دەمىكپە - تولىق جازىلمايتىن دەرت

الەمدە شامامەن 340 ميلليون ادام دەمىكپەمەن اۋىرادى. ولاردىڭ تورتتەن ءبىرى - بالا. بۇل دۇنيەجۇزىلىك دەنساۋلىق ساقتاۋ ۇيىمىنىڭ دەرەگى. ۇيىم وكىلدەرىنىڭ ايتۋى بويىنشا دەمىكپە - الەمدە جۇقپالى ەمەس اۋرۋلاردىڭ ەڭ كەڭ تارالعان تۇرلەرىنىڭ ءبىرى.

قازىر بۇل دەرتپەن قالاي كۇرەسۋگە بولادى؟ ونى ەرتە انىقتاۋدىڭ قانداي ادىستەرى بار؟

ا ق ش- تا بالالارداعى دەمىكپەنى ەرتە انىقتايتىن سىناما ازىرلەندى

دەمىكپەنى ەرتە انىقتاۋ اسىرەسە سابيلەردە وتە قيىن. بۇل رەتتە امەريكالىق پيتتسبۋرگ ۋنيۆەرسيتەتىنىڭ ماماندارى بالالارداعى دەمىكپەنىڭ تۇرلەرىن انىقتاۋعا ارنالعان ينۆازياسىز، ياعني دەنەنى زاقىمدامايتىن سىناما تەست ازىرلەدى. ول ءۇشىن بالانىڭ مۇرىن قۋىسىنان سۇيىقتىق الىنىپ، يممۋندىق جاسۋشالاردىڭ بار- جوعىن انىقتايتىن تالداۋ جۇرگىزىلگەن. جاڭا زەرتتەۋ جۇمىسىنا 400 بالا مەن جاس ءوسپىرىم قاتىستى. ناتيجەسىندە مۇرىن تىندەرىندەگى سەگىز گەننىڭ بەلسەندىلىگىن باعالاۋ ارقىلى دەمىكپەنىڭ ناقتى ءتۇرىن جوعارى دالدىكپەن انىقتاپ، دۇرىس ەم تاڭداۋعا بولاتىنى دالەلدەندى. دەگەنمەن بۇل بىرەگەي تەستتى مەديتسينالىق تاجىريبەگە كەڭىنەن ەنگىزۋ تۋرالى ايتۋعا ءالى ەرتە. ويتكەنى كلينيكالىق سىناما جۇمىستارى ءالى جالعاسادى. عالىمداردىڭ ايتۋىنا قاراعاندا بۇل جاڭالىق بولاشاقتا دەنساۋلىققا قاۋىپتى برونحوسكوپيا پروتسەدۋراسىنان باس تارتۋعا مۇمكىندىك بەرەدى.

رەسەي عالىمدارى بالالارداعى دەمىكپەنى ەرتە انىقتايتىن بىرەگەي قۇرىلعى ويلاپ تاپتى

ال رەسەي عالىمدارى 6 جاسقا دەيىنگى بالالاردا دەمىكپەنى ەرتە انىقتاۋعا ارنالعان بىرەگەي قۇرىلعى جاساپ جاتىر. 

ول تىنىس الۋ دىبىستارىن تىركەيتىن رەگيستراتور. قۇرىلعى سىرتقا شىققان اۋانىڭ دىبىس تولقىندارىن تىركەپ، ولاردىڭ تەربەلىسىن ولشەيدى جانە بۇل دەرەكتەردى كەسكىنگە اينالدىرادى. زەرتتەۋشىلەردىڭ ايتۋىنا قاراعاندا بۇل نارەستەلىك كەزەڭنەن باستاپ تىنىس الۋ بۇزىلىستارىن وبەكتيۆتى تۇردە باعالاۋعا مۇمكىندىك بەرەدى. سونىمەن قاتار رەسەيلىك عالىمدار تاعى ءبىر دياگنوستيكالىق قۇرال - كاپيللياروسكوپ جاسادى. ول ارقىلى وتتەگىنىڭ ەڭ ۇساق قانتامىرلار ارقىلى قانعا قانشالىقتى ءتيىمدى جەتكىزىلەتىنىن باعالاۋعا بولادى. سەبەبى برونح وتكىزگىشتىگىنىڭ بۇزىلۋى اعزانىڭ وتتەگىمەن قامتاماسىز ەتىلۋىنە تىكەلەي اسەر ەتەدى، ال كاپيللياروسكوپ دەمىكپەنىڭ العاشقى بەلگىلەرى پايدا بولماي تۇرىپ- اق ونىڭ دامۋ قاۋپىن انىقتاۋعا كومەكتەسەدى.

دەمىكپە - تولىق جازىلمايتىن دەرت

الەمدە دەمىكپەنى كوبىنە قان مەن ءزاردىڭ جالپى تالداۋى، قاقىرىقتى ميكروسكوپيالىق تەكسەرۋ، كەۋدە قۋىسىنىڭ رەنتگەنى نەمەسە كت كومەگىمەن انىقتايدى. دياگنوز قويىلعاننان كەيىن ءداستۇرلى ەمدەۋ ادىستەرى - ءدارى- دارمەك پەن ينگالياتور قولدانىلادى. ولار قابىنۋدى ازايتادى، ءبىراق اۋىر ۇستامالاردىڭ الدىن الا المايدى. ءجيى اسقىنۋلار تىنىس جولدارىنىڭ تىرتىقتانىپ، تارىلۋىنا الىپ كەلۋى مۇمكىن. «دەمىكپە تولىق جازىلمايتىن دەرت، دەگەنمەن دۇرىس ەممەن جانە ءومىر سالتىمەن ادامنىڭ ءومىر ءسۇرۋ ساپاسى تولىق قالپىنا كەلەدى»، - دەيدى دارىگەرلەر.

 https://24.kz