دۋبايداعى بورتسەرىك قازاق قىزى: ءبىر كۇنى قازاقستانعا ورالامىن

ارۋجان الىمبەتوۆا دۋبايداعى Emirates اۋەكومپانياسىندا بورتسەرىك بولىپ قىزمەت ەتەدى. ونى مۇندا ماقساتىنا جەتپەي قويمايتىن قايسار مىنەزى جەتەلەگەن. ارمانى اسقاق قىزدىڭ اقىلى كوركىنە ساي. نازىك بولمىسىنا بورتسەرىك كيىمى قۇيىپ قويعانداي.

شەتەلدە ەڭبەك ەتىپ جۇرگەن قاراكوز قىزىمىز نەبارى 24 جاستا. قىزىلوردا وبلىسى بايقوڭىر قالاسىندا تۋىپ- وسكەن. ءوزى الماتىداعى قازۇۋ- دىڭ تۇلەگى. «اۋدارما ءىسى» ماماندىعى بويىنشا ءبىلىم العان. العاشىندا Air Astana كومپانياسىندا ەكى جىلداي ۋاقىت جۇمىس ىستەپ، بيىل Emirates-كە ورنالاستى. وسكەن وڭىردەن جىراققا كەتۋ ءۇيىنىڭ جالعىز قىزىنا وڭاي ەمەس ارينە. بار جاقسىنى بالام كورسىن دەيتىن اناسى ۇلكەن قولداۋ ءبىلدىرىپتى. ءسويتىپ قازىر ارۋجان دۋبايداعى ومىرگە تولىق بەيىمدەلگەن.

«دۋباي - وتە قاۋىپسىز، تازا ءارى زاماناۋي قالا. مۇنداعى تۇرعىنداردان ءوزارا سىيلاستىقتى ۇيرەندىم. كەز كەلگەن ۇلت وكىلىنە دوستىق ىقىلاسپەن قارايدى. اسىققان ادامدى كورمەيسىڭ. حالقى تارتىپكە باعىنعان، ۇرلىق جوق. ءبىر جەردە قالدىرىپ كەتكەن زاتىڭا ەشكىم تيىسپەيدى. ءتۇن ورتاسىندا جالعىز دۇكەنگە بارۋ دا قورقىنىشتى ەمەس. سومكەڭ اۋىر بولسا دۇكەن قىزمەتكەرلەرى زاتىڭدى ۇيىڭە دەيىن اپارىپ بەرۋگە بار»، دەدى ا. الىمبەتوۆا. ونىڭ بۇل قالادا تۇرىپ جاتقانىنا سەگىز اي بولدى. جاڭا جەرگە تەزىرەك ۇيرەنىسۋىنە البەتتە سۇيىكتى ءىسىنىڭ ىقپالى كوپ.

ول بۇل كومپانياعا تالاي كەزەڭنەن تۇراتىن ىرىكتەۋدەن ءوتىپ كەلدى. شەتەلدىك كومپانيانىڭ الماتىدا وتكىزگەن ىرىكتەۋىنە 76 ادام قاتىسىپ، سونىڭ جەتەۋى سىناقتان سۇرىنبەي ءوتتى. ارۋجان سونىڭ ءبىرى.

«ۇلكەن اۋەكومپانيا بولعاندىقتان ءارتۇرلى ەلدەرگە ساپار شەگەدى. ەكيپاجدا ءاردايىم ءارتۇرلى ۇلت وكىلدەرى بولادى. سول سەبەپتى كومپانيا ءتۇرلى تۇلعالاردى ىزدەيدى. بىزدەگى بورتسەرىكتەردىڭ ءارقايسىسى ءارتۇرلى مىنەزدى. ءبارىمىزدى دوستىق ۇيىستىرادى»، دەيدى بورتسەرىك قىز.

كومپانيا قىزمەتكەرلەردىڭ دەنساۋلىعىنا ءجىتى كوڭىل بولەدى. ىرىكتەۋدەن وتكەن ولار ەڭ اۋەلى مەديتسينالىق تەكسەرىستەن وتكەن. 2 اي ۋاقىتتى اعىلشىن ءتىلىن جەتىك مەڭگەرۋگە ارناعان. بۇدان سوڭ اۆياتسياعا قاتىستى تەوريالىق ءبىلىمدى جەتىلدىرىپ، بورتسەرىك قىزمەتىنە كىرىسكەن. قىزمەتكەرلەر التى اي ۋاقىت سىناق مەرزىمىندە جۇرەدى. بۇل مەزەتتە تاجىريبەلى بورتسەرىكتەر جاڭا جۇمىسكەرلەرگە تۇسىنىستىكپەن قاراپ، كومەگىن ايانىپ قالمايدى.

كومپانيا قىزمەتكەرلەردىڭ جۇمىس ىستەۋىنە، جايلى ءومىر سۇرۋىنە بار جاعدايدى جاساپ قويعان. تۇراتىن تەگىن ءۇي، ەكيپاجعا ارنالعان كولىك دەگەن سىندى مۇقتاجدىقتاردىڭ بارلىعى قاراستىرىلعان. ارۋجان بۇل قىزمەتىن الەمنىڭ ءار تۇكپىرىنە تابان ءتيىپ، ءتۇرلى وركەنيەتپەن تانىسا الاتىنى ءۇشىن دە جاقسى كورەدى. بۇگىندە ول 22 ەلدە بولىپتى. ءار ساياحاتتان جاڭا ەموتسيا، كۇش الامىن دەيدى ول.

شەتەلدەگى قوماقتى جالاقى مەن جايلى ومىرگە ۇيرەنگەن جاستاردىڭ وتانىنا ورالماي قالىپ جاتقان مىسالى كوپ. وسى ورايدا بايقوڭىردا تۋعان قىز: «وتان وتتان دا ىستىق. ءتۇبى ءبىر كۇنى ەلگە ورالاتىنىمدى بىلەمىن»، دەيدى.

مارجان تىلەۋبەك

egemen.kz