دۋباي الەمدەگى ەڭ ۇلكەن اۋەجاي تەرمينالىن سالادى

استانا. KAZINFORM - دۋباي امىرلىگى قۇنى 35 ميلليارد دوللار بولاتىن جاڭا جولاۋشىلار تەرمينالىنىڭ قۇرىلىسىن باستادى، ول اياقتالعاننان كەيىن الەمدەگى ەڭ جوعارى وتكىزۋ قابىلەتى بار اۋە ايلاعىنا اينالادى، دەپ حابارلايدى WAM اگەنتتىگى.

جوبا دۋباي حالىقارالىق اۋەجايىنان وڭتۇستىككە قاراي 45 ك م قاشىقتىقتا ورنالاسقان Dubai World Central اۋدانىنداعى «ءال-ماكتۋم» حالىقارالىق اۋەجايىن (Al Maktoum International Airport, DWC) ون جىل ىشىندە كەڭەيتۋدى كوزدەيدى. «ءال-ماكتۋم اۋەجايى» 2010 -جىلى اشىلعان جانە امىرلىكتەگى بيلەۋشى ءال-ماكتۋم وتباسىنىڭ اتىمەن اتالعان.

ب ا ءا پرەمەر-ءمينيسترى جانە ۆيتسە-پرەزيدەنتى جانە دۋباي بيلەۋشىسى شەيح موحاممەد بەن راشيد ءال-ماكتۋم جەكسەنبىدە جاڭا تەرمينال قازىرگى دۋباي حالىقارالىق اۋەجايىنان بەس ەسە ۇلكەن ەكەنىن جانە جىلىنا 260 ميلليون جولاۋشىعا قىزمەت كورسەتە الاتىنىن مالىمدەدى.

قۇنى 128 ميلليارد ديرحام ($34,8 ميلليارد) جوبا دۋباي اۆياتسيا كورپوراتسياسى ستراتەگياسىنىڭ بولىگى رەتىندە جۇزەگە اسىرىلادى. شەيح موحاممەد جەكسەنبىدە Dubai Aviation Engineering Projects ستراتەگيالىق جوسپارىن قاراپ شىعىپ، جوبالاردى ماقۇلدادى.

بۇگىندە دۋباي حالىقارالىق اۋەجايىنىڭ قالا ورتالىعىندا ورنالاسۋى ودان ءارى كەڭەيتۋدى قيىنداتىپ وتىر.

«ءال-ماكتۋم» حالىقارالىق اۋەجايىنا الداعى جىلدارى دۋباي حالىقارالىق اۋەجايىنىڭ بارلىق جۇمىسى تاپسىرىلادى.

اۋەجايدىڭ قونۋعا ارنالعان 400 شىعابەرىسى جانە 5 پاراللەل ۇشۋ-قونۋ جولاعى بولادى. جوبا اۆياتسيا سالاسىندا العاش رەت قولدانىلاتىن جاڭا اۆياتسيالىق تەحنولوگيالاردى قاراستىرادى.

«ءبىز دۋبايدىڭ وڭتۇستىگىندەگى اۋەجايدىڭ اينالاسىندا تۇتاس ءبىر قالا سالىپ جاتقاندىقتان، ميلليون ادام ءۇشىن باسپانا سۇرانىسى ارتادى. وعان لوگيستيكا جانە اۋە كولىگى سالاسىنداعى الەمنىڭ جەتەكشى كومپانيالارى قاتىسادى. ءبىز بولاشاق ۇرپاق ءۇشىن جاڭا جوبانى قۇرىپ جاتىرمىز، ءوز كەزەگىندە بالالارىمىز بەن ولاردىڭ بالالارىنىڭ ۇزدىكسىز جانە تۇراقتى دامۋىن قامتاماسىز ەتەمىز. دۋباي الەمدىك اۋەجايعا، پورتقا، قالالىق جەلىگە جانە جاڭا جاھاندىق ورتالىققا اينالادى»، - دەپ مالىمدەدى شەيح موحاممەد.

قۇرىلىس اياقتالعاننان كەيىن «ءال-ماكتۋم» حالىقارالىق اۋەجايى Emirates اۋە تاسىمالداۋشىسىنىڭ جاڭا ۇيىنە اينالادى.

اۆتور
زارينا تۋعانبايەۆا