دجو بايدەن مەن شي جينپيڭ كاليفورنيادا كەزدەستى

ا ق ش پرەزيدەنتى دجو بايدەن مەن قىتاي ءتوراعاسى شي جينپيڭ ازيا-تىنىق مۇحيتى ەلدەرىنىڭ ەكونوميكالىق ىنتىماقتاستىعى جىل سايىنعى سامميتى (ا ت ە س) اياسىندا جابىق ەسىك جاعدايىندا كەلىسسوز جۇرگىزدى. قازاقپارات اگەنتتىگىنىڭ ءتىلشىسى بۇل تۋرالى NBC News-كە سىلتەمە جاساپ حابارلايدى.

دجو بايدەن شي جينپيڭدى كاليفورنياداعى (ا ق ش) ۆۋدسايد قالاسىنىڭ «Filoli Estate» مۇراجاي ءۇيىنىڭ جانىندا توسەلگەن قىزىل كىلەمدە قارسى الدى. امەريكا پرەزيدەنتى قىتايلىق ارىپتەسىن قارسى الۋ ءۇشىن عيماراتتان ءبىرىنشى بولىپ شىقتى. شي جينپيڭ كەلگەن سوڭ ەكى كوشباسشى سامميت عيماراتىنا كىرەر الدىندا قول الىسىپ امانداستى.

ءسوز باسىندا دجو بايدەن شي جينپيڭگە ا ق ش-قا ساپارى ءۇشىن العىس ايتىپ، قىتاي باسشىسىمەن باليدەگى سوڭعى كەزدەسۋىن ەسكە الدى.

امەريكا پرەزيدەنتى سونداي-اق كوشباسشىلار باسەكەلەستىكتىڭ ۋشىعىپ، قاقتىعىسقا اينالۋىنا جول بەرمەۋ ءۇشىن كۇش سالۋى كەرەك ەكەنىن اتاپ ءوتتى.

«مەن ءبىزدىڭ اڭگىمەمىزدى باعالايمىن، سەبەبى ءسىز جانە مەن ءبىر-ءبىرىمىزدى كوشباسشى رەتىندە جاقسى ءتۇسىنۋىمىز كەرەك دەپ ويلايمىن. بۇل رەتتە ءبىز ەشقانداي قاتەلىككە، جول بەرمەۋىمىز كەرەك»، - دەدى دجو بايدەن.

اق ءۇي باسشىسى كوشباسشىلاردىڭ ءوز قاۋىمداستىقتارى الدىندا بىرلەسىپ جۇمىس ىستەۋگە، سونىڭ ىشىندە كليماتتىڭ وزگەرۋى، ەسىرتكىنىڭ زاڭسىز اينالىمىنا قارسى تۇرۋعا جانە جاساندى ينتەللەكت تاسىلدەرىنە جاۋاپتى ەكەنىن اتاپ ءوتتى.

شي جينپيڭ ءبىر جىل بۇرىن باليدە ا ق ش پرەزيدەنتى دجو بايدەنمەن سوڭعى كەزدەسكەنىن، ودان بەرى الەم وزگەرگەنىن اتاپ ءوتتى.

«الەم Covid-19 ىندەتىنەن ايىقتى، ءبىراق ونىڭ ءالى دە ۇلكەن اسەرى بار. الەمدىك ەكونوميكا قالپىنا كەلە باستادى، ءبىراق ونىڭ قارقىنى باياۋ»، - دەدى شي جينپيڭ.

شي جينپيڭ قىتاي مەن ا ق ش اراسىنداعى قارىم-قاتىناسى سوڭعى 50 جىلدا جايلى بولماعانىن، الايدا ولار بارلىق كەدەرگىلەر مەن قيىندىقتاردى ەڭسەرە وتىرىپ العا جىلجىپ كەلە جاتقانىن اتاپ ءوتتى.

«ءبىر تاراپ ەكىنشىسىن وزگەرتۋى مۇمكىن ەمەس، ال قاقتىعىستار مەن كونفرونتاتسيا ەكى تاراپ ءۇشىن دە اۋىر زارداپتارعا اكەلەدى»، - دەدى شي جينپيڭ.

قىتاي باسشىسى سامميت بارىسىندا ءتۇرلى الەمدىك ماسەلەلەر بويىنشا پىكىر الماسۋعا ءۇمىت ءبىلدىردى.

ەكى كوشباسشى دا كىرىسپە ءسوز سويلەگەننەن كەيىن كەزدەسۋدى باستاۋ ءۇشىن باسپا ءسوز وكىلدەرى زالدان شىعارىلدى. ەكى باسشى دا اكىمشىلىكتىڭ كوپتەگەن جوعارى لاۋازىمدى شەنەۋنىكتەرىمەن ۇزىن ۇستەل باسىنا وتىردى.

كەزدەسۋ جەرگىلىكتى ۋاقىت بويىنشا ساعات 11:23-تە باستالدى.