دۋبايدا مۇلكى تىركەلگەندەردىڭ ءبارىن بىردەي قارالاعان دۇرىس ەمەس - سەنات ءتوراعاسى

استانا. KAZINFORM - دۋبايدا مۇلكى بارلاردىڭ ءبارىن بىردەي قارالاۋ دۇرىس ەمەس. سەبەبى ولاردىڭ اراسىندا زاڭدى جولمەن تابىستى بولعان ادامدار بار. بۇل تۋرالى سەنات ءتوراعاسى ماۋلەن اشىمبايەۆ ءمالىم ەتتى.

بۇگىن سەناتتىڭ جالپى وتىرىسىنان كەيىن تىلشىلەر «دۋبايداعى قازاقستان ازاماتتارىنىڭ ۇيلەرىن قۇزىرلى ورگاندار تەكسەرۋى كەرەك پە؟» دەگەن سۇراق قويدى.

«مەنىڭ بىلۋىمشە، وسى سۇراقتى سىزدەر كەشە باس پروكۋراتۋراداعى زاڭسىز اكتيۆتەردى قايتارۋ ءۇشىن قۇرىلعان كوميتەتتىڭ ءتوراعاسىنا قويدىڭىزدار. كوميتەتتىڭ ءتوراعاسى بۇل سۇراققا جان- جاقتى جاۋاپ بەردى دەپ ەسەپتەيمىن. كوميتەت ءتوراعاسىنىڭ ايتۋىنشا، بۇل ماسەلەنىڭ ءبارى جۇمىس بابىندا قارالادى. ەگەر دە سول اكتيۆتەر زاڭسىز تۇردە الىنعان بولسا، ولار تىزىمگە كىرگىزىلەدى نەمەسە ولاردىڭ قالاي الىنعانى تۋرالى ناقتى جۇمىستار جۇرگىزىلەدى. ءارى قاراي زاڭنىڭ اياسىندا ءتيىستى شەشىمدەر قابىلدانادى»، - دەدى سەنات ءتوراعاسى.

بۇل تۇرعىدا ول بارلىق قادام زاڭ اياسىندا ىسكە اسىرىلاتىنىن ايتتى.

«سونىمەن قاتار 1500-دەي قازاقستاندىقتىڭ دۋبايدا ءارتۇرلى ۇيلەرى، باسقا دا مۇلىكتەرى بار دەگەن اقپارات بار. ەندى ولاردىڭ بارلىعىن قارالاۋ ارتىقتاۋ بولاتىن شىعار. ونىڭ ىشىندە كاسىپكەرلەر دە بار، ياعني كاسىبىمەن اينالىسىپ، زاڭدى تۇردە تابىسىن تاۋىپ، سول مۇلىكتەردى العان. سوندىقتان بۇل جەردە جۇرتتىڭ ءبارى زاڭ بۇزىپتى دەپ ايتقانىمىز ارتىقتاۋ بولار. سول سەبەپتى بۇل ماسەلەلەردى باس پروكۋراتۋرا قاراماعىنداعى ءتيىستى كوميتەت زاڭ اياسىندا قارايتىنى تۋرالى كەشە وزدەرىڭىزگە اقپارات بەرىلدى. ءارى قاراي وسى ماسەلەگە قاتىستى كەيبىر تۇسىنىكتەمەلەردى باس پروكۋراتۋراعا جولداعاندارىڭىز دۇرىس بولادى»، - دەدى ماۋلەن اشىمبايەۆ.

اۆتور

رۋسلان عابباسوۆ