبەسىن ساقتاپ قالادى.

ايتا كەتەيىك، 2025 -جىلعى 21 -مامىردا ءماجىلىس م ءا م س جۇيەسىنە وزگەرىستەر ەنگىزىلگەن زاڭدى قابىلدادى.