دەموگرافيا ماسەلەلەرى بويىنشا مەملەكەتتىك ورگان قۇرىلا ما - ۇكىمەت باسشىسىنىڭ جاۋابى

استانا. KAZINFORM - پرەمەر-مينيستر ولجاس بەكتەنوۆ سەنات دەپۋتاتتارىنىڭ دەموگرافيا ماسەلەلەرى بويىنشا مەملەكەتتىك ورگان قۇرۋعا قاتىستى ساۋالىنا جاۋاپ بەردى.

«تاۋەلسىزدىك العان جىلدارى قازاقستاننىڭ حالىق سانى 16,5 ميلليون ادامدى، ءومىر ءسۇرۋ ۇزاقتىعى 68 جاستى قۇرادى. سول كەزدە ەلىمىزدەگى دەموگرافيالىق جاعدايدى ەسكەرە وتىرىپ، دەموگرافيا ماسەلەلەرىمەن ارنايى قۇرىلعان كوشى-قون جانە دەموگرافيا اگەنتتىگى اينالىستى. قابىلدانعان كەشەندى شارالار نەگىزىندە ايتارلىقتاي جەتىستىكتەرگە قول جەتكىزىلدى جانە الەۋمەتتىك دامۋ جولىندا ۇلكەن قادام جاسالدى. جۇرگىزىلگەن الەۋمەتتىك-ەكونوميكالىق رەفورمالاردىڭ ناتيجەسىندە حالىقتىڭ تابىسى ۇلعايدى. دەنساۋلىق ساقتاۋ مەن ءبىلىم بەرۋ سالالارىنىڭ قوماقتى قارجىلاندىرىلۋى، انا مەن بالانى قولداۋعا ارنالعان جۇيەلى شارالار بالا تۋۋ مەن ءومىر ءسۇرۋ ۇزاقتىعىنىڭ وسۋىنە ۇلكەن اسەر ەتتى. سونىڭ ناتيجەسىندە قازىرگى تاڭدا قازاقستان حالقىنىڭ سانى 20 ميلليوننان استى، قازاقستاندىقتاردىڭ ورتاشا جاسى 32,1 جاستى قۇرادى. حالىق قۇرىلىمىندا ۇشتەن ءبىرى - بالالار، 58 پايىزى - ەڭبەككە قابىلەتتى ازاماتتار جانە 11 پايىزى - قارت ادامدار. وسىلايشا، ەلىمىزدىڭ حالقى باسقا ەلدەرمەن سالىستىرعاندا جاس»، - دەدى ۇكىمەت باسشىسى جاۋابىندا.

سونىمەن قاتار، ونىڭ اتاپ وتۋىنشە، تابىسىنا قاراماستان بارلىق وتباسىلارعا بالا تۋۋعا، 1,5 جاسقا دەيىنگى بالا كۇتىمى بويىنشا جۇمىس ىستەمەيتىن ايەلدەرگە، مۇگەدەك بالالاردى تاربيەلەۋگە، 18 جاسقا تولماعان 4 جانە ودان كوپ بالاسى بار كوپ بالالى وتباسىلارعا جانە كوپ بالالى انالارعا مەملەكەتتىك قولداۋ كورسەتىلەدى. ومىردە قيىن جاعدايعا تاپ بولعان وتباسىلارعا بۇل تولەمدەرگە قوسىمشا اتاۋلى الەۋمەتتىك كومەك تاعايىندالادى. وسىلايشا، بۇگىندە ءاربىر بەسىنشى قازاقستاندىق وتباسى مەملەكەتتىك قولداۋ الادى. ياعني مەملەكەتتىك قولداۋدىڭ كەشەندى شارالارىنىڭ ناتيجەسىندە دەموگرافيالىق جاعداي جاقساردى.

«سەنات دەپۋتاتتارى ۇسىنىستارىنىڭ نەگىزىندە قوسىمشا حالىقارالىق تاجىريبەگە تالداۋ جۇرگىزىلدى. ونىڭ قورىتىندىسى كورسەتكەندەي، دەموگرافيا ماسەلەلەرىمەن ءارتۇرلى مەملەكەتتىك ورگاندار اينالىسادى. مىسالى، تۋۋ دەڭگەيى تومەن ەلدەردە (كورەيا، قىتاي) دەنساۋلىق ساقتاۋ مينيسترلىگى جاۋاپتى، پوستكەڭەستىك جانە شىعىس ەۋروپا مەملەكەتتەرىندە (رەسەي، ۋكراينا، پولشا، سلوۆاكيا) بۇل فۋنكتسيالار الەۋمەتتىك ماسەلەلەرگە جاۋاپتى مەملەكەتتىك ورگاندارعا جۇكتەلگەن. دەموگرافيالىق دامۋ سالاسىنداعى مەملەكەتتىك ساياسات - فۋنكتسيونالدىق باعىتتارىنا سايكەس ءاربىر ورتالىق مەملەكەتتىك ورگانداردىڭ جۇمىسىنا ەنگىزىلگەن. مەملەكەتتىك ورگاندار وزدەرىنىڭ سالالىق باعىتى بويىنشا اكىمشىلىك، ەكونوميكالىق جانە باسقا دا ءىس-شارالاردى قابىلداي وتىرىپ، دەموگرافيالىق ساياساتتىڭ تۇتاس جۇيەسىن قالىپتاستىرادى. بۇل جۇمىستاردى ۇلتتىق ەكونوميكا مينيسترلىگى ۇيلەستىرەدى. وسىعان وراي بۇل ماسەلەنى جان-جاقتى قارالىپ، ۇلتتىق ەكونوميكا مينيسترلىگى ورتالىق مەملەكەتتىك ورگاندارعا جۇرگىزگەن فۋنكتسيونالدىق تالداۋ قورىتىندىسى بويىنشا جاڭادان قوسىمشا مەملەكەتتىك ورگاندقۇرۋ، مەملەكەتتىك قىزمەتشىلەر سانىن ۇلعايتۋ، مەملەكەتتىك بيۋدجەتكە جۇكتەمە ءتۇسىرۋ ورىنسىز دەپ سانايدى. سونىمەن قاتار جەكە ۆەدومستۆو قۇرۋ مەملەكەتتىك باسقارۋدى دامىتۋدىڭ 2030 -جىلعا دەيىنگى تۇجىرىمداماسىندا كوزدەلگەن مەملەكەتتىك اپپاراتتى وڭتايلاندىرۋ باعىتىنا سايكەس كەلمەيدى»، - دەدى ولجاس بەكتەنوۆ.