دەمالىس كۇندەرى تولەمدەردى قابىلداۋدا وزگەرىستەر بولۋى مۇمكىن - ۇلتتىق بانك

قازاقستان ۇلتتىق بانكى ەكىنشى دەڭگەيلى بانكتەرمەن بىرلەسىپ، ەلدىڭ تولەم جۇيەلەرىنە ISO 20022 حالىقارالىق تولەم حابارلامالارى فورماتىن ەنگىزىپ جاتىر.

دەرەككە قاراعاندا، حالىقارالىق تولەم حابارلامالارى ستاندارتىن قولدانۋ بانكتەردە كليەنتكە قارجى قىزمەتىن كورسەتۋ ءتارتىبىن وزگەرتپەيدى.

«بۇل جۇمىستاردىڭ كارتوچكالارمەن جاسالاتىن تولەمدەرگە ەش قاتىسى جوق. وسىلايشا، حالىقتىڭ تولەم كارتالارى، QR- كودتار، موبيلدى اۋدارىمدار، بانكوماتتاردان قولما-قول اقشا الۋ، ۇيالى بايلانىس تولەمدەرى جانە باسقا دا تولەمدەر وزگەرىسسىز قالادى.

سونىمەن قاتار، اقپارات جۇيەلەرىن باپتاۋ قاجەت بولعاندىقتان، بانكتەر تەحنيكالىق جۇمىستار جۇرگىزەدى. سونداي كەزدە بانكارالىق قىزمەت كورسەتۋگە بايلانىستى تولەمدەردى قابىلداۋ كەستەسىندە قىسقامەرزىمدى وزگەرىستەر بولۋى مۇمكىن (قارجى ۇيىمدارى ISO 20022- ءنى ەنگىزەتىن دەمالىس كۇندەرىندە)»، - دەپ ءتۇسىندىردى قارجى مەكەمەسىنەن.

قارجى مەكەمەلەرى قازىر كليەنتتەرىن جاڭا ستاندارتقا كوشۋگە بايلانىستى تەحنيكالىق جۇمىستار جۇرگىزىلەتىن ۋاقىت تۋرالى الدىن الا حاباردار ەتىپ جاتىر. بۇل جۇمىستار 2024 -جىلعى قاراشانىڭ اياعىنا دەيىن جۇزەگە اسىرىلادى.

ايتا كەتەيىك، ISO 20022 - ەلەكتروندى حابارلاما الماساتىن الەمدىك ستاندارت. ول قارجى ۇيىمدارى اراسىنداعى بيزنەس- پروتسەستەردى اۆتوماتتاندىرۋ ءۇشىن جاسالعان. بۇل ستاندارتقا كوشۋ نارىق قاتىسۋشىلارىنا ISO 20022 نەگىزىندە جۇزەگە اسىرىلاتىن جاڭا شەشىمدەرگە قول جەتكىزۋگە مۇمكىندىك بەرەدى، سونداي-اق بانك وپەراتسيالارىن جۇرگىزۋ كەزىندە تولەم حابارلامالارىن الماسۋدىڭ بىرىزدەندىرىلگەن مودەلىن قولدانۋ ارقىلى بارلىق تاراپتىڭ شىعىنىن ازايتادى.

اۆتور

اسحات رايقۇل