دجو بايدەن ءوز ۇلىنا راقىمشىلىق جاسادى

  استانا. KAZINFORM - اق ش پرەزيدەنتى دجو بايدەن ەكى قىلمىستىق ءىس بويىنشا كىنالى دەپ تانىلىپ، ۇكىمىن كۇتىپ وتىرعان ۇلى حانتەرگە راقىمشىلىق جاسادى، دەلىنگەن اقۇي مالىمدەمەسىندە.

«وسى قىزمەتتەگى العاشقى كۇننەن باستاپ مەن ادىلەت مينيسترلىگىنىڭ شەشىمدەرىنە ارالاسپايتىنىمدى ايتتىم جانە ۇلىمنىڭ ادىلەتسىز قۋدالانعانىن باقىلاپ وتىرسام دا، ءوز سوزىمدە تۇردىم»، - دەدى بايدەن.

قىركۇيەك ايىندا بايدەننىڭ ءوزى دە، ونىڭ باسپا ءسوز حاتشىسى دا ۇلىنا راقىمشىلىق جاساۋ تۋرالى جارلىق شىعارىلمايتىنىنا سەندىردى.

ماۋسىم ايىندا سوت 54 جاستاعى حانتەر بايدەندى 2018 -جىلى قارۋ ساتىپ الۋ كەزىندە ەسىرتكىگە تاۋەلدى ەكەنىن جاسىرعانى ءۇشىن ايىپتادى. كىشى بايدەن ا ق ش تاريحىنداعى قازىرگى پرەزيدەنتتىڭ قىلمىسى ءۇشىن سوتتالعان تۇڭعىش ۇلى بولدى. سودان كەيىن قىركۇيەكتە حانتەر بايدەننىڭ ءوزى سالىق تولەۋدەن جالتارعانىن مويىندادى.

جەكسەنبى كۇنى كەشكە جاريالاعان مالىمدەمەسىندە دجو بايدەن ۇلىنىڭ سوتتارى «ساياساتپەن لاستانعانىن»، سول سەبەپتى زاڭسىز شەشىمدەرمەن اياقتالعانىن مالىمدەدى.

«مەن بۇل شەشىمدى قابىلداعان كەزدە، ونى كەيىنگە قالدىرۋدىڭ قاجەتى بولمادى. امەريكالىقتار اكە مەن پرەزيدەنتتىڭ نەگە مۇنداي شەشىمگە كەلگەنىن تۇسىنەدى دەپ ۇمىتتەنەمىن»، - دەلىنگەن حابارلامادا.

حانتەر بايدەنگە ۇكىم 12-جانە 16-جەلتوقساندا شىعارىلادى دەپ جوسپارلانعان بولاتىن. ەكىنشى جاعدايدا، 2016-2019 -جىلدارى 1,4 ميلليون دوللار كولەمىندە سالىق تولەۋدەن جالتارعانى ءۇشىن ول 15 جىلعا دەيىن باس بوستاندىعىنان ايىرىلۋى مۇمكىن.

سايلاۋ قارساڭىندا ا ق ش پرەزيدەنتتىگىنە ۇمىتكەر دونالد ترامپ سايلاۋدا جەڭىسكە جەتسە بايدەننىڭ ۇلىنا راقىمشىلىق جاساۋى مۇمكىن ەكەنىن ايتقان بولاتىن.