دجون سويەرس: يزرايلدىڭ ماقساتى - ا ق ش-تى قاقتىعىسقا تارتۋ

استانا. KAZINFORM – ا ق ش پرەزيدەنتى دونالد ترامپ يراننىڭ يادرولىق نىساندارىنا، سونىڭ ىشىندە فوردوداعى ۋران بايىتۋ زاۋىتىنا سوققى جاساۋ ءۇشىن يزرايلمەن بىرىگۋدى قاراستىرىپ وتىر، دەپ جازدى Kazinform ءتىلشىسى.

CBS ارناسىنىڭ (BBC- ءنىڭ سەرىكتەسى) حابارلاۋىنشا، بۇل تاقىرىپ جاقىندا اق ۇيدەگى سيتۋاتسيالىق بولمەدە وتكەن ترامپ پەن ا ق ش ۇلتتىق قاۋىپسىزدىك كەڭەسىنىڭ كەزدەسۋىندە تالقىلانعان.

CBS- ءتىڭ دەرەككوزدەرى ترامپتىڭ ەڭ جاقىن كەڭەسشىلەرى بۇل ماسەلە جونىندە ورتاق پىكىرگە كەلە الماي وتىرعانىن ايتادى.

ۇلى بريتانيانىڭ سىرتقى بارلاۋ قىزمەتى - MI6-تىڭ بۇرىنعى باسشىسى دجون سويەرس BBC- گە بەرگەن سۇحباتىندا يزرايل يرانداعى كەيبىر اسا ماڭىزدى يادرولىق نىساندارعا شابۋىل جاساماعانىن، ويتكەنى ولار تەرەڭ جەراستى بەكىنىستەرىندە ورنالاسقانىن ايتتى.

- مۇنداي نىساندارعا سوققى جاساۋعا تەك امەريكالىقتاردىڭ عانا اسكەري مۇمكىندىگى بار، - دەدى سويەرس.

ونىڭ ايتۋىنشا، ۆاشينگتون الدىندا ەكى جول تۇر: نە يزرايلمەن بىرىگىپ، باستالعان ءىستى سوڭىنا دەيىن جەتكىزۋ، نە ديپلوماتيالىق شەشىم ىزدەۋ.

سويەرس يزرايلدىڭ باستى ماقساتى – ا ق ش- تى يرانمەن قاقتىعىسقا تارتۋ ەكەنىن ايتادى. وسىلايشا يزرايل ا ق ش- تىڭ اسكەري قۋاتىن پايدالانىپ، يراننىڭ يادرولىق ينفراقۇرىلىمىن جويماق.

ايتا كەتەيىك، دۇيسەنبى كۇنى دونالد ترامپ كانادادا ءوتىپ جاتقان G7 سامميتىنەن مەرزىمىنەن بۇرىن ۆاشينگتونعا ورالۋ تۋرالى شەشىم قابىلدادى. بۇل شەشىم تاياۋ شىعىستاعى جاعدايدى باقىلاۋعا الۋ ماقساتىندا جاسالعان. ا ق ش تاياۋ شىعىسقا «USS Nimitz» اۋە تاسىمالداۋشى كەمەسىن جونەلتتى. بۇعان دەيىن Axios باسىلىمى يزرايلدىڭ ا ق ش- تى يرانعا قارسى سوعىسقا تارتۋعا تىرىسىپ جاتقانىن حابارلاعان بولاتىن.

بۇعان دەيىن حابارلانعانداي، نەتانياحۋ مەن ترامپ تەلەفون ارقىلى سويلەستى.

ال ەۋروپالىق ديپلوماتيا باسشىسى كايا كاللاس ا ق ش- تىڭ ارالاسۋى تاياۋ شىعىستاعى قاقتىعىستىڭ ورشۋىنە اكەلەتىنىن ايتتى.