دارىگەرلەر، ينجەنەرلەر، زاڭگەرلەر - پرەزيدەنت ءىس باسقارماسىنا قانداي ماماندار قاجەت

استانا. KAZINFORM – ق ر پرەزيدەنتى ءىس باسقارماسىندا جوعارى جانە ورتا وقۋ ورىندارىنىڭ 300-گە جۋىق ستۋدەنتى وندىرىستىك تاجىريبەدەن ءوتتى، ولاردىڭ 101- ءى جۇمىسپەن قامتىلدى.

بۇگىن ق ر پ ءى ب ستۋدەنتتەردى وندىرىستىك تاجىريبەگە شاقىرۋ جانە جۇمىسپەن قامتۋ بويىنشا دوڭگەلەك ۇستەل وتكىزدى.

«ءبىزدىڭ ءىس- شارانىڭ ماقساتى - ستۋدەنتتەردىڭ وندىرىستىك جانە ديپلوم الدىنداعى پراكتيكاسىن جانە تۇلەكتەردىڭ پرەزيدەنت ءىس باسقارماسى جۇيەسىنىڭ كاسىپورىندارىنا جۇمىسقا ورنالاسۋىن ۇيىمداستىرۋداعى ىنتىماقتاستىقتىڭ نەگىزگى باعىتتارىن انىقتاۋ. بۇگىن ءبىز ساراپشىلار مەن ءبىلىم بەرۋ مەكەمەلەرىنىڭ وكىلدەرىن پىكىر الماسۋعا جانە ۇزدىك تاجىريبەلەرمەن بولىسۋگە شاقىردىق. بۇگىنگى ديالوگ پ ءى ب ۆەدومستۆولىق باعىنىستى ۇيىمدارىنىڭ وقۋ ورىندارىمەن ءوزارا ءىس-قيمىلى پروتسەستەرىن جاقسارتاتىنىنا، جاڭا يدەيالار مەن شەشىمدەر اكەلەتىنىنە، جوعارى جانە ورتا وقۋ ورىندارىنىڭ تۇلەكتەرىن ودان ءارى جۇمىسقا ورنالاستىرۋعا جاردەمدەسەتىنىنە سەنىمدىمىن»، - دەدى ق ر پرەزيدەنتى ءىس باسقارماسى اپپاراتىنىڭ باسشىسى سەرىك كەنجەبايەۆ.

بۇگىنگى تاڭدا پ ءى ب ۆەدومستۆولىق ۇيىمدارىندا مەديتسينا، ساناتوري-كۋرورتتىق ساۋىقتىرۋ، اۆياتسيا، عيماراتتى پايدالانۋ، قۇرىلىس، جۋرناليستيكا، تۋريزم، ورمان شارۋاشىلىعى سياقتى سالالاردا كوپتەگەن ماماندارعا قاجەتتىلىك بار.

«سوندىقتان پ ءى ب جۇيەسىنىڭ فۋنكتسيونالدىق مىندەتتەرى وتە كەڭ، قاجەتتىلىك تۋىنداعان بىرنەشە ماماندىقتى ءتىزىپ وتەيىن: دارىگەرلەر، تەراپيەۆتتەر، رەابيليتولوگتار، ەپيدەميولوگتار، كارديوحيرۋرگتەر، ەنەرگەتيكا ينجەنەرلەرى، قاۋىپسىزدىك جانە ەڭبەكتى قورعاۋ ينجەنەرلەرى، قۇرىلىس ينجەنەرلەرى، سۋمەن جابدىقتاۋ ينجەنەرلەرى، اۆتوەلەكتريكتەر، اۆتوسلەسارلار، اۆتومەحانيكتەر، گاز- ەلەكتر دانەكەرلەۋشىلەر كەرەك. سونداي-اق، اكىمشىلىك-باسقارۋ بلوگىنا بىزگە ساۋاتتى اۋدارماشىلار، ماركەتولوگتار، زاڭگەرلەر قاجەت، قازىر ينتەرنەت دامىعاندىقتان SMM- مەنەدجەرلەرى، گرافيكالىق ديزاينەرلەر قاجەت»، - دەدى س. كەنجەبايەۆ.

ق ر پ ءى ب ۇيىمدارى مەن جوعارى جانە ورتا وقۋ ورىندارى اراسىندا جۇمىس تۋرالى مەموراندۋمدار جاسالعان. بۇگىن دە لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ قازاقستانداعى فيليالىمەن ىنتىماقتاستىق جونىندەگى مەموراندۋمعا قول قويىلدى.

ق ر پ ءى ب مەديتسينا ورتالىعىنىڭ مەديتسينالىق تەحنولوگيالار جانە اقپاراتتىق جۇيەلەر ورتالىعىنىڭ پرەزيدەنتى اسحات ءاشىموۆ كەشەندى تالداۋ ناتيجەسىندە وزەكتى ماماندىقتار ءتىزىمى جاسالعانىن، بۇل وقۋ ورىندارىمەن ءتيىمدى ىنتىماقتاستىق ەتۋگە جانە زاماناۋي تالاپتارعا ساي ماماندار ازىرلەۋگە مۇمكىندىك بەرەتىنىن جەتكىزدى.

«ءبىز وقۋ ورىندارىمەن ىنتىماقتاستىق تۋرالى 68 مەموراندۋم بەكىتتىك، ونىڭ 48- ءى جوعارعى وقۋ ورىندارىمەن، 19-ى - ورتا وقۋ ورىندارىمەن جاسالعان. بۇل كەلىسىمدەر ءارى قارايعى ىنتىماقتاستىقتىڭ نەگىزى بولادى جانە جوعارى بىلىكتى كادر دايارلاۋعا باعىتتالعان بىرلەسكەن باستامالاردى جۇزەگە اسىرۋعا كومەكتەسەدى. ناتيجەسىندە جوو مەن كوللەدجدەردىڭ 299 ستۋدەنتى ءبىزدىڭ ۆەدومستۆوعا قاراستى ۇيىمداردا وندىرىستىك پراكتيكادان ءوتتى. ولاردىڭ 101- ءى ۆەدومستۆوعا قاراستى ۇيىمدارعا جۇمىسقا ورنالاستى. قازىر تاعى قوسىمشا 29 ستۋدەنت تاجىريبە جيناقتاپ ءجۇر»، - دەدى ا. ءاشىموۆ.

اتالعان شارالارعا قوسىمشا، ق ر پ ءى ب 27 بوس جۇمىس ورىندارى جارمەڭكەسىنە قاتىسىپ، بولاشاق ماماندارعا مانساپتىق كەلەشەك تۋرالى تولىققاندى اقپارات بەرگەن.

اۆتور

ايجان سەرىكجان قىزى