داۋىل، جاڭبىر، بۇرشاق: ءۇش وبلىستا ۇسىك جۇرەدى

استانا. KAZINFORM - «قازگيدرومەت» ر م ك ەل اۋماعىندا 14-مامىردا بولاتىن قاۋىپتى مەتەورولوگيالىق قۇبىلىستارعا بولجام جاسادى.

سينوپتيكتەردىڭ مالىمەتىنشە، وڭتۇستىك تسيكلونى جانە ولارمەن بايلانىسقان اتموسفەرالىق فرونتالدى بولىكتەر ق ر ارقىلى جىلجي وتىرىپ، نايزاعايلى جاڭبىر، سولتۇستىك پەن ورتالىقتا قاتتى جاڭبىر، بۇرشاق اكەلەدى.

«تەك ەلىمىدىڭ باتىسى مەن وڭتۇستىك- شىعىسىندا جاۋىن-شاشىنسىز اۋا رايى كۇتىلەدى. رەسپۋبليكا بويىنشا جەلدىڭ كۇشەيۋى، سولتۇستىگى مەن ورتالىعىندا داۋىل، وڭتۇستىگىندە شاڭدى داۋىل سوعادى.

تۇندە قوستاناي وبلىسىنىڭ سولتۇستىگىندە، اقتوبە وبلىسىنىڭ سولتۇستىگىندە، سولتۇستىك قازاقستان وبلىسىنىڭ باتىسىندا توپىراق بەتىندە 2 گرادۋس ۇسىك جۇرەدى»، دەپ جازدى ۆەدومستۆو.

قاراعاندى وبلىسىنىڭ باتىسىندا، وڭتۇستىگىندە، ۇلىتاۋ وبلىسىنىڭ ورتالىعىندا، اباي، قوستاناي وبلىستارىنىڭ وڭتۇستىگىندە، اتىراۋ وبلىسىنىڭ سولتۇستىك- باتىسىندا، شىعىس قازاقستان وبلىسىنىڭ وڭتۇستىك- شىعىسىندا، قىزىلوردا وبلىسىنىڭ باتىسىندا جوعارى ءورت قاۋىپى ساقتالادى، باتىس قازاقستان وبلىسىنىڭ باتىسىندا، سولتۇستىك- باتىسىندا، وڭتۇستىك-باتىسىندا جوعارى ءورت قاۋىپى كۇتىلەدى.

قىزىلوردا وبلىسىنىڭ قازالى اۋدانىندا، تۇركىستان وبلىسىنىڭ باتىسىندا، ءشولدى اۋداندارىندا توتەنشە ءورت قاۋىپى ساقتالادى.