دەمەۋ جادىرايەۆ «جەتىسۋ وبلىسىنىڭ قۇرمەتتى ازاماتى» اتانىپ، باسپانالى بولدى
تالدىقورعان. KAZINFORM - بۇگىن جەتىسۋ وبلىسىنىڭ اكىمى بەيبىت يسابايەۆ پاريج وليمپياداسىنىڭ كۇمىس جۇلدەگەرى، پالۋان دەمەۋ جادىرايەۆتى قابىلداپ، «جەتىسۋ وبلىسىنىڭ قۇرمەتتى ازاماتى» توسبەلگىسىن تاقتى.
اناسى كۇليپا بيجانوۆاعا سالتاناتتى تۇردە قۇرمەت كورسەتىپ، جاركەنت قالاسىنان جاڭا ءۇيدىڭ كىلتىن تابىستادى. بۇل تۋرالى وبلىس اكىمدىگىنىڭ باسپا ءسوز قىزمەتى مالىمدەدى.
«الىپ انادان تۋادى»، حالقىنا لايىقتى پەرزەنت بولا بىلگەن وسىنداي ەر ازاماتتى تاربيەلەپ وسىرگەنىڭىز ءۇشىن ەڭ الدىمەن دەمەۋدىڭ اناسى، سىزگە العىسىمىزدى بىلدىرەمىز. قۇرمەتتىڭ ۇلكەنى، سىيدىڭ تورەسى ەڭ الدىمەن اناعا جاسالۋى كەرەك»، - دەدى بەيبىت يسابايەۆ.
وبلىس باسشىسى ق ر ەڭبەك سىڭىرگەن جاتتىقتىرۋشىلارى - سپورتشىنىڭ العاشقى باپكەرى جۇماحان تۇرعامبەكوۆ جانە جەكە باپكەرى بورانبەك قوڭىراتوۆقا دا ريزاشىلىعىن ءبىلدىرىپ، قارجىلاي سىيلىقتار تاپسىردى.
جەتىسۋ جۇرتشىلىعى جەرلەستەرىنىڭ وليمپياداداعى بوز كىلەمگە شىققان ءار قادامىن قالت جىبەرمەي قاراپ، تىلەكتەس بولىپ وتىرعانىن ايتا كەلە بەيبىت يسابايەۆ: «بۇعان دەيىن دە ازيا، الەم چەمپيوناتتارىندا جۇلدەلى ورىندار الىپ جۇرگەنىڭدى بىلەمىز. دەگەنمەن وليمپ شىڭىن باعىندىرۋ - كەز كەلگەن سپورتشىنىڭ باستى ارمانى. سول ارمانىڭا سەنى ءوزىڭنىڭ قاجىر-قايراتىڭ، تاباندىلىعىڭ، جاتتىقتىرۋشىلارىڭنىڭ ەڭبەگى، تۋعان ەلدىڭ تىلەكتەستىگى، ەڭ باستىسى ابزال اناڭنىڭ اق باتاسى جەتكىزدى»، - دەدى.
دەمەۋ جادىرايەۆ الدىمەن اناسىنا ەرەكشە قۇرمەت كورسەتكەنى ءۇشىن العىس ءبىلدىردى.
«انامدى ارنايى شاقىرىپ، قۇرمەتتەپ، باسپانا سىيلاپ جاتقاندارىڭىزعا كوپ راحمەت ايتامىن. كەزىندە تالدىقورعاندا جاقسىلىق ۇشكەمپىروۆ اتىنداعى دارىندى بالالارعا ارنالعان سپورت-ينتەرنات مەكتەبىندە ءتورت جىل وقىپ، سول جەردە قاناتىمىز قاتايدى، ۇلكەن سپورتقا قادام باسۋعا كوپىر بولدى. تۋىپ- وسكەن جەرىمىز «جەتىسۋ وبلىسىنىڭ قۇرمەتتى ازاماتى» اتانۋ مەن ءۇشىن ۇلكەن مارتەبە»، - دەدى دەمەۋ جادىرايەۆ.
ەسكە سالساق، گرەك-ريم كۇرەسىنەن قازاقستاننىڭ ەڭبەك سىڭىرگەن سپورت شەبەرى دەمەۋ جادىرايەۆ - جەتىسۋ وبلىسى پانفيلوۆ اۋدانى ءۇشارال اۋىلىنىڭ تۋماسى.
ونىڭ سپورتتاعى العاشقى قادامى ءۇشارال اۋىلىنداعى مەكتەپتە كۇرەس سەكسياسىنا قاتىسۋدان باستالعان. بۇل سەكسيادا وعان كۇرەستىڭ باستاپقى الىپپەسىن ۇيرەتكەن جاتتىقتىرۋشى جۇماحان تۇرعامبەكوۆ بولدى.
كەيىن 2003-2007 -جىلداردا دەمەۋ جادىرايەۆ تالدىقورعان قالاسىنداعى دارىندى بالالارعا ارنالعان سپورت-ينتەرنات مەكتەبىندە وقىدى. بۇل مەكتەپتەن ميرات سارسەنبايەۆ، كارينا گوريچيەۆا، يگور سون، يلفات ابدۋللين سياقتى الەم چەمپيوندارى مەن وليمپيادا جۇلدەگەرلەرى شىققان.
وسىلايشا جەتىسۋ جەرىنەن باستالعان سپورتتاعى جول ۇلكەن داڭعىلعا ۇلاسىپ، دەمەۋ جادىرايەۆ بيىل پاريجدە ءوتىپ جاتقان جازعى وليمپيادا ويىندارىندا كۇمىس مەدالعا يە بولدى.
اۆتور
ەلميرا ورالبايەۆا