دۋشانبەدە ابايدىڭ بيۋستى ورناتىلادى

استانا. KAZINFORM - قازاقستاننىڭ تاجىكستانداعى مادەنيەت كۇندەرى اياسىندا 21-تامىز كۇنى فيرداۋسي اتىنداعى مادەنيەت جانە دەمالىس ساياباعىندا قازاق اقىنى جانە ويشىلى اباي قۇنانبايەۆتىڭ بيۋستى ورناتىلادى، دەپ جازادى حوۆار اگەنتتىگى.

«تاجىكستان مەن قازاقستان مادەني جانە گۋمانيتارلىق بايلانىستاردى كەڭەيتۋگە ەرەكشە ءمان بەرەدى. ۇلى گۋمانيستىڭ بيۋستى حالىقتاردى جاقىنداستىرۋدىڭ تاعى ءبىر قادامى بولادى. اباي شىعارماشىلىعىنىڭ نەگىزگى زەرتتەۋشىسى م. اۋەزوۆتىڭ انىقتاماسى بويىنشا شىعىستىڭ كلاسسيكالىق پوەزياسى، ونىڭ ىشىندە تاجىك-پارسى كلاسسيكالىق ادەبيەتى ونىڭ شىعارماشىلىعىنىڭ جانە XIX-ⅩⅩ عاسىرلاردىڭ باسىنداعى قازاق ادەبيەتىنىڭ قاينار كوزى»، - دەلىنگەن تاجىكستان رەسپۋبليكاسى مادەنيەت مينيسترلىگىنىڭ حابارلاماسىندا.

بۇعان دەيىن 22-23-تامىز كۇندەرى تاجىكستان پرەزيدەنتى ەمومالي راحموننىڭ شاقىرۋىمەن قازاقستان پرەزيدەنتى قاسىم-جومارت توقايەۆتىڭ تاجىكستان رەسپۋبليكاسىنا مەملەكەتتىك ساپارمەن باراتىنى حابارلانعان بولاتىن.

ەستەرىڭىزگە سالا كەتەيىك، ماسكەۋدىڭ چيستوپرۋدنىي بۋلۆارىندا قازاقستان ەلشىلىگى عيماراتىنا جاقىن ماڭدا اباي ەسكەرتكىشى ورناتىلعان بولاتىن. اباي ەسكەرتكىشى 2006-جىلى اشىلدى. بيىلعى جىل رەسەيدە اباي جىلى بولىپ جاريالاندى. ەسكەرتكىشتىڭ ساۋلەتشىلەرى ۆالەري رومانەنكو مەن تيمۋر سۇلەيمەنوۆ (قازاق ۇلتتىق ۆاليۋتاسى - تەڭگەنىڭ ەسكيزىن جاساۋشى) بولدى. ەسكەرتكىش قولادان قۇيىلىپ، ۇلتتىق ناقىشپەن بەزەندىرىلگەن تاس تۇعىرعا ورناتىلعان وتىرعان اقىننىڭ ءمۇسىنىن بەينەلەيدى جانە «ماڭگىلىك - ولمەس ءسوز يەسى» دەگەن جازۋى بار.

سونداي-اق اباي ەسكەرتكىشى 2013-جىلى تاشكەنتتەگى قازاقستان ەلشىلىگىنە قاراما-قارسى جەرگە ورناتىلدى. ءمۇسىنشى - نۇرلان دالباي، ەسكەرتكىشتىڭ ساۋلەتشىسى - راسۋل ساتىبالديەۆ.

2014-جىلى بەيجىڭدە قازاق اقىنىنا ەسكەرتكىش ورناتىلدى. ءمۇسىنشى يۋان سيكۋن بولدى.

ءدال وسى جىلى ۆەنگريانىڭ بۋداپەشت قالاسىندا اباي قۇنانبايەۆقا ارنالعان ەسكەرتكىش بوي كوتەردى. ماجار حالقى ءۇشىن قازاق پەن ماجار حالقىنىڭ تۇركى تامىرىنىڭ جاقىندىعىنا بايلانىستى اباي ەستەلىگى ەرەكشە. سوندىقتان ۆەنگر اۋىلدارىنىڭ، قالالارىنىڭ اتاۋلارى، سوزدەرى قازاق سوزدەرىمەن ۇندەس. ماجارلار قازاق اقىنىنىڭ ولەڭدەرىن جاتقا ايتىپ، قازاق تىلىندە ءان شىرقايدى.

اباي قۇنانبايەۆقا ارنالعان ەسكەرتكىش تەگەراندا (2007)، باكۋدە (2010)، كايردە (2016) جانە فرانسيانىڭ رەنن قالاسىندا دا (2016) ورناتىلدى.

دۇنيە جۇزىندە بيۋستتەر، ەسكەرتكىشتەر مەن ەسكەرتكىش تاقتالار اشىلدى. وتكەن جىلى ىستانبۇلدا (2021) ابايدىڭ الاڭى مەن ەسكەرتكىشى، بەرليندە (2021)، پاريجدە (2021) جانە سەۋلدە (2021)، تبيليسي (2022)، بىشكەك (2022) جانە نيۋ-دەليدە (2022) ورناتىلدى.